ႁႅင်းၵၢၼ်တႆး ပွၵ်ႈမႃးၸႂ်းႁိူၼ်းၶၢဝ်းလိူၼ်ႁႃႈ သမ်ႉဢမ်ႇၸၢင်ႈပွၵ်ႈမိူဝ်းႁႃလုၵ်ႈလၢင်းၼႂ်းမိူင်းထႆးၶိုၼ်း

ႁႅင်းၵၢၼ်တႆးၼႂ်းမိူင်းထႆး ၸိူဝ်းပွၵ်ႈမႃးႁိူၼ်းၽွင်းၶၢဝ်းလိူၼ်ႁႃႈလႄႈ ၽွင်းၶၢဝ်းၶူဝ်ႊဝိတ်ႉ 19 ၼႆႉ တေပွၵ်ႈမိူဝ်းႁဵတ်း ၵၢၼ်ၶိုၼ်း မိူင်းထႆးၵေႃႈ ပႆႇၸၢင်ႈပွၵ်ႈလႄႈ မႆႈၸႂ်လွင်ႈၼႃႈႁေႃတေႃႁိူၼ်း ၸိူဝ်းၵိုတ်းဝႆႉတၢင်းမိူင်းထႆး ဝႃႈၼႆ။

ႁႅင်းၵၢၼ်တႆး မၢင်ၸိူဝ်း ပွၵ်ႈမႃးဢဝ်လုၵ်ႈလၢင်းၶၢမ်ႇသၢင်ႇ ၼုင်ႈလိူင်၊ မၢင်ၵေႃႉသမ်ႉ ပွၵ်ႈမိူဝ်းၸႂ်းႁိူၼ်း ၽွင်းၶၢဝ်း ပွႆးသွၼ်းၼမ်ႉလိူၼ်ႁႃႈ သၢင်းၵျၢၼ်ႇၼႆသေ ဢွၼ်ၵၼ်ပွၵ်ႈၶဝ်ႈမႃး မိူဝ်ႈၽွင်းႁၢင်လိူၼ်ၾႅပ်ႊၿိဝ်ႊရီႊ လႄႈ လိူၼ်မၢတ်ႉၶျ် 2020 ပူၼ်ႉမႃးၼၼ်ႉသေ ယွၼ်ႉတၢင်းပဵၼ်ၶူဝ်ႊဝိတ်ႉ -19 လၢမ်းၽႄႈႁၢဝ်ႈႁႅင်းလႄႈ ဢွၼ်ၵၼ်ၵိုတ်းယူႇဝႆႉၼႂ်းမိူင်းတႆး ပႆႇပဵၼ်ပွၵ်ႈၶဝ်ႈမိူဝ်း ႁဵတ်းၵၢၼ်ၼႂ်းမိူင်းထႆးၶိုၼ်း မီးတၢင်းၼမ် ဝႃႈၼႆ။

ၸၢႆးပီး ၵူၼ်းထုင်ႉပူင်း လၢတ်ႈတီႈၽူႈတွႆႇႁွၵ်ႈဝႃႈ “ ၶႃႈႁဝ်း ဢဝ်လုၵ်ႈပွၵ်ႈမႃးၶၢမ်ႇသၢင်ႇ ၼုင်ႈလိူင်ၶႃႈ။ တေႃႈလဵဝ် ၶႃႈၶဝ် ၶႂ်ႈပွၵ်ႈမိူဝ်းၶိုၼ်း ႁဵတ်းၵၢၼ်တီႈမိူင်းထႆးၶႃႈယဝ်ႉ။ ၶႃႈၵႂႃႇႁဵတ်းၵၢၼ်တီႈမိူင်းထႆးၼၼ်ႉ တေမီးၶၢဝ်းတၢင်း 20 ပီယဝ်ႉ ႁဵတ်း ၵၢၼ်ယူႇတီႈၵဵင်းမႆႇၶႃႈ ။ ၶႃႈမီးလုၵ်ႈဢွၼ်ႇဝႆႉ ၵေႃႉၼိုင်ႈဢေႃႈယူႇဝႆႉတီႈၼၼ်ႈ ။ ၶႃႈပႆႇၸၢင်ႈမိူဝ်း ၶႃႈမႆႈၸႂ်ၶဝ်ဢေႃႈ” ဝႃႈၼႆ။

