ၵၢၼ်ပၢႆးမၢၵ်ႈမီး လႅၼ်လိၼ်တႆး – ၶႄႇ တုမ်ႉတိူဝ်ႉႁႅင်း ယွၼ်ႉပိၵ်ႉဢိုတ်းၽၵ်းတူ ၶဝ်ႈဢွၵ်ႇလႅၼ်လိၼ် တႃႇႁႄႉၵင်ႈၶူဝ်ႊဝိတ်ႉ 19 ။
လူင်ပွင်ၸိုင်ႈမိူင်းၶႄႇ ၸီႉသင်ႇဢိုတ်းၽၵ်းတူၶဝ်ႈဢွၵ်ႇၸွမ်းလႅၼ်လိၼ် တႆး – ၶႄႇ မိူၼ်ၼင်ႇ တၢင်းပွတ်းမူႇၸေႊ၊ ၼမ်ႉ ၶမ်း ၼႂ်းၸိုင်ႈတႆးပွတ်းႁွင်ႇ တႄႇဢဝ် ဝၼ်းတီႈ 1/4/2020 တေႃႇထိုင် ဝၼ်းတီႈ 21/4/2020 ၼႆႉ ၶၢဝ်းတၢင်းမီး 20 ဝၼ်းပၢႆ တုမ်ႉတိူဝ်ႉၵၢၼ်ပၢႆးမၢၵ်ႈမီးၵူႈၸၼ်ႉၵူႈထၢၼ်ႈ ၵူၼ်းၼႂ်းပိုၼ်ႉတီႈလၢတ်ႈ။
ၸၢႆးမၢဝ်း ၸဝ်ႈၶွင်ႁူင်းဢိတ်ႇလိၵ်ႈၽိတ်ႈမွၵ်ႇ တီႈမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ တီႈမူႇၸေႊႁဝ်းၶႃႈၼႆႉ ၵၢၼ်ပၢႆး မၢၵ်ႈမီးတႄႉ တုမ်ႉတိူဝ်ႉၵၼ်ၵူႈဢၼ်ယဝ်ႉၶႃႈ။ တင်ႈတႄႇပိၵ်ႉၽၵ်းတူၶဝ်ႈဢွၵ်ႇမိူင်းမႃးၼႆႉ။ တေႃႈၼင်ႇ ၶႃႈႁဝ်းႁဵတ်း လိၵ်ႈၽိတ်ႈမွၵ်ႇၼႆႉ လႆႈၵိုတ်းယင်ႉၵၢၼ်မႃး မီးၶၢဝ်းတၢင်း 2 လိူၼ်ပၢႆယဝ်ႉ။ ဢမ်ႇမီးၵူၼ်းမႃးႁဵတ်း လိၵ်ႈၽိတ်ႈမွၵ်ႇ ယွၼ်ႉပိူဝ်ႈဢမ်ႇၸၢင်ႈႁဵတ်းပွႆးၼၼ်ႉၶႃႈၼႃႇ” ဝႃႈၼႆ။
ယွၼ်ႉပိူဝ်ႈဢိုတ်းၽၵ်းတူမိူင်းၼႆႉသေ ၶူဝ်းၸႂ်ႉ ၶူဝ်းသွႆ ၶူဝ်းၵိၼ်ၶူဝ်းယႅမ်ႉ ပႃးၸဵမ်ၽၵ်းယိူဝ်ႈၼၢင်းၶဵဝ် ဢမ်ႇၸၢင်ႈ တေႃႉ ဢဝ်တၢင်းၾင်ႇမိူင်းၶႄႇ ၶဝ်ႈမႃးၶၢႆတၢင်းမူႇၸေႊ ဝႃႈၼႆ။
လုင်းသႅင်ၶမ်းႁိူင်း ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ တင်ႈတႄႇၸဝ်ႈၼႃႈတီႈၶႄႇ ပိၵ်ႉၽၵ်းတူၶဝ်ႈဢွၵ်ႇမိူင်းၼႆႉ မႃးသေ ၽၵ်းယိူဝ်ႈလၢင်းၶဵဝ် ဢၼ်တေႃႉဢဝ်တၢင်းမိူင်းၶႄႇ မႃးၶၢႆတၢင်းၼႆႉၵေႃႈဢမ်ႇလႆႈယဝ်ႉ။ ၶူဝ်းၼုင်ႈတၢင်းဝႆၵေႃႈ ဢမ်ႇၸၢင်ႈဢဝ်မႃးၶၢႆ၊ ၵူၼ်းသိုဝ်ႉၵေႃႈဢမ်ႇမီး တၢင်းမူႇၸေႊႁဝ်းၶႃႈၼႆႉ တေလႆႈဝႃႈတုမ်ႉတိူဝ်ႉ ၵၢၼ်ပၢႆးမၢၵ်ႈမီးတႄႉတႄႉဝႃႈဝႃႈၶႃႈယဝ်ႉ”ဝႃႈၼႆ။
