ၶိူင်ႈၸၢၵ်ႈ တႃႇၵူတ်ႇထတ်းတၢင်းပဵၼ်ၶူဝ်ႊဝိတ်ႉ 19 မီးၸဝ်ႈတႃႇၼ တေလူႇတၢၼ်းပၼ်တႃႇမိူင်းတႆး 2 ၶိူင်ႈ ၵူၺ်းၵႃႈ တိုၵ်ႉ ပႂ်ႉၶေႃႈၸီႉသင်ႇ တင်းၼိူဝ်ယူႇ ၸွင်ႇတေႁပ်ႉ ဢမ်ႇႁပ်ႉ ဝႃႈၼႆ။
ၶိူင်ႈၸၢၵ်ႈ ၵူတ်ႇထတ်းတၢင်းပဵၼ်ၶူဝ်ႊဝိတ်ႉ 19 မီးၸဝ်ႈတႃႇၼ တေသိုဝ်ႉလူႇတၢၼ်းပၼ် ။ ယူႇတီႈလူင်ပွင်ၸိုင်ႈမိူင်းတႆး ၶိုင်ဝႆႉဝႃႈတေဝႆႉတီႈႁူင်းယႃလႃႈသဵဝ်ႈၶိူင်ႈၼိုင်ႈလႄႈ တေဝႆႉတီႈႁူင်းယႃ ၸဝ်ႈၸၢမ်ႇထုၼ်းဝဵင်းတူၼ်ႈတီးၶိူင်ႈၼိုင်ႈ ဝႃႈၼႆ။
ဢူးၸူဝ်းၺုၼ်ႉလုၼ်ႇ ၽူႈၶၢၼ်ပၢၵ်ႇ ၽွင်းလူင်ၾၢႆႇၵၢၼ်ငိုၼ်းလႄႈ ၶူင်းၵၢၼ် (သျှမ်းပြည်နယ်အစိုးရ ပြောခွင့်ရ စီမံကိန်း နှင့် ဘဏ္ဍရေးဝန်ကြီး) ၸႄႈမိူင်းတႆး လၢတ်ႈတီႈၽူႈတွႆႇႁွၵ်ႈဝႃႈ “ တွၼ်ႈတႃႇၼႂ်းမိူင်းတႆးတႄႉ ပဵၼ်ၶၢဝ်ႇလီဢၼ်ၼိုင်ႈ ယဝ်ႉ။ မီးၸဝ်ႈတႃႇၼ တေသိုဝ်ႉၶိူင်ႈၸၢၵ်ႈၵူတ်ႇထတ်းၸိူဝ်ႉမႅင်းၶူဝ်ႊဝိတ်ႉ 19 ။ ယိုၼ်ႈမိုဝ်းမႃး တႃႇလူႇတၢၼ်းယဝ်ႉ။ ၸၢၵ်ႈ ၼိုင်ႈလုၵ်ႈ တေတူၵ်းယူႇမွၵ်ႈ 4 ႁဵင်သႅၼ်ပျႃး” ဝႃႈၼႆ။
ၽူႈမီးၼမ်ႉၸႂ်ၸေႇတႃႇၼႃႇ ဢၼ်တေလူႇတၢၼ်းၶိူင်ႈၸၢၵ်ႈၼၼ်ႉ တေပဵၼ် လုၵ်ႈႁဵၼ်းၵဝ်ႇတီႈ ႁူင်းႁဵၼ်းသိလ်ႁႃႈသဵၼ်ႈ (ငါးပါးသီလ ဘုရားစာသင်ကျောင်းသားဟောင်း) လုၵ်ႈၼိုင်ႈလႄႈ ၶွမ်ႊမတီႊ ႁႃငိုၼ်းၵွင်ၵၢင် ပုတ်ႉထၽႃသႃ မႁႃယႃၼ ယုၼ်ႊၼၢၼ်ႊ (မဟာယန ယူနန် ဗုဒ္ဓဘာသာ ရန်ပုံငွေ ရှာဖွေ ရေးကော်မတီ) လုၵ်ႈၼိုင်ႈ ဝႃႈၼႆ။
ဢူးၸူဝ်းၺုၼ်ႉလုၼ်ႇ လၢတ်ႈဝႃႈ “ တေႁပ်ႉ ဢမ်ႇႁပ်ႉၶိူင်ႈၸၢၵ်ႈၼႆႉၼႆၼၼ်ႉ ႁဝ်းၶႃႈ ပႂ်ႉၶေႃႈၸီႉသင်ႇ တီႈၽွင်းလူင် ပၢႆးယူႇလီ မိူင်းႁူမ်ႈတုမ်ယူႇ။ သင်ဝႃႈ ၶဝ်ၸဝ်ႈပၼ်ၶႂၢင်ႉယဝ်ႉၼႆၸိုင် ၶိူင်ႈၸၢၵ်ႈၼၼ်ႉ တေလုၵ်ႉတၢင်းမိူင်းယုၼ်ႊၼၢၼ်ႊ ၸိုင်ႈမိူင်းၶႄႇသေ သူင်ႇၶဝ်ႈမႃးတၢင်းဝဵင်းလိူဝ်ႇၵမ်းလဵဝ်” ဝႃႈၼႆ။
ယၢမ်းလဵဝ် တႃႇတေၵူတ်ႇထတ်း တၢင်းပဵၼ်ၶူဝ်ႊဝိတ်ႉ 19 ၼႆႉ လႆႈသူင်ႇၵႂႃႇ ဝဵင်းတႃႈၵုင်ႈ။ ၽူႈႁၢပ်ႇၵၢၼ်ပၢႆးယူႇလီ 1 ၵေႃႉလႆႈႁပ်ႉဢဝ်ပုၼ်ႈၽွၼ်းသေ လႆႈၵႂႃႇၸွမ်းၶိူင်ႈမိၼ်။
ၵူၺ်းၵႃႈ ၵူၼ်းၶၢႆဝႂ်ၶိူင်ႈမိၼ် တီႈတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ သၢႆၵၢၼ်မိၼ် ၵမ်ႇပေႃးၸသမ်ႉ တေမိၼ်ထႅင်ႈ ဝၼ်းတီႈ 23 တင်း 29 သွင်ဝၼ်းၵူၺ်းတေၵိုတ်းလိုဝ်ႈယဝ်ႉ ယွၼ်ႉတၢင်းပဵၼ်ၶူဝ်ႊဝိတ်ႉ 19 လၢမ်းၽႄႈ။ သၢႆၵၢၼ်မိၼ် တၢင်ႇဢၼ်တႄႉ ၵိုတ်းလိုဝ်ႈဝႆႉၸဵမ်လႂ်ယဝ်ႉ ဝႃႈၼႆ။
တေႃႇထိုင်ဝၼ်းမိူဝ်ႈၼႆႉ ၼႂ်းမိူင်းတႆးၼႆႉ ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 တင်းမူတ်းမီး 6 ၵေႃႉယဝ်ႉ။ ႁူမ်ႈပႃး ၼႂ်းမိူင်းႁူမ်ႈ တုမ် တေမီး 121 ၵေႃႉ ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဢွၵ်ႇဝႆႉ။
