ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 လၢမ်းၽႄႈမီးၼမ်မႃးၵူႈမိုဝ်ႉၵူႈဝၼ်းလႄႈ ၵၢတ်ႇလူင် ၼႂ်းၸႄႈဝဵင်း မိူင်းတႆး လၢႆလၢႆဝဵင်း ဢမ်ႇၵိုၼ်းၶွၼ်ႈမိူၼ်မိူဝ်ႈၵူႈပွၵ်ႈ မီးၵူၼ်းၶၢႆ ဢမ်ႇမီးၵူၼ်းသိုဝ်ႉ။

ဝၼ်းတီႈ 19/4/2020 ၵၢတ်ႇလူင် ဝဵင်းသီႇပေႃႉ ၸိုင်ႈတႆးပွတ်းႁွင်ႇတႄႇပိုတ်ႇပၼ်ၵူၼ်းမိူင်း သိုဝ်ႉၶၢႆတေႃႇၵၼ်ၶိုၼ်း တႄႇဢဝ် ယၢမ်းၵၢင်ၼႂ် 6 မူင်း ထိုင် 1 မူင်းဝၢႆးဝၼ်း။ ၵူၺ်းၵႃႈ ၵူၼ်းဢမ်ႇၵိုၼ်းၶွၼ်ႈ မိူၼ်မိူဝ်ႈၵူႈပွၵ်ႈယဝ်ႉ ဝႃႈၼႆ။

ၸၢႆးလၢဝ်သႅင် ၽူႈၶဝ်ႈၸုမ်းပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၵၢတ်ႇလူင်တီႈသီႇပေႃႉႁဝ်းၶႃႈ ၼႆႉ တႄႇပိုတ်ႇၶိုၼ်းမိူဝ်ႈဝႃး ဝၼ်းတီႈ 19 ၶႃႈ။ လႆႈဢိုတ်း/ ပိၵ်ႉၵႂႃႇၽွင်းၶၢဝ်းသွၼ်းၼမ်ႉၼႆႉ တင်းမူတ်း 6 ဝၼ်းၶႃႈဢေႃႈ။ တႄႇပိုတ်ႇပၼ်ၵူၼ်းၶဝ်ႈသိုဝ်ႉၸၢႆႇၵၼ်တႄႉ ယၢမ်းၵၢင်ၼႂ် 6 မူင်းထိုင် 1 မူင်းဝၢႆးဝၼ်းၵူၺ်းၶႃႈ တေႃႈလဵဝ်ၼႆႉ” ဝႃႈၼႆ။

ယွၼ်ႉတၢင်းပဵၼ်ၶူဝ်ႊဝိတ်ႉ 19 ၼႆႉသေ ၵူၼ်းဢမ်ႇႁတ်းဢွၵ်ႇႁိူၼ်း ဢွၵ်ႇယေး။ ၾၢႆႇၼိုင်ႈၵေႃႈ ယွၼ်ႉပိူဝ်ႈမၢႆမီႈ ဢမ်ႇလႆႈ ၶွၼ်ႈတုမ်ၵၼ် 5 ၵေႃႉၶိုၼ်ႈၼိူဝ်ၵေႃႈပႃး။ ယွၼ်ႉၼၼ်လႄႈ ၵၢတ်ႇၵေႃႈဢမ်ႇၵိုၼ်းလႆႈ ဝႃႈၼႆ။

ၸၢႆးလၢဝ်သႅင်လၢတ်ႈဝႃႈ “ ၵူႈပွၵ်ႈတႄႉ ၵၢတ်ႇလူင်ၼႆႉ တႄႇပိုတ်ႇ ၵၢင်ၼႂ် 6 မူင်း ထိုင် 4 မူင်းၶိုင်ႈဝၢႆးဝၼ်း။ ယၢမ်းလဵဝ်တႄႉ ပၼ်ၶၢႆထိုင် ဝၢႆးဝၼ်း 1 မူင်းၵူၺ်းယဝ်ႉ။ ထႅင်ႈၾၢႆႇ ၼိုင်ႈၵေႃႈ ႁၢၼ်ႉၶၢႆၼမ်ႉၼဵင်ႈၸိူဝ်းၼႆႉၵေႃႈ ဢမ်ႇပၼ်ၵူၼ်းမႃး ၼင်ႈ ၵိၼ်ယဝ်ႉ။ ႁႂ်ႈသႂ်ႇထူင်ဢဝ် မိူဝ်းၵိၼ်တီႈႁိူၼ်းၵူၺ်း” ဝႃႈၼႆ။

