ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ဢၼ်တူင်ႉၼိုင်ဝႆႉ တၢင်းပွတ်းမေႃႇတွင်း – တႃႈလူင် ၸွမ်းသဵၼ်ႈတၢင်းလူင် မူႇၸေႊ လႃႈသဵဝ်ႈ – ဝဵင်းလိူဝ်ႇ ၸိူဝ်းၼၼ်ႉ ႁႄႉရူတ်ႉၵႃးတၢင်ႇၵုၼ်ႇ ၵူၼ်းမိူင်း ဢၼ်လႅၼ်ႈၼိူဝ်သဵၼ်ႈတၢင်းလူင်ၼၼ်ႉသေ ၵဵပ်းၶွၼ်ႇထႅင်ႈ။

မိူဝ်ႈဝၼ်းတီႈ 30/3/2020 ၼၼ်ႉ ၵႃးလူင် တင်းမူတ်း 6 လမ်း ဢၼ်လုၵ်ႉတၢင်းမူႇၸေႊလူင်းမႃး တၢင်းလႃႈသဵဝ်ႈ – ဝဵင်း လိူဝ်ႇၼၼ်ႉ ၺႃးၸုမ်းယိပ်းၵွင်ႈၵၢင်ႇ ႁႄႉၵိုတ်းသေ ၵုမ်းၶင်တူဝ်ၸဝ်ႈၵႃး ၵူၼ်းