ၵူၼ်းမိူင်းၸိူဝ်းလုၵ်ႉ မိူင်းထႆး၊ မိူင်းၶႄႇ ပွၵ်ႇၶိုၼ်းဝၢၼ်ႈမိူင်းၸဝ်ႈၵဝ်ႇၵမ်ႈၽွင်ႈ ဢမ်ႇပွင်ႇၶၢဝ်ႇၸူး ၶွမ်ႊမတီႊ လူလွမ် ပႂ်ႉတူၺ်း တၢင်းပဵၼ်ၶူဝ်ႊဝိတ်ႉ – 19 သေ မိူဝ်းမူၵ်းယူႇဝႆႉၸွမ်းႁေႃ ႁိူၼ်းယေးၽႂ်မၼ်း မီးတၢင်းၼမ် ၼႂ်းၸႄႈဝဵင်းၼမ်ႉတူႈ။

တႄႇဢဝ် ႁၢင်လိူၼ်မၢတ်ႉၶျ်လႄႈ ႁူဝ်လိူၼ်ဢေႊပရိူဝ်ႊ 2020 ၼႃႈၶၢဝ်းသွၼ်းၼမ်ႉသၢင်းၵျၢၼ်ႇၼႆႉ ၵူၼ်းမိူင်း ၸိူဝ်းၵႂႃႇႁဵတ်းၵၢၼ် တၢင်းမိူင်းၶႄႇ၊ မိူင်းထႆး ဢွၼ်ၵၼ်ပွၵ်ႈမိူဝ်းမူၵ်းယူႇတီႈဝၢၼ်ႈၽႂ် မိူင်းမၼ်းၶိုၼ်း။

လုင်းၸၢႆးပႃႉၺၢၼ်ႇ ၽူႈဢွၼ်ႁူဝ်တူင်ႉၼိုင်ၼႂ်းတူင်ႇဝူင်းၵူၼ်း ၼႂ်းၸႄႈဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ “ လီမႆႈ ၸႂ်တႄႉယဝ်ႉ။ ၵူၼ်းမိူင်းႁဝ်း ၸိူဝ်းပွၵ်ႈမႃးၼၼ်ႉ ၵမ်ႈၽွင်ႈဢမ်ႇပွင်ႇၶၢဝ်ႇ ဢမ်ႇမႃးယူႇ ဢွင်ႈတီႈဢၼ်ႁဵတ်းဝႆႉပၼ် တႃႇပႂ်ႉ တူၺ်း 14 ဝၼ်း။ ၶဝ်သမ်ႉလၵ်ႉပွၵ်ႈမိူဝ်းမူၵ်းယူႇ ႁင်းၽႂ် ႁင်းမၼ်းဝႆႉၸိူင်ႉၼၼ် မီးၼမ်ၼႃႇၶႃႈ။ ပေႃးပဵၼ်မႃးၼႆ တေႁဵတ်းႁိုဝ်။ ၵမ်ႈၼမ်တေပဵၼ်ၵူၼ်းဝၢၼ်ႈႁဝ်း သၢႆတၢင်းၼွၵ်ႈ ဢၼ်တၢင်းၸုမ်းယိပ်းၵွင်ႈၵၢင်ႇၶဝ် ၵုမ်းဝႆႉၸိူဝ်းၼၼ်ႉ ၶႃႈယဝ်ႉ” ဝႃႈၼႆ။

ၵူၼ်းဝၢၼ်ႈ ဢၼ်ပွၵ်ႈမႃးသေ ဢမ်ႇပွင်ႇၶၢဝ်ႇၸိူဝ်းၼၼ်ႉ ၵမ်ႈၼမ် တေပဵၼ်သၢႆတၢင်းထုင်ႉမိူင်းယဵၼ်၊ ဝၢၼ်ႈၸၢမ်၊ ပၢင်လူင် ၸိူဝ်းၼႆႉ ဝႃႈၼႆ။ တီႈၼမ်ႉတူႈၼႆႉ ပႆႇမီးၵူၼ်းဢၼ်ထုၵ်ႇလီထၢင်ႇထိူမ်ပႂ်ႉတူၺ်း ၊ ပႆႇမီးၵူၼ်းၸပ်းတၢင်းပဵၼ်လႄႈ ယင်းတိုၵ်ႉဢွၼ်ၵၼ် ဝႆႉမဝ်မၢင်ယူႇ လုင်းပႃႇၺၢၼ်ႇ လၢတ်ႈ ၼႄၼင်ႇၼႆ။

ၼႂ်းၸႄႈဝဵင်းၼမ်ႉတူႈၼႆႉ မီးၸုမ်းယိပ်းၵွင်ႈၵၢင်ႇၸၢဝ်းၶိူဝ်း တူင်ႉၼိုင်ၵႂႃႇမႃး မိူၼ်ၼင်ႇ တပ်ႉသိုၵ်းတဢၢင်း၊ သိုၵ်းၶၢင်၊ သိုၵ်းတႆး ပွတ်းႁွင်ႇလႄႈ ပွတ်းၸၢၼ်း ၸိူဝ်းၼႆႉ။

