Thursday, March 28, 2024

ၼမ်ႉၸႂ်ၽႃႇၵၢင်ဝၢင်းၶိုင်ႈ လႄႈ လၢႆးၸတ်းၵၢၼ်လူင်ပွင်ၸိုင်ႈမိူင်းမၢၼ်ႈ

Must read

ႁိုၼ်း ၵႃယၢင်
Photo by – hurn kayang/ ႁိုၼ်း ၵႃယၢင်း

မႂ်ႇသုင်ၵၼ်ၵူႈၵေႃႉၵူႈၵူၼ်းၶႃႈ တွၼ်ႈတႃႇဝူင်ႈၼႆႉ ၶႂ်ႈမႃးလဝ်ႈလၢတ်ႈပၢႆးၼႄၵၼ် ႁူဝ်ၶေႃႈဢၼ်ဝႃႈ ၼမ်ႉၸႂ်ၽႃႇၵၢင်ဝၢင်းၶိုင်ႈ လႄႈ လၢႆးၸတ်းၵၢၼ်လူင်ပွင်ၸိုင်ႈမိူင်းမၢၼ်ႈ ဢၼ်ဝႃႈၼၼ်ႉၶႃႈ။

လိူၼ်ဢေႊပရိူဝ်ႊ ဝၼ်းတီႈ 9 ၼႆႉ ၵူၼ်းဝၢၼ်ႈယူႇႁိမ်းၵုင်းမူင်ႈ ၼႂ်းၸႄႈဝဵင်းသီႇပေႃႉၼၼ်ႉ 5 ၵေႃႉ လႆႈထုၵ်ႇၺႃး ယိုဝ်းတၢႆထင်တီႈသေယဝ်ႉ ၵူၼ်းဝၢၼ်ႈၵူၼ်းမိူင်းႁဝ်းၵေႃႈ ၸိူဝ်းဢၼ်လႆႈႁူႉ လႆႈငိၼ်းၸွမ်းၼၼ်ႉ ပဵၼ်ဢၼ်ၸႂ်ဢမ်ႇလီၸွမ်း။

- Subscription -

ၵူၺ်းၵႃႈ ယူႇတီႈၸဝ်ႈၼႃႈတီႈလႄႈသင် ယူႇတီႈၽူႈယႂ်ႇၵူၼ်းလူင်ၼႂ်းၸုမ်းလူင်ပွင်ၸိုင်ႈလႄႈသင် ဢမ်ႇႁၼ်မီးၵေႃႉ ဢၼ်ပၢၵ်ႇလၢတ်ႈဝႃႈ တေဢဝ်ပုၼ်ႈၽွၼ်းသေႃႉႁႃပၼ် ႁႂ်ႈပေႃးႁၼ်ၵေႃႉႁဵတ်းႁၢႆႉ ၵေႃႉဢၼ်ပူၼ်ႉပႅၼ်ၼၼ်ႉ ၼႆသေၵေႃႉ။

ၸိူင်ႉၼႆၼႆႉ ၵႆႉပဵၼ်ၼႃႇ ၼႂ်းတူင်ႇဝူင်းၵူၼ်းႁဝ်း ဢမ်ႇၼၼ်ၵေႃႈ ၼႂ်းမိူင်းတႆးႁဝ်း ၵမ်းၵမ်း လႆႈထူပ်းလႆႈၺႃး လႆႈႁူႉ လႆႈ ငိၼ်းလႄႈ ၼင်ႇႁၢင်ႈပေႃးၶႂ်ႈလိုၼ်ႈႁူၵႂႃႇၵေႃႈမီးမီး။

မိူၼ်ၸိူင်ႉၼႆၼင်ႇၵဝ်ႇ တီႈတၢင်းမိူင်းၶျၢင်း ပုၼ်ႉၵေႃႈ ယွၼ်ႉပိူဝ်ႈ AA ၸုမ်းရၶႅင်ႇလႄႈ တင်း တပ်ႉမတေႃႇသိုၵ်းမၢၼ်ႈ ပဵၼ်ပၢင်တိုၵ်းၵၼ်သေ ၵူၼ်းမိူင်းလႆႈလူႉတၢႆမၢတ်ႇၸဵပ်း မီးယူႇၵူႈဝၼ်းဝၼ်းယဝ်ႉ။

