ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSPP/SSA သင်ႇႁႂ်ႈဢိုတ်း/ ပိၵ်ႉ ႁၢၼ်ႉတၢင်းၶၢႆ ၵူႈဢၼ် တႃႇႁႂ်ႈတၢင်း ပဵၼ်ၶူဝ်ႊဝိတ်ႉ 19 တေဢမ်ႇၽႄႈၸပ်းလၢမ်းၸူးၵၼ် ဝႃႈၼႆ။
ဝၼ်းတီႈ 18/4/2020 ယူႇတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ဢုပ်ႇဢူဝ်းလႆႈၸႂ် တႅပ်း တတ်းၵၼ်သေ ၸဵမ်ႁၢၼ်ႉၶၢႆၶဝ်ႈၽၵ်း၊ ၶဝ်ႈသွႆးလႄႈ ႁၢၼ်ႉၶၢႆၼမ်ႉၼဵင်ႈ ၸိူဝ်းမီးၼႂ်းဝဵင်းမႂ်ႇဝၢၼ်ႈႁႆးတင်းသဵင်ႈ တေ လႆႈဢိုတ်း/ ပိၵ်ႉ ဝႆႉမူတ်း ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ တႅမ်ႈဝႆႉဝႃႈ ယူႇတီႈၾၢႆႇလိူမ်ႈလႆႇ ဝဵင်းမႂ်ႇဝၢၼ်ႈႁႆးသေ ၸီႉသင်ႇၸိူဝ်း ပဵၼ်ႁၢၼ်ႉသႅင်ႇတၢင်းၶၢႆ မိူၼ်ၼင်ႇ ႁၢၼ်ႉၶၢႆၶဝ်ႈၽၵ်း၊ ၶဝ်ႈသွႆး၊ ၼမ်ႉၼဵင်ႈ၊ ၵေႃႇၾီႇ၊ ၼမ်ႉဝၢၼ်၊ ၽၵ်းၵူဝ်ႈၽၵ်းၶူဝ်ႈၽၵ်ႈပိင်ႈ၊ လဝ်ႈ၊ ပီႇယႃႇ ၸိူဝ်း ၼႆႉ တေလႆႈႁပ်းပိၵ်ႉဝႆႉ တေဢမ်ႇလႆႈပိုတ်ႇၶၢႆလႃးလႃး – ဝႃႈၼႆ။
ၸၢႆးၼုမ်ႇ ၵူၼ်းဝၢၼ်ႈႁႆး လၢတ်ႈဝႃႈ – “ၵၢတ်ႇတႄႉ ပိူၼ်ႈၶၢႆႉၵႂႃႇဝႆႉ ၾၢႆႇတူၵ်းဝၢၼ်ႈႁႆးၶႃႈၼေႈ။ ၸဝ်ႈၼႃႈတီႈပိူၼ်ႈၸတ်း ဝႆႉပၼ် ႁႂ်ႈယူႇႁၢင်ႇၵႆၵၼ် 6 ပေႇသေၶၢႆ။ ၸဝ်ႈၼႃႈတီႈၵေႃႈ ယူႇတီႈပၢၵ်ႇတၢင်းၶဝ်ႈၵၢတ်ႇၼၼ်ႉသေ သေႃႇပၼ်၊ ပၼ် တၢင်းႁူႉ။ ၾၢႆႇပၢႆးယူႇလီၵေႃႈ မႃးတမ်းၽိူၼ်တမ်းတင်ႇ သေၵူတ်ႇပၼ်ပၢႆးယူႇလီၵူၼ်းမႃးၶဝ်ႈၵၢတ်ႇၵူႈၵေႃႉၶႃႈဢေႃႈ။ မီးယူႇၵူႈၼႂ်ၶႃႈၵၢတ်ႇတႄႉ။ ယၢမ်းလဵဝ် ဢၼ်ပိူၼ်ႈၸႂ်ႉပိၵ်ႉၼႆႉပဵၼ်သႅင်ႇၼမ်ႉၼဵင်ႈၼမ်ႉဝၢၼ် ၸိူဝ်းၼၼ်ႉၶႃႈဢေႃႈ”- ဝႃႈၼႆ။