ၼွၵ်ႈလိူဝ်ၼၼ်ႉ ၼႂ်းမိူင်းတႆး ၵူႈၸႄႈဝဵင်း ယူႇတီႈၽူႈမီးပုၼ်ႈၽွၼ်း ၼႂ်းၸႄႈဝဵင်းလႂ် ၸႄႈဝဵင်းၼၼ်ႉ ၸတ်းၵၢၼ်ၶပ်းၶိုင်ပၼ် ၵၢတ်ႇၶၢႆၽၵ်းၶဵဝ် ၼင်ႇႁိုဝ် တေဢမ်ႇလႆႈယူႇ တိတ်းၸပ်းၵၼ်သေ သိုဝ်ႉၶၢႆၵၼ်။

ၵူၼ်းၼုမ်ႇလၢႆးၶႃႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ တီႈလၢႆးၶႃႈႁဝ်းၶႃႈတႄႉ ၵၢတ်ႇလူင်ၼႆႉ ၶဝ်ဢိုတ်း/ ပိၵ်ႉၽွင်း ၶၢဝ်းသၢင်းၵျၢၼ်ႇၼႆႉ 5 ဝၼ်း။ ပိုတ်ႇၶိုၼ်းမိူဝ်ႈဝႃးယဝ်ႉ။ တွၼ်ႈတႃႇ ၵၢတ်ႇၽၵ်းၶဵဝ်တႄႉ ၶၢႆႉၵႂႃႇပိုတ်ႇတီႈသူၼ်မွၵ်ႇ တိုၵ်ႉ တႄႇပိုတ်ႇၼႂ်ၼႆႉၵူၺ်းၶႃႈ။ ၵူၼ်းသိုဝ်ႉၶၢႆတႄႉ ဢမ်ႇပေႃးၵိုၼ်းၶႃႈ ၵူဝ်တၢင်းပဵၼ်ၵၼ်ၼႆႉၶႃႈယဝ်ႉ” ဝႃႈၼႆ။

ၼွၵ်ႈလိူဝ်ၼၼ်ႉ တီႈဝဵင်းလွႆလႅမ်၊ ပၢင်လူင် ၵေႃႈမိူၼ်ၼၼ် ၼိုင်ႈႁိူၼ်းလႂ် မီးသုၼ်ႇၶဝ်ႈၵၢတ်ႇ ၸၢႆႇၵၢတ်ႇ တႃႇၵူၼ်းၵေႃႉ ၼိုင်ႈၵူၺ်း။ တေလႆႈမီးဝႂ်ၶႂၢင်ႉၶဝ်ႈၵၢတ်ႇ သင်ဝႃႈ ဢမ်ႇမီးဝႂ် ၶႂၢင်ႉၼၼ်ႉၸိုင် တေဢမ်ႇလႆႈၶဝ်ႈၵၢတ်ႇ၊ ပေႃးတေၵႂႃႇၵၢတ်ႇၸိုင် တေလႆႈသႂ်ႇၽႃႈတူမ်းသူပ်း၊ တေလႆႈသႂ်ႇထူင်မိုဝ်း။ ယဝ်ႉၵေႃႈ ဝႂ်ၶဝ်ႈၵၢတ်ႇၼၼ်ႉ တေလႆႈပဵၼ်သုၼ်ႇႁိူၼ်းလႂ် ၵေႃႉ ၼၼ်ႉၵူၺ်း တေဢမ်ႇလႆႈ သိုပ်ႇယိုၼ်ႈပၼ်တၢင်ႇၵေႃႉၵႂႃႇထႅင်ႈ ဝႃႈၼႆ။

တီႈဝဵင်းလၢင်းၶိူဝ်းၵေႃႈ ၸဝ်ႈၽၵ်းၶဵဝ်ၼၼ်ႉ ဢမ်ႇပၼ်ၶၢႆၵၢင်ၵၢတ်ႇယဝ်ႉမိူၼ်ၵၼ်။ ၶၢႆႉၵႂႃႇတမ်းဝၢင်းပၼ်တီႈၶၢႆ ႁိမ်းၾင်ႇ ၼမ်ႉတဵင်း၊ ၸဝ်ႈၼိုင်ႈလႄႈ ၸဝ်ႈၼိုင်ႈ ယူႇႁၢင်ႇၵႆၵၼ်မွၵ်ႈ 6 ထတ်း ၸွမ်းၼင်ႇၾၢႆႇပၢႆးယူႇလီပၼ်တၢင်းၶႆႈၸႂ်ဝႆႉ။