မိူဝ်ႈလိူၼ်ဢေႊပရိူဝ်ႊ ဝၼ်းတီႈ 7 ယၢမ်းတၢမ်းၶမ်ႈ 3 မူင်း ၼႂ်းၵႄႈ 5 မူင်းၼၼ်ႉ တီႈဝၢၼ်ႈၼၢၼ်းၶျွင်းဝႃႉ လုၵ်ႉၼိူဝ်ၶိူင်ႈ မိၼ်သေယဝ်ႉ ယိုဝ်းတူၵ်းမႃးလႄႈ ၼႂ်းဝၢၼ်ႈၼၢၼ်းၶျွင်းဝႃႉၼၼ်ႉ ပႃးၸဵမ်လုၵ်ႈဢွၼ်ႇလုၵ်ႈႁဵၼ်း ၼၢင်းယိင်း ႁူမ်ႈၵူၼ်း 7 ၵေႃႉ လႆႈလူႉတၢႆႁၢႆၵႂႃႇ။ ဢၼ်မၢတ်ႇၸဵပ်းမီးယူႇ 9 ၵေႃႉ။

လိူဝ်ၼၼ်ႉ ႁိူၼ်း 8 လင် ၺႃးၾႆးၽဝ်ပႅတ်ႈ ၼႆႉၵေႃႈ ဢမ်ႇငိၼ်းၸဝ်ႈၼႃႈတီႈၾၢႆႇသိုၵ်း ဢမ်ႇၼၼ်ၵေႃႈ ၾၢႆႇလူင်ပွင် ၸိုင်ႈၶဝ် ၵေႃႉလႂ် ဢဝ်ပုၼ်ႈၽွၼ်း တေၵႄႈလိတ်ႈၸွႆႈထႅမ်ၼႆ ဢမ်ႇငိၼ်းၶဝ်တူၵ်ႇ ၶဝ်တၵ်ႉသေဢိတ်း။

ၵဵဝ်ႇလူၺ်ႈလွင်ႈၼႆႉ တေလႆႈၵိုတ်းယိုတ်းပႅတ်ႈပၢင်တိုၵ်းသိုၵ်းသိူဝ်ဢိူဝ်ႈၼႆၵေႃႈ ဢမ်ႇငိၼ်းၸွမ်ၸိုင်ႈ ၵေႃႉလၢတ်ႈပၼ် ဢမ်ႇငိၼ်းၽူႈၵိူဝ်းၵုမ်ၸိုင်ႈမိူင်းတေႃႇဢွင်ႇသၢၼ်းၸူႉၵျီႇ တူၵ်ႇလၢတ်ႈပၼ်။ ဢမ်ႇငိၼ်းၽူႈပွင်ၵၢၼ်သိုၵ်း/ ၸွမ်ပွင်ၵၢၼ်သိုၵ်းတူၵ်ႇလၢတ်ႈသေဢိတ်း။

ၵူၺ်းၵႃႈ ၼႂ်းၶၢဝ်းတၢင်း 2 ဝူင်ႈ ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ ဢၼ်မီးယူႇၼႂ်းမိူင်းပတ်းပိုၼ်ႉ ဢၼ်ၶဝ်ဝႃႈမီးယူႇ 20 ပၢႆၼၼ်ႉ၊ တၢႆၵႂႃႇ 3 ၵေႃႉ။ ၵွပ်ႈပိူဝ်ႈၸိူင်ႉၼႆသေယဝ်ႉ ဢၼ်တိုၼ်ႇသၢၼ်ႈၵူဝ်ႁႄ ၶေႃးၶူမ်မွင်ၸႂ်ၸွမ်း ၸိူင်ႉၼင်ႇ တၢမ်တူဝ်တေႃႇဢွင်ႇသၢၼ်းၸူႉၵျီႇ ယင်းလၢတ်ႈဢွၵ်ႇမႃးၵႂၢမ်းၶေႃးၶူမ်သေ လၢတ်ႈဝႃႈ တေဢဝ်ပုၼ်ႈၽွၼ်းၸိူဝ်းပဵၼ် မုင်ႉႁေႃ ႁိူၼ်းၶဝ် ၸိူဝ်းၼၼ်ႉ တေလႆႈငိၼ်းၵၼ်ယူႇ။

