ၵၢင်ဝဵင်းလႃႈသဵဝ်ႈ ၼၢင်းယိင်းၵေႃႉၼိုင်ႈ ဢွၵ်ႇပႆတၢင်းၵၢင်ၼႂ် ၺႃးၵူၼ်းႁၢႆႉလၢၵ်ႈၸၼ်ထုပ်ႉမင် ၶိုင်လူလၢႆၵၼ်ႉၸၼ် ၵူၼ်းဝၢၼ်ႈႁူမ်ႈၵၼ်ၸွႆႈထႅမ် တီႉၺွပ်းတူဝ်ၵူၼ်းႁၢႆႉ။

မိူဝ်ႈၼႆႉ ဝၼ်းတီႈ 8/4/2020 ယၢမ်းၵၢင်ၼႂ်မွၵ်ႈ 6 မူင်း ၼၢင်းယိင်းၵေႃႉ႞ ဢႃယုမွၵ်ႈ 50 ပီ ဢွၵ်ႇပႆတၢင်း။ ၽွင်းပွၵ်ႈမႃး ထိုင်ပွၵ်ႉ 8 ၼၼ်ႉၺႃးၵူၼ်းႁၢႆႉၵေႃႉၼိုင်ႈ ပေႃႉထုပ်ႉလၢၵ်ႈၸၼ် ၶိုင်ဢၢင်ႈၵၼ်ႉၸၼ်။ မၼ်းၼၢင်းတၼ်းပၢႆႈလွတ်ႈသေ ႁွင်ႉပၢဝ်ႇယွၼ်းတၢင်းၸွႆႈလႄႈၵူၼ်းဝၢၼ်ႈဢွၼ်ၵၼ်ၸွႆႈၶႄ တီႉလႆႈၵူၼ်းႁၢႆႉ။

ၸၢႆးထုၼ်းထုၼ်းဝိၼ်း ၵူၼ်းပွၵ်ႉ 7 လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်မႃးတၢင်းပွၵ်ႉ 8 ဢေႃႈ။ ၽိူဝ်ႇထိုင်မႃးတၢင်းပွၵ်ႉ 7 ၼႆႉ ႁဝ်းၶႃႈလႆႈငိၼ်းသေ ဢွၼ်ၵၼ် ဢွၵ်ႇၵႂႃႇၸွႆႈ ။ ၼၢင်းယိင်းၼၼ်ႉ ၺႃးထုပ်ႉၼႃႈပေႃးၵႂ်ႈပၢၵ်ႇပေႃးၵႂ်ႈ သိူဝ်ႈၶူဝ်းပေႃး သိၵ်ႇယွၵ်းၵႂႃႇမူတ်းဢေႃႈ။ လႆႈႁူႉတႄႉၵေႃႈ ဢမ်ႇတၼ်းလႆႈလူလၢႆၼင်ႇၵဝ်ႇၶႃႈ” – ဝႃႈၼႆ။

ၵူၼ်းႁၢႆႉၼၼ်ႉ ယူႇတီႈၽူႈၵွၼ်းပွၵ်ႉ လႄႈ သိုၵ်းၵူၼ်းမိူင်း ၶဝ်တီႉၺွပ်းဢဝ်ၵႂႃႇ သူင်ႇႁူင်း ပလိၵ်ႈယဝ်ႉ ဝႃႈၼႆ။

ၸၢႆးလႃႉ ၵူၼ်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၵူႈပွၵ်ႈ တီႈလႃႈသဵဝ်ႈႁဝ်းၶႃႈၼႆႉ မီးၶီႈလၵ်ႉၵူၼ်းၸူၼ်ၵူၺ်း။ လွင်ႈၶိုင်ၵၼ်ႉၸၼ်ၸိူင်ႉၼႆတႄႉ ဢမ်ႇမီး။ ဝၼ်းမိူဝ်ႈၼႆႉ ၼၢင်းယိင်းဢႃယု 50 ပၢႆၵေႃႈ ဢမ်ႇဝႆႉ။ ဢမ်ႇမီးလွင်ႈႁူမ်ႇလူမ်ႈသေဢိတ်းယဝ်ႉ ”ဝႃႈၼႆ။

ၾၢႆႇၼိုင်ႈၵေႃႈ ဝဵင်းလႃႈသဵဝ်ႈၼႆႉ ယၢမ်းလဵဝ် ၵူၼ်းသူႇသမ်းၵိၼ်ယႃႈမဝ်းၵမ်ၵေႃႈလိူင်ႇၼမ်မႃးႁႅင်းလႄႈ ၵၢၼ်ၵေႃႇၵၢၼ် ႁၢႆႉၵေႃႈမီးၼမ်မႃး။

ၵဵဝ်ႇၵပ်းလွင်ႈၼႆႉ ၵူၼ်းပိုၼ်ႉတီႈတႄႉ လၢတ်ႈဝႃႈ ၶႂ်ႈႁႂ်ႈၸဝ်ႈၼႃႈတီႈ ပၼ်တူတ်ႈတၢမ်ႇ ၽူႈပူၼ်ႉပႅၼ်ၼၼ်ႉၼၵ်း ၼၵ်းၼႃၼႃ ႁႂ်ႈပဵၼ်တူဝ်ယၢင်ႇ ယႃႇႁႂ်ႈမီးၵူၼ်းႁတ်းႁဵတ်းပူၼ်ႉပႅၼ်ၸိူင်ႉၼႆထႅင်ႈ ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇၸူး ႁူင်းပလိၵ်ႈၸႄႈဝဵင်းလႃႈသဵဝ်ႈၵေႃႈ ဢမ်ႇႁပ်ႉသၢႆ ။