လူင်ပွင်ၸိုင်ႈ မိူင်းႁူမ်ႈတုမ် ပိုၼ်ၽၢဝ်ႇမၢႆမီႈ ႁၢမ်ႈဢွၵ်ႇၼွၵ်ႈႁိူၼ်း ၶၢဝ်းယၢမ်းၵၢင်ၶိုၼ်း၊ ၵူၼ်းမိူင်းတႆး ႁၼ်လီပဵၼ်လၢႆး ၵႅတ်ႇၶႄႁႄႉၵင်ႈတၢင်းပဵၼ်လႄႈ လွင်ႈႁူမ်ႇလူမ်ႈၸွမ်း ဝႃႈၼႆ။

လူင်ပွင်ၸိုင်ႈဢွၵ်ႇလိၵ်ႈပိုၼ်ၽၢဝ်ႇဝႃႈ တင်ႈဢဝ်ဝၼ်းတီႈ 20/4/2020 ၼႆႉၵႂႃႇ ႁၢမ်ႈၵူၼ်းမိူင်းဢွၵ်ႇၼွၵ်ႈႁိူၼ်း ၶၢဝ်း ယၢမ်းၵၢင်ၶိုၼ်း 10 မူင်း ထိုင် 4 မူင်းၵၢင်ၼႂ် တႃႇၶၢဝ်းတၢင်း 1 လိူၼ်။ ၶေႃႈႁၢမ်ႈၼႆႉ ပႃးၼႂ်းမိူင်းတႆး တႃႇ 48 ၸႄႈဝဵင်း။ ယိူင်းဢၢၼ်းတႃႇၵႅတ်ႇၶႄ ႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၼင်ႇႁိုဝ် ပေႃးတေဢမ်ႇလၢမ်းၽႄႈႁၢဝ်ႈႁႅင်း ၼႂ်းမိူင်းတႆး ဝႃႈၼႆ။

ၸၢႆးယီႈ ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ လီၶႃႈဢေႃႈ ဢၼ်လူင်ပွင်ၸိုင်ႈ ၸီႉသင်ႇပူင်ၵႂၢမ်း ႁၢမ်ႈတပ်ႉ ဢွၵ်ႇ ၼွၵ်ႈႁိူၼ်း ၵၢင်ၶမ်ႈ ၵၢင်ၶိုၼ်းၼႆႉ။ ၵူၼ်းလၵ်ႉ ၵူၼ်းၸူၼ် ၵူၼ်းႁၢႆႉၶဝ် တေဢမ်ႇၸၢင်ႈထဝ်ႇၵႂႃႇမႃး ၸွမ်းၼႂ်းၵိဝ်ႇ ၼႂ်းဝဵင်း။ ထႅင်ႈၾၢႆႇၼိုင်ႈၵေႃႈ ၼင်ႇႁိုဝ် ပေႃးတေဢမ်ႇတိတ်းၸပ်းတၢင်းပဵၼ်ၼၼ်ႉ ပဵၼ်လၢႆးတၢင်းႁႄႉၵင်ႈ လီဢၼ်ၼိုင်ႈ ၵွပ်ႈၼၼ်လႄႈႁဝ်းၶႃႈတႄႉ ႁၼ်လီၸွမ်းဢေႃႈ လွင်ႈႁၢမ်ႈ ဢွၵ်ႇႁိူၼ်းၵၢင်ၶိုၼ်းၼႆႉ” ဝႃႈၼႆ။