တီႈတႄႉမႃး ၼႂ်းမိူင်းႁူမ်ႈတုမ်မျၢၼ်ႇမႃႇ တင်းမိူင်းၼႆႉ ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ ဢၼ်ဝႃႈၼၼ်ႉ လႆႈငိၼ်း 20 ပၢႆၼႆ ႁဝ်းၶႃႈ တေၸၢင်ႈယုမ်ႇၵၼ်ယၢပ်ႇတႄႉယူႇ။ ႁဵတ်းသင်လႃႇၼႆ ၵွပ်ႈပိူဝ်ႈႁူႉထိုင်ဝႆႉ လွင်ႈၼမ်ႉၵတ်ႉ ၶိူင်ႈၶူဝ်း လၢႆး ၸတ်းပွင်လႄႈ တင်းလၢႆးဝႆႉၸႂ် ၵဵဝ်ႇလူၺ်ႈၵၢၼ်ၵူတ်ႇထတ်းတၢင်းပဵၼ်ၼႆႉ မီးဝႆႉလွင်ႈၶၢတ်ႈၶွပ်ႇဝႆႉတင်းၼမ်ၶႃႈယဝ်ႉ။ လွင်ႈပိုတ်ႇပၢင်ႇၸႅင်ႈလႅင်းဢေႇ ၾၢႆႇသိုဝ်ႇၶဝ် ဢမ်ႇၸၢင်ႈႁဵတ်းၵၢၼ်ၸိူဝ်းၼႆႉ ႁဝ်းၶႃႈတေႁူႉငိၼ်းၵၼ်ယူႇ။

ၵဵဝ်ႇလူၺ်ႈတၢင်းပဵၼ်ၶူဝ်ႊဝိတ်ႉၼႆႉ ႁူမ်ႈဝႃႈ ယူႇတီႈလူင်ပွင်ၸိုင်ႈ ၶတ်းၸႂ်တေႃႇသူႈႁႄႉၵင်ႈၶတ်းၸႂ်ပွင်ႇထိုင်ႁႂ်ႈၵူၼ်းမိူင်း ၾၢင်ႉထိုင် ႁႂ်ႈႁဵတ်းၸွမ်းယူႇ ဝႃႈၼႆသေတႃႉၵေႃႈ မိူၼ်တင်းမိုဝ်းသီႇၼိဝ်ႉ တူမ်းႁႃႈႁူးၵူၺ်း တိုၼ်းဢမ်ႇထိုင်တီႈ။ ဢမ်ႇၼၼ်ၵေႃႈ တေလႆႈဝႃႈ ဢႃႇၼႃႇႁႅင်းလူင် ပွင်ၸိုင်ႈၼႆႉ မၼ်းဢမ်ႇသုမ်ႇငမ်းလႆႈ တပ်ႉမတေႃႇ ဢိၵ်ႇလူၺ်ႈပႃး တင်းႁွင်ႈၵၢၼ်ၽွင်းလူင်ၾၢႆႇၼႂ်းမိူင်းၼၼ်ႉႁိုဝ် ၼႆၵေႃႈၸၢင်ႈတေလႆႈငမ်းငဝ်းယူႇ။

မိူၼ်ၸိူင်ႉတီႈမိူင်းရၶႅင်ႇၼႆႉ တႄႇၸဵမ်မိူဝ်ႈပီၵၢႆ  2019 လိူၼ်ၵျုၼ်ႊ ဢမ်ႇလူင်ႈၼႃႈ ဢမ်ႇပွင်ႇၶၢဝ်ႇသေယဝ်ႉ တတ်းၶၢတ်ႇပႅတ်ႈ သၢႆၼႅင်ႈဢိၼ်ႊထိူဝ်ႊၼႅတ်ႊ ၽိူဝ်ႇၽႅဝ်ထိုင်ၼႂ်းလိူၼ်သႅပ်ႊထႅမ်ႊၿိူဝ်ႊ ၸင်ႇတေၶိုၼ်းပိုတ်ႇပၼ်ၶိုၼ်း။ ပီၼႆႉ လိူၼ်ၾႅပ်ႊ ၿိဝ်ႊရီႊ 3 ဝၼ်း သမ်ႉၶိုၼ်းတိုတ်းၶၢတ်ႇပႅတ်ႈထႅင်ႈ။

