ၸိူဝ်ႉမႅင်းၶူဝ်ႊဝိတ်ႉ 19 ၽႄႈၸွတ်ႇတိတ်းၸပ်းၵူၼ်းတူဝ်ႈလုမ်ႈၾႃႉမီးလၢၼ်ႉႁူၵ်းပၢႆ၊ တၢႆ ႁိမ်းသႅၼ် ၵေႃႉၼၼ်ႉ မိူင်းမၢၼ်ႈပတ်းပိုၼ်ႉတၢႆ 3 ၵေႃႉ ၸပ်း 20 ပၢႆ ၊ မိူင်းတႆးတႄႉ ဢၼ်ထုၵ်ႇထၢင်ႇထိူမ် မီးပၢၵ်ႇပၢႆ – ဢၼ်တိတ်းၸပ်း ၸိူဝ်ႉမႅင်းဝႆႉသမ်ႉၵေႃႉၼိုင်ႈ။
တေႃႇထိုင်ဝၼ်းတီႈ 9/4/2020 ၼႆႉ မိူင်းတႆး – ပွတ်းႁွင်ႇ ပွတ်းဢွၵ်ႇ ပွတ်းၸၢၼ်း ၼႂ်း 55 ၸႄႈဝဵင်းၼၼ်ႉ ၵူၼ်းဢၼ် ထုၵ်ႇထၢင်ႇထိူမ် ၵူတ်ႇထတ်း ၸိူဝ်ႉမႅင်းၶူဝ်ႊရူဝ်ႊၼႃႊ ႁိုဝ် ၶူဝ်ႊဝိတ်ႉ 19 သေ ပႂ်ႉတူၺ်းတႄႉ တင်းမူတ်းမီး 127 ၵေႃႉ – မီးတီႈႁူင်းယႃ လႃႈသဵဝ်ႈ၊ မူႇၸေႊ၊ တူၼ်ႈတီး၊ ၵၢတ်ႇလေႃႉ၊ လွႆလႅမ်၊ ၵဵင်းတုင်၊ တႃႈၶီႈလဵၵ်း။
Dr. ၼိၼ်းဢီႉၽိဝ်ႇ ၵႅမ်ၽူႈၸတ်းၵၢၼ် ႁွင်ႈၵၢၼ်ၾၢႆႇပၢႆးယူႇလီ မိူင်းတႆး လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းလိူၼ်ၼႆႉ ဝူင်ႈ ထီႉသၢမ် ဢၼ်တေထိုင်ၼႆႉ ႁႂ်ႈၵူၼ်းမိူင်းႁဝ်း ဢွၼ်ၵၼ်ဝႆႉၾၢင်ႉသတိၵၼ် သေၵမ်းၶႃႈ။ ယွၼ်ႉဝႃႈ ၵူၼ်းမိူင်း လုၵ်ႉတီႈၵႆ ပွၵ်ႈမႃးသေ ပႂ်ႉတူၺ်းဝႆႉ ၶၢဝ်းတၢင်း 14 ဝၼ်းၼၼ်ႉ ဢမ်ႇႁၼ်ၸိူဝ်ႉမႅင်းသေတႃႉ သင်ၸိူဝ်ႉမႅင်းမီးဝႆႉၼႂ်းတူဝ်ၶိင်းသေ ပႆႇ ၼႄၾၢင်ႁၢင်ႈၵေႃႈပဵၼ်လႆႈ။ ယွၼ်ႉၼၼ် ယႃႇပေပေႃးဢွၵ်ႇလႄႇ ၵျေႃႇမူၼ်ႈၵၼ်ၼႃႇၽႅဝ် လွင်ႈၼႆႉၵေႃႈ လႆႈပိုၼ်ၽၢဝ်ႇ ဝႆႉယူႇ” ဝႃႈၼႆ။
ဝၼ်းတီႈ 6/4/2020 ပူၼ်ႉမႃးၼႆႉ လူင်ပွင်ၸိုင်ႈမိူင်းတႆး ပိုၼ်ၽၢဝ်ႇဝႆႉဝႃႈ တႃႇတေၵုမ်းၵမ်လႆႈ ၸိူဝ်ႉမႅင်း ၶူဝ်ႊဝိတ်ႉ 19 ၼၼ်ႉ ပေႃးပဵၼ်လႆႈယႃႇပေဢွၵ်ႇႁိူၼ်း ဢႅဝ်ႇတႂ်ႈဢႅဝ်ႇၼိူဝ်၊ ယႃႇၵႂႃႇတီႈၵူၼ်း ၶွၼ်ႈၵူၼ်းၵိုၼ်း၊ ယႃႇၵႂႃႇတီႈဢႅဝ်ႇတီႈယဵမ်ႈ၊ ယႃႇဢွၵ်ႈၶၢဝ်းတၢင်းဝႃႈၼႆဝႆႉ။
ၼႂ်းမိူင်းတႆးပွတ်းၸၢၼ်း ဢွင်ႈတီႈၵုမ်းၵၵ်းတူဝ်ၸဝ်ႈၵဝ်ႇ 14 ဝၼ်း တင်းမူတ်းမီး 284 တီႈ၊ ၵူၼ်းၵႂႃႇႁဵတ်းၵၢၼ် ၼွၵ်ႈမိူင်း ပွၵ်ႈမႃးၵုမ်းတူဝ်မီး 2,900 ပၢႆ။
ဝၼ်းတီႈ 10/4/2020 ၼႆႉ ၼႂ်းမိူင်းႁူမ်ႈတုမ်ပတ်းပိုၼ်ႉ မီးၵူၼ်းၸပ်းတၢင်းပဵၼ် 27 ၵေႃႉ ႁူမ်ႈပႃး ဢၼ်ႁူပ်ႉ ႁၼ်မိူဝ်ႈၼႆႉ ထႅင်ႈ 4 ၵေႃႉ ။ တၢႆၵႂႃႇ 3 ၵေႃႉ။ ပတ်းပိုၼ်ႉလုမ်ႈၾႃႉတႄႉ ၽႄႈၸပ်း 209 မိူင်း၊ ၵူၼ်းတိတ်းၸပ်းမီး 1,605,277 ၵေႃႉ၊ တၢႆ 95,751 ၵေႃႉ၊ ဢၼ်ယႃၶႅၼ်း မီး 3 သႅၼ်ပၢႆ (ၶေႃႈမုလ်း worldometers.info) ။