ယၢမ်းလဵဝ် လွင်ႈတၢင်းပဵၼ်လၢမ်းၽႄႈၸပ်းၵၼ်ၼႆႉ ၾၢႆႇပၢႆးယူႇလီမၵ်းမၼ်ႈဝႃႈပဵၼ်ၸၼ်ႉထူၼ်ႈ 3။ လုၵ်ႉတီႈၵူၼ်းထီႉ 2 ဢၼ်တိတ်းၸပ်းမႃးတီႈၵူၼ်းလုၵ်ႉၼွၵ်ႈမိူင်းမႃးၼၼ်ႉ ၶိုၼ်းမႃးၽႄႈပၼ်ၵူၼ်းၼႂ်းတူင်ႇဝူင်းပိုၼ်ႉတီႈ ၵေႃႉထီႉ 3 ။ ၵွပ်ႈ ၼၼ်လႄႈ ယူႇတီႈၵူၼ်းၼႂ်းဝၢၼ်ႈလဵဝ်ၵၼ် ပီႈၼွင်ႉၵၼ် ၵႂႃႇသူႇၸႂ်းၵူၼ်းဢမ်ႇယူႇလီ၊ သူႇၸႂ်းဢႅဝ်ႇပီႈၼွင်ႉ ၵူၼ်းႁူႉၸၵ်းမိုတ်ႈၵိုဝ်းၵၼ် ၸိူဝ်းၼႆႉ ၾၢႆႇပၢႆးယူႇလီ ႁၢမ်ႈဝႆႉၼၵ်းၼႃ။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ“ ၵူၼ်းႁဝ်းၼႆႉ ၽႂ်ၵေႃႈ ဢမ်ႇႁူႉၵၼ်ၶႃႈလူး ဝႃႈၽႂ်မီးတၢင်းပဵၼ် ဢမ်ႇမီးတၢင်းပဵၼ်ၶူဝ်ႊဝိတ်ႉ 19 ဢၼ်ဝႃႈၼၼ်ႉ ၵွပ်ႈၼႆလႄႈ လွင်ႈလူင်ပွင်ၸိုင်ႈဢွၵ်ႇလိၵ်ႈႁၢမ်ႈတပ်ႉ ၸိူင်ႉၼႆၼႆႉ ႁဝ်းၶႃႈႁၼ်လီၸွမ်းၶႃႈ။ ဢမ်ႇၸႂ်ႈဝႃႈ ႁႄႉၵင်ႈ တၢင်းပဵၼ်ဢၼ်ၼႆႉဢၼ်လဵဝ်ၵူၺ်း ႁႄႉၵင်ႈပႃးထႅင်ႈလၢႆလၢႆ လွင်ႈၶႃႈဢေႃႈ” ဝႃႈၼႆ။

မၼ်းၸၢႆးလၢတ်ႈဝႃႈ ၶမ်ႈဝႃး ၶမ်ႈႁႅၵ်ႈ ဢၼ်ဢွၵ်ႇမၢႆမီႈ ႁၢမ်ႈဢွၵ်ႇႁိူၼ်းယၢမ်းၵၢင်ၶမ်ႈၵၢင်ၶိုၼ်းၼႆႉ ၼႂ်းဝၢၼ်ႈၼႂ်းဝဵင်း ယဵၼ် သီႇၶႅမ်ႉလႅပ်ႈလီငၢမ်းတႄႉတႄႉ ဝႃႈၼႆ။

“ၶႅမ်ႉၶႃႈဢေႃႈ မိူၼ်ၼင်ႇ ၵၢင်ၶမ်ႈ ၵူၼ်းၵႂႃႇ ၵိၼ်လဝ်ႈ/ ပီႇယႃႇ ၵႂႃႇၼင်ႈၶမ်ႁၢၼ်ႉၶၢႆထိုင်လိုၵ်းၵေႃႈတေဢမ်ႇမီးယဝ်ႉ။ ၵိၼ်လဝ်ႈမဝ်းၽိတ်းမေႃးၵၼ် ၵေႃႈတေဢမ်ႇမီး။ ၵူၼ်းတေၵႂႃႇၵိုၼ်းၶွၼ်ႈ တီႈႁၢၼ်ႉၶၢႆတၢင်းၵိၼ်ၶဝ်ႈ ၽၵ်းၵေႃႈတေ ဢမ်ႇမီး၊ ၵၢၼ်တေႃႇလွင်းၵေႃႈ တေဢမ်ႇမီး ၊ ၵၢၼ်မႃးသိုဝ်ႉၶၢႆ/ ၵမ်ႉ ၶူဝ်းတေႃႇလွင်းသုမ်း ၸိူဝ်းၼႆႉၵေႃႈတေဢမ်ႇမီး ၼႆႉတႄႉ ပၼ်ႁႃတေလူတ်းယွမ်းၵႂႃႇတႄႉတႄႉ ” ၸၢႆးႁိၼ်လဵၵ်းလၢတ်ႈၼႄၼင်ႇၼႆ။