တီႈၼႂ်းၸႄႈဝဵင်းယတေႉတွင်ႇ၊ ပူးတီးတွင်ႇ၊ မွင်ႇတေႃး၊ မျေႇပူင်ႇ၊ ၵျွၵ်ႉတေႃႇ၊ မျၢဝ်ႉဢူး၊ မိၼ်းပျႃး၊ ပူင်ႇၼႃးၵျုၼ်း ၸိူဝ်းၼႆႉ ႁၢၼ်ႇတေႃႇထိုင်ဝၼ်းမိူဝ်ႈၼႆႉ ပႆႇလႆႈၶိုၼ်းသၢႆၼႅင်ႈၶၢဝ်ႇ ဢိၼ်ႊထိူဝ်ႊၼႅတ်ႊ။ ၵူၼ်းမိူင်းရၶႅင်ႇတီႈၸႄႈမိူင်းၶျၢင်း ၸႄႈဝဵင်း ပလႅတ်ႉဝႃႉၼၼ်ႉၵေႃႈ တိုတ်းၶၢတ်ႇဝႆႉမိူၼ်ၼႆၵူၺ်းၼင်ႇၵဝ်ႇ။

ၵမ်းၼႆႉ ၽိူဝ်ႇထိုင်ပဵၼ်ၶူဝ်ႊဝိတ်ႉ 19 ၼႆႉမႃး တၢင်းပဵၼ်ၼႆႉ ၸွတ်ႇၽႄႈၵၼ်မႃးယဝ်ႉၼႆ ယူႇတီႈၵူၼ်းမိူင်းတင်းလၢႆၼႆႉ တေလႆႈႁဵတ်းႁိုဝ်ႁႄႉၵင်ႈ တေလႆႈႁဵတ်းႁိုဝ်ၵႅတ်ႇၶႄ ဢမ်ႇၼၼ်ၵေႃႈ တေလႆႈႁဵတ်းႁိုဝ် ယူတ်းယႃ ဢဝ်ၸဵမ်ၸိူဝ်းၼႆႉၵႂႃႇ တႃႇတေလႆႈႁူႉ ၶေႃႈမုလ်းၶၢဝ်ႇငၢဝ်းဢၼ်ဝႃႈၼၼ်ႉ တိုၼ်းဢမ်ႇပဵၼ်လႆႈယဝ်ႉ။

ၵွပ်ႈပိူဝ်ႈၸိူင်ႉၼၼ်လႄႈ ယူႇတီႈၵူၼ်းမိူင်းၸိူဝ်းၼၼ်ႉၼႆႉ ပၢႆသေလိူဝ်ပဵၼ်ပၢင်တိုၵ်း တိုၵ်းတေႃးၵၼ်ယူႇလႄႈ သမ်ႉၶိုၼ်း လႆႈၺႃးတၢမ်ႇ တိုတ်းၶၢတ်ႇပႅတ်ႈသၢႆၼႅင်ႈဢိၼ်ႊထိူဝ်ႊၼႅတ်ႊၼႆႉၼႆလႄႈ ယူႇတီႈၶဝ်ၼၼ်ႉ တင်းပၢႆႈၽေးသေယဝ်ႉ သင် ၸိူဝ်ႉဝႃႈ ၸပ်းတၢင်းပဵၼ်သေ လႆႈတၢႆၵႂႃႇပဵၼ်ၽုင်ပဵၼ်ၵႄၼၼ်ႉ ၶဝ်ယင်းတေဢမ်ႇတၼ်းလႆႈႁူႉဝႃႈ ပဵၼ်ယွၼ်ႉသင် ၼႆၵွၼ်ႇ ႁဝ်းၶႃႈတႄႉ ႁၼ်ထိုင်ဝႆႉၸိူင်ႉၼၼ်။

