ရူတ်ႉၵႃးတင်းရူတ်ႉၶိူင်ႈၽႃႇၵၼ် ၼိူဝ်သဵၼ်ႈတၢင်းလူင် သႅၼ်ဝီ – ၵူတ်ႉၶၢႆ မၢတ်ႇၸဵပ်းႁၢဝ်ႈႁႅင်းၵေႃႉၼိုင်ႈ ထိုင်တီႈ လႆႈမႆႈၸႂ်။
မိူဝ်ႈၼႆႉ ဝၼ်းတီႈ 8/4/2020 ယၢမ်းဝၢႆးဝၼ်း မွၵ်ႈ 4 မူင်း ၵႃးတင်းရူတ်ႉၶိူင်ႈၽႃႇၵၼ်တီႈ မၢႆလၵ်း 214 ၼႂ်းၵႄႈၵူတ်ႉၶၢႆ တင်း သႅၼ်ဝီ ၼႂ်းၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။ ၸဝ်ႈၵႃးဢၼ်ၽႃႇတမ်ၺႃးရူတ်ႉၶိူင်ႈၼၼ်ႉ ပၢႆႈဝႆႉ ဝႃႈၼႆ။
ၸၢႆးၾႃႉ ၸုမ်းၸွႆႈထႅမ် တူင်ႇဝူင်းၵူၼ်း သႅၼ်ဝီ (အနှိုင်းမဲ့ ကုသိုလ် လူမှုကူညီရေးအသင်း) လၢတ်ႈတီႈၽူႈတွႆႇႁွၵ်ႈဝႃႈ “ ရူတ်ႉၶိူင်ႈၼၼ်ႉ ၽူႈၸၢႆး 2 ၵေႃႉ ၶီႇမႃးၸွမ်းၵၼ် ။ ၵေႃႉၼိုင်ႈတႄႉ တိူဝ်ႉၺႃးတီႈၵွၵ်းႁူဝ်ၾၢႆႇလင်၊ ၶႃၵေႃႈႁၵ်း မိုဝ်းၵေႃႈ ႁၵ်း မၢတ်ႇၸဵပ်းလိူဝ်ႁႅင်း။ ထႅင်ႈၵေႃႈၼိုင်ႈတႄႉ မၢတ်ႇၸဵပ်းယူႇၵူၺ်းဢမ်ႇထိုင်တီႈလႆႈမႆႈၸႂ်။ ဢွင်ႈတီႈၼၼ်ႉ ၸမ်ၵူတ်ႉ ၶၢႆလႄႈ ႁဝ်းၶႃႈ တေႃႉၵႂႃႇသူင်ႇဝႆႉတီႈႁူင်းယႃ ၵူတ်ႉၶၢႆၶႃႈဢေႃႈ ” ဝႃႈၼႆ။
ၽူႈၸၢႆး 2 ၵေႃႉ ဢၼ်ထုၵ်ႇၺႃးၵႃးၽႃႇၼၼ်ႉ ၵေႃႉၼိုင်ႈ ဢႃယု မွၵ်ႈ 30 ပၢႆလႄႈ ထႅင်ႈၵေႃႉၼိုင်ႈသမ်ႉ ဢႃယု တေမီး 20 ပၢႆၼႆႉ ဝႃႈၼႆ။
ရူတ်ႉၵႃးဢၼ်မႃးၽႃႇၶႃၼၼ်ႉတႄႉ ပဵၼ်ရူတ်ႉၽႂ် လုၵ်ႉလႂ်မႃးဢမ်ႇႁူႉ။ ယွၼ်ႉဝႃႈ ၽႃႇၺႃးယဝ်ႉ ႁေႃႈပၢႆႈၵမ်းလဵဝ် ဝႃႈၼႆ။
ၸၢႆးၾႃႉ လၢတ်ႈဝႃႈ “ ၵၢၼ်ႁေႃႈ ရူတ်ႉၼႆႉ ၶႂ်ႈႁႂ်ႈဢွၼ်ၵၼ်ၾၢင်ႉသတိၼမ်ၼမ်ၶႃႈ။ ယွၼ်ႉဝႃႈ တၢင်းသဵၼ်ႈၼႆႉ ပဵၼ် တၢင်းလူင် သဵၼ်ႈတၢင်းလီ၊ သဵၼ်ႈတၢင်းၵႂၢင်ႈ” ဝႃႈၼႆ။
မိူဝ်ႈဝၼ်းတီႈ 3/4/2020 ယၢမ်းႁူဝ်ၶမ်ႈ 5 မူင်းပၢႆ ၼၼ်ႉၵေႃႈ ၵႃးတၢင်ႇၵူၼ်း(မၢၼ်ႇလူင်ႇ) လၢမ်းၼိုင်ႈ ပိၼ်ႈၶႂမ်ႈ တီႈတၢင်း လူင်းလွႆ ႁိမ်းဝၢၼ်ႈပဵင်း (ထုင်ႉလွႆသၢမ်သိပ်း) ယၢၼ်ၵႆ ဝဵင်းၵူတ်ႉၶၢႆ 38 လၵ်း ၼႂ်းၵႄႈ ၵူတ်ႉၶၢႆ – သႅၼ်ဝီၼၼ်ႉ မီးၵူၼ်း သႅၼ်း ဢႃယု 20 ပီ (ၸၢႆး) ၵေႃႉၼိုင်ႈ လႆႈလူႉတၢႆထင်တီႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