ၼႂ်းၶေႃႈပိုၼ်ၽၢဝ်ႇၼၼ်ႉ ယင်းတႅမ်ႈဝႆႉပႃးထႅင်ႈဝႃႈ ၸိူဝ်းတမ်းၶၢႆတီႈၼႂ်းၵၢတ်ႇမႂ်ႇ ဢၼ်ယူႇတီႈ ၸုမ်းၵေႃႇမတီႇၵႅတ်ႇၶႄၽေးၶဵၼ်တၢင်းပဵၼ်ၶူဝ်ႊဝိတ်ႉ 19 တမ်းဝၢင်းပၼ်ၼၼ်ႉ တၵ်းတေလႆႈဢွၼ်ၵၼ်ထွမ်ႇၸွမ်းပၵ်းပိူင်လၵ်းမၢႆ ဢၼ်ၸုမ်းၵေႃႇမတီႇ တၢမ်းဝၢင်းပၼ်ၼၼ်ႉ ႁႂ်ႈၽဵၼ်ႈၽဵၼ်ႈ ဝႃႈၼႆ။
တွၼ်ႈတႃႇၵူၼ်းလုၵ်ႉမိူင်းထႆး မိူင်းၶႄႇ ပွၵ်ႈၶိုၼ်းတႄႉ လႆႈၵၵ်းၶင်တူဝ်ယူႇဝႆႉတီႈသုမ်ႉသွင်း ဢၼ်ၸဝ်ႈၼႃႈတီႈႁဵတ်းဝႆႉပၼ်ၼၼ်ႉသေ ၾၢႆႇပၢႆးယူႇလီ ၵႂႃႇၵူတ်ႇထတ်းပၼ်ပၢႆးယူႇလီယူႇၵူႈဝၼ်း- ဝႃႈၼႆ။
ၵဵဝ်ႇၵပ်းလွင်ႈၵူၼ်းဢၼ်ထၢင်ႇထိူမ်မိူၼ် ၶူဝ်ႊဝိတ်ႉ 19 ၼၼ်ႉ ၵူၼ်းပိုၼ်ႉတီႈလၢတ်ႈဝႃႈ ၸဝ်ႈၼႃႈတီႈၵူတ်ႇထတ်းႁၼ်မီးယူႇ 3 ၵေႃႉ ၊ သူင်ႇတူဝ်ယူတ်းယႃဝႆႉတီႈႁူင်းယႃမိူင်းၼွင်ယဝ်ႉ – ဝႃႈၼႆသေတႃႉ ၽူႈတွႆႇႁွၵ်ႈၵပ်းသိုပ်ႇၸူးၸဝ်ႈၼႃႈတီႈပွတ်းဝၢၼ်ႈႁႆးၵေႃႈ ၵပ်းသိုပ်ႇဢမ်ႇလႆႈလႄႈ ပႆႇၸၢင်ႈယိုၼ်ယၼ်။
တေႃႈလဵဝ်ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 ၼႂ်းမိူင်းႁူမ်ႈတုမ်ၼႆႉ တင်းမူတ်းမီးၵႂႃႇ 111 ၵေႃႉ၊ လူႉတၢႆ 5 ၵေႃႉ၊ ယႃၶႅၼ်း 7 ၵေႃႉ ဝႃႈၼႆ။
ၵူၼ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တင်းလုမ်ႈၾႃႉမီး 2,407,699 ၵေႃႉလႄႈ လူႉတၢႆ 165,093 ၵေႃႉ၊ ယႃၶႅၼ်း 625,419 ၵေႃႉ ယူႇတီႈဝႅပ်ႊသၢႆႊ worldometers.info ဢွၵ်ႇဝႆႉ။