ၵဵဝ်ႇလူၺ်ႈလွင်ႈၼႆႉ ၵွပ်ႈသင် ယူႇတီႈလူင်ပွင်ၸိုင်ႈ ဢူမ်ၼမ်ႉလပ်ႉၽႃႉယူႇ ႁဝ်းၶႃႈ တႃႉလီထၢမ်ၵႂႃႇၶႃႈလႃႈ။ သမ်ႉထႅင်ႈ တီႈတၢင်းၼႂ်း မေႃႇသႅင်ၶဵဝ် ၽႃၵၢၼ်ႉပုၼ်ႉ ႁၢၼ်ႉတေႃႇ မိူဝ်ႈဝႃး မိူဝ်ႈၼႆႉ ၵူၼ်းၶုတ်းသႅင်၊ ႁႃသႅင်သုၼ်ႇတူဝ် ၽႂ်မၼ်းၼႆႉ ၼိုင်ႈတီႈလႂ် ၵူၼ်း 7 ပၢၵ်ႇ 8 ပၢၵ်ႇလႂ် တေႃႇထိုင် 1 ႁဵင် 2 ႁဵင်ၵေႃႉ ဢီးထွင်းၽိုတ်ႉၽၢတ်ႉၵၼ်သေ ၽၢၼ်ႉသႅင် ႁႃသႅင် ၵၼ်ၵူႈဝၼ်းဝၼ်း တၢမ်းၶၢမ်ႈ 4 မူင်း တေႃႇထိုင် 6 မူင်း။

တီႈမေႃႇမၢၵ်ႇၼႃႉၼၼ်ႉ တေမီးယူႇ 4 တီႈ။ တီႈမေႃႇပလၶၼၼ်ႉမီးယူႇ 2 တီႈ။ တီႈမေႃႇပႃႉၸၢၼ်ႇၶျွၵ်ႉ ဢၼ်ဝႃႈၼၼ်ႉ တေမီးယူႇ 3 တီႈ။ တီႈမေႃႇႁူၺ်ႈၶႃႈဢၼ်ဝႃႈၼၼ်ႉ တေမီးယူႇ 3 တီႈ။ ၼိုင်ႈတီႈလႂ် ၵူၼ်းပၢၵ်ႇ ၵူၼ်းႁဵင်မၼ်း ၽိုတ်ႉၽၢတ်ႉၵၼ် ဢီးထွင်းၵၼ်ယူႇ ၵိုၼ်းဢိုၵ်ႉဢိုၵ်ႉၼႆႉ ၼင်ႇႁၢင်ႈၶႂ်ႈၵိုၼ်းလိူဝ်သေ ပွႆးလိူၼ်သီႇ မိူင်းႁဝ်းၵွၼ်ႇ။

လွင်ႈၸိူဝ်းၼႆႉ ထၢင်ႇဝႃႈ ၸဝ်ႈၼႃႈတီႈၶဝ်ဢမ်ႇႁူႉႁႃႉၼႆ တၢမ်တူဝ်ပလိၵ်ႈၶဝ် ပဵၼ်မူႇ ပဵၼ်ၸုမ်း ပႂ်ႉသေဢဝ်ႁူမ်ႇလူမ်ႈ ပၼ်ၸွမ်းၵွၼ်ႇ။

ၵွပ်ႈပိူဝ်ႈၸိူင်ႉၼႆ ၵဵဝ်ႇလူၺ်ႈလွင်ႈၸိူဝ်းၼႆႉ ၵွပ်ႈသင်ယူႇတီႈလူင်ပွင်ၸိုင်ႈမိူင်းၶၢင် ဢမ်ႇတၵ်းသဵင် ဢမ်ႇၼၼ် ၵွပ်ႈသင် ယူႇတီႈလူင်ပွင်ၸိုင်ႈ မိူင်းရၶႅင်ႇဢမ်ႇတၵ်းသဵင်၊ ၵွပ်ႈသင်ယူႇတီႈလူင်ပွင်ၸိုင်ႈၼေႇပျီႇတေႃႇ ဢမ်ႇသူၼ်ၸႂ်လႃႇ တေပဵၼ် မႃးၶေႃႈထၢမ်တင်းၼမ် တင်းလၢႆ။