ၸႄႈဝဵင်းမူႇၸေႊၼႆႉ ပဵၼ်ဝဵင်းတိတ်းၸပ်းလႅၼ်လိၼ် တႆး – ၶႄႇ ဝဵင်းၼိုင်ႈသေ ၵူၼ်းမိူင်းလုၵ်ႉတၢင်ႇတီႈသီႇလႅၼ် မႃးယူႇ ၵေႃႈၼမ် ၸုမ်းယိပ်းၵွင်ႈၵၢင်ႇၵေႃႈၼမ်၊ ၸုမ်းပျီႇတူႉၸိတ်ႉၵေႃႈၼမ်။

မိူၼ်ၼၼ်ၼင်ႇၵဝ်ႇ တီႈၸႄႈဝဵင်းတႃႈၶီႈလဵၵ်း လႅၼ်လိၼ်တႆး – ထႆးၵေႃႈ ၶမ်ႈဝႃးၼႆႉ ၽူႈမီးပုၼ်ႈၽွၼ်းလူင်းၵူတ်ႇထတ်း ၸွမ်းၼႂ်းၵိဝ်ႇၼႂ်းပွၵ်ႉလႄႈ ၼိူဝ်သဵၼ်ႈတၢင်းလူင်ၸိူဝ်းၼႆႉ ၶႅမ်ႉလႅပ်ႈလီ – ဝႃႈၼႆ

“တီႈတႃႈၶီႈလဵၵ်း ႁဝ်းၶႃႈတႄႉ ယူႇတီႈၽူႈမီးပုၼ်ႈၽွၼ်း ၽူႈၵွၼ်းပွၵ်ႉဢိူင်ႇလႄႈ ၸုမ်းတူင်ႉၼိုင်တူင်ႇဝူင်းၵူၼ်း ႁူမ်ႈၵၼ်သေ ပွၵ်ႉလႂ် ပွၵ်ႈၼၼ်ႉ ၸႅၵ်ႇၵၼ် ပဵၼ်လၢႆမူႇ လၢႆၸုမ်း လူင်းပိုၼ်ႉတီႈၵူတ်ႇထတ်း ၸွမ်းၼႂ်းၵိဝ်ႇ ၼႂ်းသွႆး ၵူၼ်းၶွၼ်ႈတုမ်ၵၼ် ပဵၼ်မူႇပဵၼ်ၽုင်ၸိူဝ်းၼၼ်ႉ ႁႂ်ႈၶဝ်ၶဝ်ႈၼႂ်းႁေႃၼႂ်းႁိူၼ်းၵၼ် မိူဝ်ႈဝႃႈ ဝၼ်းတီႈ 20 တႄႉပၼ်ႇလဵပ်ႈပၼ် ၾၢင်ႉၵၼ်ၵႂႃႇၶႃႈ” ၵူၼ်းပွၵ်ႉသၢႆးၶၢဝ် ၽူႈတူင်ႉၼိုင်ၼႂ်းတူင်ႇဝူင်းတႆး ၵေႃႉၼိုင်ႈ လၢတ်ႈၼင်ႇၼႆ။

သင်ဝႃႈ ၽူႈလႂ်ၽႂ်ဢမ်ႇႁဵတ်းၸွမ်းပၵ်းပိူင်မၢႆမီႈသေ ထူပ်းႁၼ်မီးၼွၵ်ႈႁိူၼ်းဝၢႆးလင် 10 မူင်းၵၢင်ၶိုၼ်းၼၼ်ႉ တေတီႉၺွပ်းပၼ်တူတ်ႈတၢမ်ႇ တူၵ်းၶွၵ်ႈ 1 လိူၼ် ထိုင် 6 လိူၼ် ၸၢႆးသႅင် ၽူႈၶဝ်ႈၸုမ်းၾၢႆႇႁူမ်ႇလူမ်ႈဝၢၼ်ႈဢိူင်ႇ ၼႂ်းတႃႈၶီႈလဵၵ်း လၢတ်ႈၼႄၼင်ႇၼႆ။