လူင်ပွင်ၸိုင်ႈမိူင်းႁူမ်ႈတုမ် ပိုၼ်ၽၢဝ်ႇမိူဝ်ႈၼႆႉဝၼ်းလဵဝ် ထူပ်းႁၼ်ထႅင်ႈၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 ထႅင်ႈ 13 ၵေႃႉ။
မိူဝ်ႈၼႆႉ ဝၼ်းတီႈ 13/4/2020 ယၢမ်းၵၢင်ၶမ်ႈ 8 မူင်း ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇ ထူပ်းႁၼ် ထႅင်ႈ ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 တင်းမူတ်း 11 ၵေႃႉ။ မိူဝ်ႈၼႆႉ ယၢမ်းၵၢင်ၼႂ်ၸဝ်ႉသမ်ႉ ပိုၼ်ၽၢဝ်ႇထူပ်းႁၼ် 2 ၵေႃႉ။ယၢမ်းလဵဝ် ၼႂ်းမိူင်းႁူမ်ႈတုမ် တင်းမူတ်းၵူၼ်းတိတ်းၸပ်းၸိူဝ်ႉမႅင်း ႁူမ်ႈၵၼ်မီး 52 ၵေႃႉယဝ်ႉ ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ႁွင်ႈၵၢၼ်ပၢႆးယူႇလီလႄႈၾၢႆႇလဵၼ်ႈႁႅင်းၼၼ်ႉ ဢွၵ်ႇဝႆႉဝႃႈ “ မိူဝ်ႈၼႆႉ ယၢမ်းႁူဝ်ၶမ်ႈ 6 မူင်း လႆႈ ပိုၼ်ၽၢဝ်ႇဢွၵ်ႇမႃးဝႃႈ ဢၼ်လႆႈၵူတ်ႇထတ်းၸုပ်ႈထီႈၼိုင်ႈမိူဝ်ႈၼႆႉ တင်းမူတ်း မီး 92 ၵေႃႉ။ ၼႂ်းၼၼ်ႉ တႃႇ 11 ၵေႃႉ ထူပ်းႁၼ် ၵူၼ်းၸပ်းတၢင်းပဵၼ်ၸိူဝ်ႉမႅင်း ၶူဝ်ႊဝိတ်ႉ 19 ။ လိူဝ်ထႅင်ႈ 81 ၵေႃႉၼၼ်ႉ ဢမ်ႇတိတ်းၸပ်း” ဝႃႈၼႆ။
တေႃႈလဵဝ် ၵူၼ်းၸပ်းတၢင်းပဵၼ်ၸိူဝ်ႉမႅင်းၶူဝ်ႊဝိတ်ႉ 19 ၼႂ်းမိူင်းႁူမ်ႈတုမ် ပတ်းပိုၼ်ႉမိူင်း မီး 52 ၵေႃႉ။ ဢၼ်လႆႈလူႉတၢႆ ၵႂႃႇ မီး 4 ၵေႃႉ။ ၵူၼ်းမိူင်းတႆးတႄႉ ဢၼ်ႁူႉတႅတ်ႈတေႃးဝႃႈတိတ်းၸပ်းတၢင်းပဵၼ်ၶူဝ်ႊဝိတ်ႉ 19 မီး 2 ၵေႃႉ ၊ ပဵၼ်ၵူၼ်းၵျွၵ်ႉ မႄးၵေႃႉၼိုင်ႈလႄႈ ၵူၼ်းတူၼ်ႈတီး ၵေႃႉၼိုင်ႈ။ ၼႂ်းမိူင်းတႆး ဢၼ်ပႂ်ႉတူၺ်းငဝ်းလၢႆးမီး 158 ၵေႃႉ ပဵၼ်ၸိုင်ႈတႆးပွတ်းဢွၵ်ႇ 57 ၵေႃႉ၊ ၸိုင်ႈတႆးပွတ်းၸၢၼ်း 52 ၵေႃႉ၊ ၸိုင်ႈတႆးပွတ်းႁွင်ႇမီး 49 ၵေႃႉ။
ဝၼ်းမိူဝ်ႈၼႆႉ 13/4/2020 ယၢမ်းၵၢင်ၶမ်ႈ 9 မူင်းပၢႆ worldometers.info ပိုၼ်ၽၢဝ်ႇဝႃႈ ပတ်းပိုၼ်ႉလုမ်ႈၾႃႉ ၵူၼ်းတိတ်းၸပ်းမီး 1,872,866 ၵေႃႉ၊ တၢႆ 116,037 ၵေႃႉ၊ ဢၼ်ယႃၶႅၼ်း မီး 4 သႅၼ်ပၢႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