တီႈၼႆႈႁဝ်းၶႃႈ တေလႆႈၼပ်ႉသွၼ်ႇဝႃႈ ၵၢၼ်ၵိုတ်းတိုၵ်းၼႆႉ ပဵၼ်ၵၢၼ်ၾၢႆႇတပ်ႉမတေႃႇသိုၵ်းမၢၼ်ႈ ဢမ်ႇၸႂ်ႈၵၢၼ် လူင်ပွင်ၸိုင်ႈ တႃႇတေၶဝ်ႈၵႅဝ်ၸွမ်း တႃႇတေပၼ်ၶေႃႈၸီႉသင်ႇႁႂ်ႈၵိုတ်းတိုၵ်းၼၼ်ႉ ႁဝ်းၶႃႈဢမ်ႇပဵၼ်လႆႈ တေဝႃႈၸိူင်ႉၼၼ်ႁိုဝ် ဢမ်ႇၼၼ်ၵေႃႈ ၵၢၼ်တိုတ်းၶၢတ်ႇ ၼႅင်ႈၶၢဝ်ႇဢိၼ်ႊထိူဝ်ႊၼႅတ်ႊၼၼ်ႉ ပဵၼ်ၼႃႈၵၢၼ်ထၢၼ်ၽွင်းလူင် ၼႂ်းမိူင်းၶဝ် ဢမ်ႇၵဵဝ်ႇတင်းလူင်ပွင်ၸိုင်ႈ ဢမ်ႇၼၼ်ၵေႃႈ ယူႇတီႈလူင်ပွင်ၸိုင်ႈသုၼ်ၵၢင်ၼႆႉ ဢမ်ႇမီးဢႃႇၼႃႇ ပိူဝ်ႈတႃႇတေ ၸီႉသင်ႇ ၵွပ်ႈပိူဝ်ႈမၼ်းပဵၼ် ၵၢၼ်ၵဵဝ်ႇလူၺ်ႈၾၢႆႇႁူမ်ႇလူမ်ႈၾၢႆႇသိုၵ်းၶဝ်လႄႈ ဢိင်ၼိူဝ်လွင်ႈတၢင်းၸိူင်ႉၼၼ်ၼႄႇ။

ဢမ်ႇၼၼ်ၵေႃႈ ၵၢၼ်ၶုတ်းသႅင် ႁႃသႅင်ၼၼ်ႉ ဢမ်ႇၸႂ်ႈၵၢၼ်ဢၼ်လူင်ပွင်ၸိုင်ႈသုၼ်ၵၢင်လႆႈႁူႉႁၼ်ၸွမ်း ယူႇတီႈ ၸဝ်ႈၼႃႈတီႈၼႂ်းတူင်ႇတၢင်ႇ သွင်ၾၢႆႇ ပဵၼ်ၾၢႆႇမိူင်း ၾၢႆႇထိူၼ်ႇ ႁူမ်ႈႁူႉႁူမ်ႈၵၼ်ႁဵတ်းၸွမ်းၵူၺ်း တေဝႃႈ ၸိူင်ႉၼၼ်ၼႄႇ တေပဵၼ်ၶေႃႈထၢမ်မႃးယဝ်ႉ။

ၵမ်းၼႆႉ ၵူၼ်းမိုၼ်ႇၵူၼ်းသႅၼ် ဢၼ်လႆႈပၢႆႈၽေးသိုၵ်းၼၼ်ႉလႄႈသင် ၵူၼ်းမိုၼ်ႇၵူၼ်းသႅၼ် ဢၼ်ႁႃလဵင်ႉတွင်ႉ ၵဵဝ်ႇလူၺ်ႈလွင်ႈႁႃသႅင် ၽၢၼ်ႉသႅင်ယူႇ ၵိုၼ်းဢိုၵ်ႉဢိုၵ်ႉၼၼ်ႉလႄႈသင် သလေႃႇ ဢမ်ႇတေႃႇ သေၵေႃႉ သေၵူၼ်း ၸပ်းတိတ်းမႃး တၢင်းပဵၼ်ၶူဝ်ႊဝိတ်ႉယဝ်ႉ ပေႃးဝႃႈၼႆ ၸွင်ႇတေၸႂ်ႈပၼ်ႁႃ မိူင်း/ၵူၼ်းၶိူဝ်း ရၶႅင်ႇဢၼ်လဵဝ်ၵူၺ်းယဝ်ႉၼႄႇ။ ဢမ်ႇၼၼ် ၸွင်ႇတေၸႂ်ႈပၼ်ႁႃ ၽႃၵၢၼ်ႉၵူၺ်းယဝ်ႉႁိုဝ် ၵူၼ်းမိူင်းတင်းပတ်းပိုၼ်ႉ ႁူႉတၵ်းမီးၸေးယဝ်ႉ ဢၼ်ဝႃႈၼၼ်ႉ ႁဝ်းၶႃႈ ဢမ်ႇၸၢင်ႈလူင်လိုမ်း ဢမ်ႇၸၢင်ႈဝႄႈလွတ်ႈလႆႈ။