ယွၼ်ႉတၢင်းပဵၼ်ၶူဝ်ႊဝိတ်ႉ 19 လၢမ်းၽႄႈႁၢဝ်ႈႁႅင်း တူဝ်ႈလုမ်ႈၾႃႉသေ လူင်ပွင်ၸိုင်ႈထႆး ပိၵ်ႉလၢၼ်ႇလႅၼ်လိၼ်ထႆး-တႆးဝႆႉၸဵမ်မိူဝ်ႈႁၢင်လိူၼ်မၢတ်ႉၶျ်။ တေႃႇထိုင်မိူဝ်ႈၼႆႉယင်းပႆႇပိုတ်ႇၶိုၼ်း။

ၸၢႆးပီးၼႆႉႁဵတ်းၵၢၼ်သူၼ် ယူႇၼႂ်းသူၼ်ပေႃႈလဵင်ႉ။ သင်ဝႃႈ ၽၵ်းတူလႅၼ်လိၼ်ပိုတ်ႇပၼ်ၶိုၼ်းၵေႃႈတေ ပွၵ်ႈၵႂႃႇႁဵတ်း ၵၢၼ်မိူင်းထႆး ၵဵင်းမႆႇၶိုၼ်း ဝႃႈၼႆ။

ၸၢႆးပီး သိုပ်ႇလၢတ်ႈဝႃႈ “ ယူႇတီႈမိူင်းႁဝ်းသေ ႁဵတ်းၵၢၼ်ႁႆႈၵၢၼ်ၼႃးၵေႃႈလႆႈယူႇၶႃႈ။ ၵူၺ်းၵႃႈ မႆႈၸႂ် လုၵ်ႈဢွၼ်ႇတီႈ ၵဵင်းမႆႇၼၼ်ႉၶႃႈဢေႃႈ။ ၶဝ်ယင်းပႆႇပေႉတူဝ်။ သင်ဝႃႈ ငဝ်းလၢႆး တၢင်းပဵၼ်ၼႆႉ လီၶိုၼ်ႈမႃးယဝ်ႉၼႆၸိုင် ၶႃႈတေပွၵ်ႈမိူဝ်း ၶိုၼ်းၶႃႈဢေႃႈ” ဝႃႈၼႆ။

မိူဝ်ႈႁၢင်လိူၼ်မၢတ်ႉၶျ် 2020 ၵွၼ်ႇၼႃႈပွႆးၶၢဝ်းသွၼ်းၼမ်ႉသၢင်းၵျၢၼ်ႇၼၼ်ႉ ႁႅင်းၵၢၼ်တႆး လုၵ်ႉမိူင်းထႆး ပွၵ်ႈမိူင်း တႆး ၼပ်ႉႁူဝ်ႁဵင်။ ယွၼ်ႉပိူဝ်ႈၸဝ်ႈၼႃႈတီႈ သွင်ၸိုင်ႈမိူင်း ပိၵ်ႉၽၵ်းတူလႅၼ်လိၼ်ဝႆႉလႄႈ ဢမ်ႇၸၢင်ႈၶၢမ်ႈမိူဝ်း။ လႆႈၶမ်ဝႆႉ တီႈမႄႈသၢႆပဵၼ် 10 ဝၼ်းပၢႆၵေႃႈမီး။

မိူဝ်ႈၼႆႉ ဝၼ်းတီႈ 23/4/2020 ယၢမ်းၵၢင်ဝၼ်း 11 မူင်းၶိုင်ႈ ၼႂ်းမိူင်းထႆး ၵူၼ်းၸပ်းတၢင်းပဵၼ်ၸိူဝ်ႉမႅင်းၶူဝ်ႊဝိတ်ႉ – 19 မီး 2,839 ၵေႃႉ၊ တၢႆ 50 ၵေႃႉ၊ ယႃၶႅၼ်း 2,430 ၵေႃႉ။ ၼႂ်းလုမ်ႈၾႃႉသမ်ႉ ၵူၼ်းၸပ်းတၢင်းပဵၼ်ၸိူဝ်ႉမႅင်းၶူဝ်ႊဝိတ်ႉ – 19 တင်း မူတ်းမီးၵႂႃႇ 2,639,025 ၵေႃႉ၊ တၢႆ 184,263 ၵေႃႉလႄႈ ယႃၶႅၼ်း 722,150 ၵေႃႉ ယူႇတီႈ Worldometers.info ပိုၼ်ၽၢဝ်ႇ ဢွၵ်ႇဝႆႉ။