ၾႆးမႆႈႁိူၼ်းၵူၼ်းဝၢၼ်ႈလင်ၼိုင်ႈ ၼႂ်းၸႄႈဝဵင်းသီႇပေႃႉ လွင်ႈမၢတ်ႇၸဵပ်းလူႉတၢႆ ဢမ်ႇမီး ဝႃႈၼႆ။
မိူဝ်ႈၼႆႉ ဝၼ်းတီႈ 9/4/2020 ယၢမ်းၵၢင်ၼႂ် 9 မူင်းၶိုင်ႈ ၾႆးမႆႈႁိူၼ်းၼၢင်းၸၢမ် ဝၢၼ်ႈၼွင်ဢိုၼ်ႈ ဢိူင်ႇပၢင်ၸဝ်ႈမိူင်း ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ၸဝ်ႈၼႃႈတီႈလၢတ်ႈဝႃႈ ယွၼ်ႉၾႆးထၢၼ်ႇ/ ၾႆးၽိုၼ်း ဢၼ်ၵိုတ်းဝႆႉတီႈမုၵ်ႉၾႆး ၼၼ်ႉသေလၢမ်းမႆႈပႃးႁိူၼ်း ဝႃႈ ၼႆ။
ပလိၵ်ႈၾၢႆႇၶႄၾႆး သီႇပေႃႉ ဢၼ်ၵႂႃႇၸွႆႈႁူတ်းၾႆးၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပဵၼ်ၾႆးၽိုၼ်း၊ ၾႆးထၢၼ်ႇ ဢၼ်ၵိုတ်းၼႂ်းၽီးၾႆးၼၼ်ႉသေ ၶိုၼ်းလုၵ်ႉႁႅင်းလၢမ်းမႆႈၶႃႈဢေႃႈ။ ၸဝ်ႈႁိူၼ်းဝႆႉမဝ်မၢင် ထၢင်ႇဝႃႈဢမ်ႇမီး ၾႆးယဝ်ႉ ၼႆသေ ဢမ်ႇႁူတ်း ဢမ်ႇၽဵဝ်ႈႁႂ်ႈမူတ်းသေပွႆႇပႅတ်ႈဝႆႉသေၵႂႃႇတၢင်းၼွၵ်ႈ။ ပေႃးလူမ်းပဝ်ႇၵေႃႈ ၾႆးၶိုၼ်းလုၵ်ႉမႆႈ လၢမ်းပႃးႁိူၼ်း ၶႃႈဢေႃႈ” ဝႃႈၼႆ။
ယူႇတီႈၵူၼ်းဝၢၼ်ႈလႄႈ ပလိၵ်ႈၾၢႆႇၶႄၾႆး ႁူမ်ႈၵၼ်ၸွႆႈၶႄ ႁိုင်မွၵ်ႈၶိုင်ႈၸူဝ်ႈမူင်း ၾႆးၸင်ႇတေမွတ်ႇ။လၢမ်းမႆႈ ၶူဝ်းႁိူၼ်းဢမ်ႇတၼ်းလႆႈသင်။ လူႉသုမ်းငိုၼ်းမွၵ်ႈ 5 သႅၼ်ပျႃး။
ၸၢႆးလၢဝ်သႅင် ၽူႈၶဝ်ႈၸုမ်း ပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းမိူင်းႁဝ်းၶႃႈ ၵူႈၵေႃႉ ၶႂ်ႈႁႂ်ႈ ဢွၼ်ၵၼ်ဝႆႉသတိၵၼ်ၽွင်ႈ လွင်ႈၾႆးၼႆႉ ယႃႇပေဝႆႉမဝ်မၢင်ၵၼ်ၶႃႈ ၶၢဝ်းမႆႈၼႆႉ လူမ်းၵေႃႈၽတ်ႉပဝ်ႇႁႅင်း ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၽူႈမီးပုၼ်ႈၽွၼ်းၸႄႈဝဵင်းသီႇပေႃႉ လႆႈပိုတ်ႇလိူင်ႈၸွႆးတြႃးၸဝ်ႈႁိူၼ်းဝႆႉယဝ်ႉ ၸွမ်းၼင်ႇ ပၵ်းပိူင်ဝၢၼ်ႈမိူင်းမီး ဝႃႈၼႆ။
ထႅင်ႈၾၢႆႇၼိုင်ႈၵေႃႈ လွင်ႈၸုတ်ႇၽဝ်ပႃႇၵေႃႈ မီးယူႇၵူႈဝၼ်း၊ ၾႆးမႆႈပႃႇသေလၢမ်းမႆႈပႃး ႁိူၼ်းၵေႃႈမီးယူႇၵူႈဝၢၼ်ႈ ၵူႈဝဵင်းလႄႈ ယူႇတီႈၸဝ်ႈၼႃႈတီႈၾၢႆႇၶႄၾႆး ၵေႃႈလႆႈပႂ်ႉတူၺ်း ၵႅတ်ႇၶႄပႃးၾႆးပႃႇယူႇၵူႈဝၼ်း – ၸဝ်ႈၼႃႈတီႈၾၢႆႇၶႄၾႆး ၼၼ်ႉလၢတ်ႈ။
ၸၢႆးလၢဝ်သႅင် လၢတ်ႈဝႃႈ “ သင်ပဵၼ်လႆႈ ႁႂ်ႈၵူၼ်းဝၢၼ်ႈၵူၼ်းမိူင်းႁဝ်း ဢွၼ်ၵၼ်ၵႅတ်ႇၶႄႁႄႉၵင်ႈဝႆႉ လွင်ႈၾႆး ပႃႇၸၢင်ႈလၢမ်းမႆႈထိုင်ႁိူၼ်းယေး” ဝႃႈၼႆ။
မိူဝ်ႈဝႃး ဝၼ်းတီႈ 8/4/2020 ယၢမ်းၵၢင်ၼႂ် 2 မူင်း ၾႆးမႆႈ ဝတ်ႉဝိႁၢရ် ပရိယတ်ႉတိႁူဝ်ဝဵင်း ၼမ်ႉလၼ်ႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ယွၼ်ႉၾႆးၾႃႉသျွတ်ႉသေ လၢမ်းမႆႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