လွင်ႈၼႆႉႁဵတ်းသင် လူင်ပွင်ၸိုင်ႈၸုမ်းၼူၵ်ႉယုင်းလႄႈ တပ်ႉမတေႃႇမၢၼ်ႈၶဝ် ႁဵတ်းၵႅင်ႈဢမ်ႇၶဝ်ႈၸႂ် ဢမ်ႇသႂ်ႇၸႂ်လႃႇ တႃႉလီဢၢမ်းၼမ်ႉၸႂ်ၶဝ်တႄႉ။

ၸႂ်ၽႃႇၵၢင်ဝၢင်းၶိုင်ႈဢၼ်ဝႃႈၵူၼ်းမိူင်းၵူႈၵေႃႉၼႆႉ တိုၼ်းပဵၼ်လုၵ်ႈဢူၵ်းလုၵ်ႈၸႂ်ၸဝ်ႈၵဝ်ႇဢၼ်ဝႃႈၼၼ်ႉ ယူဝ်ၶဝ်ၸဝ်ႈ လိုမ်းပႅတ်ႈယဝ်ႉႁိုဝ် ၼႆၵေႃႈ လီငမ်းငဝ်းဝႆႉယူႇ။

တီႈတႄႉမႃး ဢမ်ႇဝႃႈလူင်ပွင်ၸိုင်ႈ ဢမ်ႇဝႃႈတပ်ႉမတေႃႇသိုၵ်းမၢၼ်ႈ ၵူႈၸုမ်းပႃးၸိူဝ်းဢၼ်ပွင်ၵၢၼ်ၸိူဝ်ႉၶိူဝ်းဝၢၼ်ႈမိူင်း ယူႇ ႁင်းၽႂ်မၼ်းၼၼ်ႉ ပေႃးၵုမ်ႇတေဝႆႉၸႂ်ဝႃႈ ၵဝ်ႁဵတ်းဢမ်ႇၸႂ်ႈဢၼ်လီ ပိူၼ်ႈႁဵတ်းတိုၼ်းၽိတ်းပိူင်ႈသဵင်ႈသဵင်ႈယူႇၼႆ တႄႉ ပိူဝ်ႈတႃႇၵူၼ်းမိူင်းတေၵတ်းယဵၼ် ဢမ်ႇၼၼ်ၵေႃႈ ပိူဝ်ႈတႃႇဝၢၼ်ႈမိူင်းတေၶိုၼ်ႈယႂ်ႇ ဢၼ်ဝႃႈၼၼ်ႉ တိုၵ်ႉတေၵႆယူႇ ႁဝ်းၶႃႈယွၼ်းပိုတ်ႇပၢႆးၼႄၵၼ် ပွတ်းဢွၼ်ႇတွၼ်ႈၼိုင်ႈသေ ႁႂ်ႈလႆႈၶွတ်ႇယွတ်ႈပၢႆၵႂၢမ်းဝႆႉတီႈၼႆႈၶႃႈ။

ယွၼ်းသူးႁႂ်ႈပေႃႈမႄႈပီႈၼွင်ႉၵူၼ်းမိူင်းႁဝ်းၶဝ် လွတ်ႈၽေးၶဵၼ်တၢမ်ႇ ပၢင်တိုၵ်းသိုၵ်းသိူဝ်လႄႈ ဢိၵ်ႇလူၺ်ႈပႃးတင်း တၢမ်ႇၶူဝ်ႊဝိတ်ႉ ၵၢပ်ႈၵႃႇလ ရေႃးၵႃႇၼႆႉသေၵမ်း။

မႂ်ႇသုင်ၶႃႈ
ႁိုၼ်း ၵႃယၢင်း
2020/04/10

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း