ၵူၼ်းတိတ်းၸပ်းၸိူဝ်ႉမႅင်း ၶူဝ်ႊဝိတ်ႉ – 19 ၼႂ်းမိူင်းႁူမ်ႈတုမ် ၽိူမ်ႉၶိုၼ်ႈမႃးထႅင်ႈၵေႃႉၼိုင်ႈ တေႃႈလဵဝ် မီးၵူၼ်းၸပ်း တၢင်းပဵၼ်ၵႂႃႇ တင်းမူတ်း 22 ၵေႃႉယဝ်ႉ။
ဝၼ်းတီႈ 6/4/2020 ယၢမ်းၵၢင်ၶမ်ႈ 8 မူင်း ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဝႃႈ ၵူတ်ႇထတ်းထူပ်း ႁၼ်ထႅင်ႈ ၵူၼ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ထႅင်ႈ 1 ၵေႃႉ ၼႂ်းမိူင်းႁူမ်ႈတုမ် ဝႃႈၼႆ။
ၵူၼ်းမိူင်း ဢၼ်ၸပ်းတၢင်းပဵၼ်ၶူဝ်ႊဝိတ်ႉ 19 ၵေႃႉၼိုင်ႈၼႆႉ ပဵၼ်ၼၢင်းယိင်း ဢႃယု 51 ပီ မၼ်းၼၢင်းၼႆႉလုၵ်ႉမိူင်း ဢ မေႊရိၵႃႊ မႃးလူင်း မိူင်းၵူဝ်ႊရီႊယိူဝ်ႊ၊ မိူင်းထႆး သေမႃးထိုင်ၶိုၼ်းဝဵင်းတႃႈၵုင်ႈမိူဝ်ႈဝၼ်းတီႈ 26/3/2020 ။ မၼ်းၼၢင်းၼႆႉ ဢွၵ်ႇၶၢဝ်းတၢင်းၸွမ်းၵၼ်တင်းၵူၼ်းတိတ်းၸပ်းတၢင်းပဵၼ်ၵေႃႉထူၼ်ႈ 21 ဢၼ်ပဵၼ်ၼၢင်းယိင်း ဢႃယု 24 ၼၼ်ႉ ဝႃႈၼႆ။
ယၢမ်းလဵဝ်ၸဝ်ႈၼႃႈတီႈသူင်ႇတူဝ်မၼ်းၼၢင်းၵႂႃႇႁူင်းယႃဝေႇပႃႇၵီႇ ဝဵင်းတႃႈၵုင်ႈ တႃႇယူတ်းယႃတူဝ်။ ပၢႆးယူႇလီ မၼ်းၼၢင်းယၢမ်းလဵဝ်ၶႅမ်ႉလႅပ်ႈယူႇ ဝႃႈၼႆ။
တေႃႈလဵဝ် ၵူၼ်းၸပ်းတၢင်းပဵၼ် ၶူဝ်ႊဝိတ်ႉ 19 ၼႂ်းမိူင်းႁူမ်ႈတုမ်ၼႆႉ တင်းမူတ်းမီးဝႆႉ 22 ၵေႃႉ၊ တၢႆ ၵေႃႉ ႞ ယဝ်ႉ။ ၼႂ်း ၼၼ်ႉ ၼႂ်းမိူင်းတႆး ထူပ်းႁၼ်ဝႆႉ ၵေႃႉၼိုင်ႈ။ ပဵၼ်ၵူၼ်းမိူင်းၵျွၵ်ႉမႄး။ တေႃႈလဵဝ် လႆႈသူင်ႇမႃးယူတ်းယႃ တူဝ်ဝႆႉတီႈ ႁူင်း ယႃလူင် လႃႈသဵဝ်ႈယဝ်ႉသေ ၸဝ်ႈၼႃႈတီႈ ပႂ်ႉတူၺ်းၵူၼ်းႁိူၼ်းမၼ်းၸၢႆးဝႆႉယူႇ ဝႃႈၼႆ။
တေႃႈလဵဝ် ၵူၼ်းၸပ်းတၢင်းပဵၼ် ၶူဝ်ႊဝိတ်ႉ 19 တၢင်းလုမ်ႈၾႃႉၼႆႉ မီး 1,347,235 ၵေႃႇ၊ တၢႆ 74,767 ၵေႃႉလႄႈ ယႃၶႅၼ်း 286,234 ၵေႃႉ ယူႇတီႈႁွင်ႈၵၢၼ်ပၢႆးယူႇလီလုမ်ႈၾႃႉ worldometers ဢွၵ်ႇဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