ၵၢတ်ႇဢၼ်သိုဝ်ႉၶၢႆ ၽၵ်းၶဵဝ် ၵႆႇ မူ ပူ ပႃ ၶဝ်ႈ ၼိူဝ်ႉ တီႈဝဵင်းမူႇၸေႊၼၼ်ႉ ၵူၼ်းၵပ်ႉၵိုၼ်း ၸၢင်ႈပဵၼ်ၽေးတေႃႇ ၵၢၼ် ၽႄႈၸိူဝ်ႉမႅင်း ၶူဝ်ႊဝိတ်ႉ 19 လႄႈ ပိူဝ်ႈတႃႇတေၵႆယၢၼ် ဢမ်ႇၽႄႈၸပ်းၵၼ်ၼၼ်ႉ ၶၢႆႉၵႂႃႇ ႁဵတ်းၵၢင်ပၢင်ႇ ႁႂ်ႈႁၢင်ႇၵႆၵၼ် တီႈဢေႇသုတ်း ႁူၵ်းထတ်း ဝႃႈၼႆ။

ဝၼ်းတီႈ 21/4/2020 ၾၢႆႇပွင်ၵၢၼ် ဝၢၼ်ႈမူၼ်းၵူၼ်းၵိုၼ်း (ၾၢႆႇလိူမ်ႈလႆႇ) ဝဵင်းမူႇၸေႊ တႄႇပိုတ်ႇၵၢတ်ႇ ႁႂ်ႈၵူၼ်းမိူင်း လႆႈသိုဝ်ႉ/ၶၢႆ ၽၵ်းၶဵဝ် ၵႆႇမူ ပူ ပႃ ၶဝ်ႈ ၼိူဝ်ႉ တီႈပၢင်ႇႁိူဝ်း မိၼ်ၵဝ်ႇ ဝဵင်းမူႇၸေႊ ၸိုင်ႈတႆးပွတ်းႁွင်ႇ။ ဢၼ်လႆႈၸတ်းၵၢတ်ႇ မႂ်ႇတီႈၵၢင်ပၢင်ႇ မီးလူမ်းၶဝ်ႈလူမ်းဢွၵ်ႇလီ ၸိူင်ႉၼႆ ယိူင်းဢၢၼ်း ႁႂ်ႈၵူၼ်းမိူင်း ၵႆယၢၼ်တၢင်းပဵၼ်ၶူဝ်ႊဝိတ်ႉ 19 ဝႃႈၼႆ။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ-“ ၵၢတ်ႇၽၵ်းၶဵဝ်တီႈ မူႇၸေႊတႄႉ တႄႇပိုတ်ႇ ၶၢႆ မိူဝ်ႈၼႆႉၵႂႃႇယဝ်ႉ တႄႇဢဝ် ယၢမ်းၵၢင်ၼႂ် 5 မူင်းၶိုင်ႈ ထိုင် 9 မူင်းၶိုင်ႈၵူၺ်း။ မိူဝ်ႈၼႆႉတႄႉ ၵူၼ်းၵိုၼ်းယူႇ။ တီႈၶၢႆ ၸတ်း ဝႆႉတင်းမူတ်း မီး 500 လွၵ်း” ဝႃႈၼႆ။

ၾၢႆႇလိူမ်ႈလႆႇ ဝဵင်းမူႇၸေႊ ပိုၼ်ၽၢဝ်ႇဝႆႉ ၸဵမ်မိူဝ်ႈဝၼ်းတီႈ 19/4/2020 ဝႃႈ တေၶၢႆႉၵၢတ်ႇၽၵ်းၶဵဝ် ၵႂႃႇၸတ်းတီႈ ပၢင်ႇႁိူဝ်း မိၼ်ၵဝ်ႇ ၼႂ်းဝၼ်းတီႈ 21 ၼႆႉ ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉ တႅမ်ႈဝႆႉဝႃႈ “ ယွၼ်ႉတၢင်းပဵၼ်ၶူဝ်ႊဝိတ်ႉ 19 လၢမ်းၽႄႈႁၢဝ်ႈႁႅင်းသေ တွၼ်ႈတႃႇ တေၵႅတ်ႇၶႄ ႁႄႉၵင်ႈတၢင်းပဵၼ်လႆႈ ယႃႇႁႂ်ႈၵူၼ်း ၶွၼ်ႈတုမ်ၵၼ် ၸင်ႇလႆႈ ၽႅၼ်ၵၢၼ်ၸတ်းၵၢတ်ႇ တီႈတူင်ႈတီႈပၢင်ႇ၊ လိူဝ်ၼၼ်ႉ ၸတ်းပႃး ႁႂ်ႈပႅတ်ႈယုၵ်းယၵ်းပဵၼ်ပၵ်း ပဵၼ်ပိူင် ” ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ယင်းပႃးဝႃႈ ႁႂ်ႈၵူၼ်းသိုဝ်ႉ ၵူၼ်းၶၢႆ ၵူႈၵေႃႉ သႂ်ႇၽႃႈႁူမ်ႇတူမ်းသူပ်းပၢၵ်ႇ ၶူႈလင်၊ ႁႂ်ႈၵူၼ်းၶၢႆ သႂ်ႇပႃးထူင်မိုဝ်းသေ သိုဝ်ႉၶၢႆတေႃႇၵၼ်။ ႁႂ်ႈလႆႈယူႇၶၢႆ ၸွမ်းလွၵ်းပိူင် ဢၼ်ထတ်းတႅၵ်ႈဝႆႉပၼ်။ ၶူဝ်းၶွင် ဢၼ်ဢဝ်မႃးၶၢႆ ၼႂ်းၵၢတ်ႇၼၼ်ႉ တေဢမ်ႇလႆႈၶိုၼ်ႈၵႃႈလိူဝ် ၶၼ်ၵဝ်ႇ။ တေဢမ်ႇလႆႈ ၶွၼ်ႈတုမ်ၵၼ်သေ သိုဝ်ႉၶၢႆ တေလႆႈယူႇႁၢင်ႇ ဢမ်ႇတိတ်းဢမ်ႇဢိူမ်ႈၵၼ် ႁႂ်ႈယူႇႁၢင်ႇၵၼ်၊ ရူတ်ႉ/ၵႃး ရူတ်ႉၶိူင်ႈ တေလႆႈၵိုတ်းတမ်း ပဵၼ်ပၵ်းပဵၼ်ပိူင် ၽႂ်ဢမ်ႇႁဵတ်းၸွမ်း တေၺႃးတူတ်ႈတၢမ်ႇ ဝႃႈၼႆ။

ၸိူင်ႉၼၼ်ၼင်ႇၵဝ်ႇ ၼႂ်းမိူင်းတႆး ၵူႈၸႄႈဝဵင်းၵေႃႈ ၸတ်းႁဵတ်း တမ်းဝၢင်းပၼ် လွင်ႈၵၢတ်ႇၽၵ်း ၶဵဝ်ၵၼ်ဝႆႉ ၵူႈဝဵင်း၊ ၵူဝ် ၵူၼ်းမိူင်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 ၵၼ်။ တေႃႈလဵဝ် ၼႂ်းမိူင်းႁူမ်ႈတုမ်ၼႆႉ ၵူၼ်းၸပ်းတၢင်းပဵၼ် မီး 121 ၵေႃႉ၊ တၢႆ 5 ၵေႃႉ၊ ယႃၶႅၼ်း 7 ၵေႃႉ။

ၸိုင်ႈမိူင်း 210 မိူင်း တင်းလုမ်ႈၾႃႉ တိတ်းၸပ်းတၢင်းပဵၼ်ၶူဝ်ႊဝိတ်ႉ 19 ၼႂ်းဝၼ်းမိူဝ်ႈၼႆႉ မီး 2,522,438 ၵေႃႉလႄႈ လူႉတၢႆ 174,292 ၵေႃႉ၊ ယႃၶႅၼ်း 663,609 ၵေႃႉ ယူႇတီႈဝႅပ်ႊသၢႆႊ worldometers.info ဢွၵ်ႇဝႆႉ။