ယွၼ်ႉတၢင်းပဵၼ်ၶူဝ်ႊဝိတ်ႉ 19 လၢမ်းၽႄႈၸွတ်ႇတူဝ်ႈၼႂ်းလုမ်ႈၾႃႉႁၢဝ်ႈႁႅင်းၼႆႉသေ ၵူၼ်းမိူင်းမူႇၸေႊ ဢမ်ႇဢွၵ်ႇႁိူၼ်း ယေးၵၼ် ၸွမ်းၵၢတ်ႇမူႇၸေႊၵေႃႈ ဢမ်ႇမီးၵူၼ်းသိုဝ်ႉၶၢႆၵၼ် ၵိုၼ်းၶွၼ်ႈမိူၼ်မိူဝ်ႈၵူႈပွၵ်ႈယဝ်ႉ ဝႃႈၼႆ။
လုင်းသႅင်ၶမ်းႁိူင်း လၢတ်ႈဝႃႈ “ ၸွမ်းၼႂ်းၵၢတ်ႇ ၸွမ်းၵိဝ်ႇဝဵင်းၵေႃႈ ၵူၼ်းဢမ်ႇၵိုၼ်းမိူၼ်မိူဝ်ႈၵူႈပွၵ်ႈယဝ်ႉ။ ယဵၼ်သီႇလူင်ဝႆႉ ၶႃႈယဝ်ႉ။ ယွၼ်ႉၵူၼ်းမိူင်းႁဝ်းၶႃႈ ဢွၼ်ၵၼ်ယူႇၼႂ်းႁိူၼ်းယေးၽႂ်မၼ်းသေ ဢမ်ႇၵႂႃႇလႂ်ၵၼ်ယဝ်ႉ။ ယွၼ်ႉၵူဝ်ၸပ်းတၢင်း ပဵၼ်ၶူဝ်ႊဝိတ်ႉ 19 ၼႆႉယဝ်ႉ” ဝႃႈၼႆ။
လွင်ႈၶူဝ်းၵုၼ်ႇ ဢၼ်လုၵ်ႉတၢင်းမိူင်းႁူမ်ႈတုမ် တေႃႉသူင်ႇၶဝ်ႈတၢင်းမိူင်းၶႄႇတႄႉ တေႃႉၶဝ်ႈယူႇၵူႈဝၼ်း ပဵၼ်ၵၢၼ်ယူႇ ဝႃႈၼႆ။
ၸၢႆးမၢဝ်း လၢတ်ႈဝႃႈ “ လွင်ႈၶူဝ်းၵုၼ်ႇ ဢၼ်လုၵ်ႉတၢင်းမိူင်းႁူမ်ႈတုမ်သေ တေႃႉၶဝ်ႈၵႂႃႇတၢင်းမိူင်းၶႄႇတႄႉ ပၼ်သူင်ႇၶဝ်ႈ ယူႇ။ ၵူၺ်းၵႃႈ ၵူၼ်းႁေႃႈၵႃး ၵူၼ်းၸွမ်းၵႃးတႄႉ ဢမ်ႇပၼ်ၶဝ်ႈ။ ၾၢႆႇၶႄႇပွႆႇၵူၼ်းၶဝ်မႃးႁေႃႈၶဝ်ႈၵႂႃႇပၼ်ၶႃႈဢေႃႈ” ဝႃႈၼႆ။
တေႃႈလဵဝ် ၼႂ်းမိူင်းႁူမ်ႈတုမ်ၼႆႉ ၵူၼ်းၸပ်းတၢင်းပဵၼ် ၶူဝ်ႊဝိတ်ႉ 19 တင်းမူတ်းမီးၵႂႃႇ 119 ၵေႃႉ၊ လူႉတၢႆ 5 ၵေႃႉ၊ ယႃၶႅၼ်း 7 ၵေႃႉယဝ်ႉ ဝႃႈၼႆ။
ၼႂ်းၵူၼ်းပဵၼ် 119 ၵေႃႉၼၼ်ႉ ပႃးၵူၼ်းမိူင်းတႆး 5 ၵေႃႉ။ ၼႂ်းၼၼ်ႉ ၵူၼ်းတႃႈၶီႈလဵၵ်း 2 ၵေႃႉ၊ ၵူၼ်းမိူင်းၽျၢၵ်ႈ 1 ၵေႃႉ၊ ၵူၼ်းၵျွၵ်ႉမႄး 1 ၵေႃႉလႄႈ ၵူၼ်းတူၼ်ႈတီး 1 ၵေႃႉ ဝႃႈၼႆ။