ဢိင်ၼိူဝ်လွင်ႈတၢင်းၼႆႉသေ ယူႇတီႈၽူႈမီးပုၼ်ႈၽွၼ်း ၾၢႆႇလူင်ပွင်ၸိုင်ႈလႄႈ ၽူႈတႅၼ်းသၽႃး ၸိူဝ်းၼႆႉၵေႃႈ ႁူမ်ႈၵၼ် လူင်းပိုၼ်ႉတီႈ ပၼ်ပိုၼ်ႉႁူႉၵူၼ်းမိူင်း လွင်ႈလွၵ်းလၢႆးႁႄႉၵင်ႈတၢင်းပဵၼ်ၶူဝ်ႊဝိတ်ႉ – 19 ၵႂႃႇယူႇ ဝႃႈၼႆ။

ၼၢင်းၸၢမ်ႁွမ် ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတၢင်ႈမၢႆ 2 ၸႄႈဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်း မိူင်းႁဝ်း ဢၼ်ၵုမ်းတူဝ်ယူႇဝႆႉၸွမ်းႁိူၼ်းၼၼ်ႉတႄႉ ႁဝ်းၶႃႈ ၽႅၼ်ၵၢၼ်မီးဝႆႉယူႇ ၽူႈၵွၼ်းဢိူင်ႇ မေႃယႃ ၸွမ်းၼႂ်း ဢိူင်ႇ ၸိူဝ်းၼႆႉ ႁူမ်ႈၵၼ်သေ 2 ဝၼ်းၼိုင်ႈပွၵ်ႈ လူင်းၵူတ်ႇထတ်းပၼ်ပၢႆးယူႇလီ၊ လူင်းၵဵပ်းသဵၼ်ႈမၢႆ၊ တူၺ်းငဝ်းလၢႆး လွင်ႈ ယူႇသဝ်းၵိၼ်သၢင်ႈၶဝ်ယူႇ” ဝႃႈၼႆ။

ၵူၼ်းဝၢၼ်ႈဢၼ်ထုၵ်ႇၵုမ်းတူဝ်ဝႆႉ ၵမ်ႈၼမ်ၼႆႉ ပဵၼ်ၵူၼ်းဝၢၼ်ႈ ပၢင်သပေႇ၊ ၼႃးႁူၵ်း၊ ၵုင်းၵလႃးလႄႈ တွင်ႇတူင်းလူင်း ၸိူဝ်းၼႆႉ။

တေႃႈလဵဝ် ၵူၼ်းမိူင်းဢၼ်ပွၵ်ႈမႃးသေ ၵုမ်းတူဝ်ယူႇဝႆႉတီႈႁိူၼ်းၸဝ်ႈၵဝ်ႇၽႂ်မၼ်းသမ်ႉ တင်းမူတ်း မီး 270 ၵေႃႉ၊ ဢၼ် ယူႇဝႆႉတီႈႁူင်းႁဵၼ်း ၸွမ်းဝၢၼ်ႈသမ်ႉ မီး 40 ၵေႃႉ။ ၸိူဝ်းၵုမ်းတူဝ်ယူႇဝႆႉ ၼႂ်းသူၼ်ထဵင်ႁႆႈၼႃးသမ်ႉ မီး 85 ၵေႃႉ။ ဢၼ်ယူႇဝႆႉတီႈၼႂ်းဝဵင်းၼမ်ႉတူႈသမ်ႉ မီး 11 ၵေႃႉ။ ပွၵ်ႈမိူဝ်းယဝ်ႉ 5 ၵေႃႉ ႁူမ်ႈၵၼ်တင်းမူတ်းမီး 406 ၵေႃႉ။

ၵူၼ်းမိူင်းဢၼ်မႃးယူႇပႂ်ႉတူၺ်းငဝ်းလၢႆးတၢင်းပဵၼ်ၸုပ်ႈၼိုင်ႈ တဵမ်ၵႂႃႇ 14 ဝၼ်းယဝ်ႉၼၼ်ႉ တင်းမူတ်းမီး 140 ၵေႃႉ ၼၼ်ႉတႄႉ ဢွၼ်ၵၼ်ပွၵ်ႈမိူဝ်း မူတ်းယဝ်ႉ ဝႃႈၼႆ။

တေႃႈလဵဝ် ၵူၼ်းၸပ်းတၢင်းပဵၼ် ၸိူဝ်ႉမႅင်း ၶူဝ်ႊဝိတ်ႉ -19 ၼႂ်းမိူင်းႁူမ်ႈတုမ်ၼႆႉ တင်းမူတ်းမီး 121 ၵေႃႉ၊ တၢႆ 5 ၵေႃႉ၊ ယႃ ၶႅၼ်း 9 ၵေႃႉ။ ၼႂ်းၵူၼ်းပဵၼ် 121 ၵေႃႉၼၼ်ႉ ပႃးၵူၼ်းမိူင်းတႆး 6 ၵေႃႉ။ ၵူၼ်းၼႂ်းၸိုင်ႈတႆးပွတ်းႁွင်ႇ 1 ၵေႃႉ၊ ပွတ်း ၸၢၼ်း 2 ၵေႃႉလႄႈ ပွတ်းဢွၵ်ႇၶူင်း 3 ၵေႃႉ ဝႃႈၼႆ။