မိူဝ်ႈၼႆႉ ဝၼ်းတီႈ 2/4/2020 ယၢမ်းၵၢင်ၶမ်ႈ 8 မူင်း ယူႇတီႈႁွင်ႈၵၢၼ် ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဝႃႈ ၵူတ်ႇထတ်းထူပ်း ႁၼ် ထႅင်ႈ ၵူၼ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ထႅင်ႈ 4 ၵေႃႉ ၼႂ်းမိူင်းႁူမ်ႈတုမ် ဝႃႈၼႆ။

ၵူၼ်းမိူင်း ဢၼ်ၸပ်းတၢင်းပဵၼ်ၶူဝ်ႊဝိတ်ႉ 19 သီႇ ၵေႃႉၼၼ်ႉ ပဵၼ်ၵူၼ်းဝဵင်းပွၵ်ႉၶွင်း တိူင်းပႃႇၵိူဝ်ႇ ၽူႈၸၢႆး ဢႃယု 47 ပီ ၵေႃႉ ၼိုင်ႈ (ပဵၼ်ပေႃႈ)၊ လုၵ်ႈၸၢႆးဢႃယု 10 ၶူပ်ႇ ၊ လုၵ်ႈယိင်း ဢႃယု 8 ၶူပ်ႇ လႄႈလၢၼ်ယိင်း ဢႃယု 18 ပီ ၊ ပဵၼ်ၵူၼ်းႁိူၼ်းလဵဝ်ၵၼ် ၊ ပဵၼ်ၵူၼ်းႁူပ်ႉထူပ်းၵၼ်တင်း ၵူၼ်းပဵၼ်ဢၼ်လူင်ပွင်ၸိုင်ႈပိုၼ်ၽၢဝ်ႇပဵၼ်ၵေႃႉထူၼ်ႈ 15 မိူဝ်ႈဝၼ်းတီႈ 31/3/2020 ၼၼ်ႉဝႃႈၼႆ။ ယၢမ်းလဵဝ် ၸိူဝ်းၶဝ် 4 ၵေႃႉပေႃႈလုၵ်ႈလုင်းလၢၼ် ယူတ်းယႃတူဝ်ဝႆႉတီႈႁူင်းယႃၸႄႈဝဵင်းပွၵ်ႉၶွင်းဝႆႉ ဝႃႈၼႆ။

တေႃႈလဵဝ် ၵူၼ်းၸပ်းတၢင်းပဵၼ် ၶူဝ်ႊဝိတ်ႉ 19 ၼႂ်းမိူင်းႁူမ်ႈတုမ်ၼႆႉ တင်းမူတ်းမီးဝႆႉ 20 ၵေႃႉ၊ တၢႆ ၵေႃႉ ႞ ယဝ်ႉ။ ၼႂ်းၼၼ်ႉ ၼႂ်းမိူင်းတႆး ထူပ်းႁၼ်ဝႆႉ ၵေႃႉၼိုင်ႈ။ ထူပ်းႁၼ်တီႈႁူင်းယႃၵျွၵ်ႉမႄး။ တေႃႈလဵဝ် လႆႈသူင်ႇမႃးယူတ်းယႃတူဝ်ဝႆႉတီႈ ႁူင်းယႃလူင် လႃႈသဵဝ်ႈယဝ်ႉ ဝႃႈၼႆ။

တေႃႈလဵဝ် ၵူၼ်းၸပ်းတၢင်းပဵၼ် ၶူဝ်ႊဝိတ်ႉ 19 တၢင်းလုမ်ႈၾႃႉၼႆႉ မီး 961,589 ၵေႃႇ၊ တၢႆ 49,165 ၵေႃႉလႄႈ ယႃၶႅၼ်း 203,176 ၵေႃႉ ယူႇတီႈႁွင်ႈၵၢၼ်ပၢႆးယူႇလီလုမ်ႈၾႃႉ worldometers ဢွၵ်ႇဝႆႉ။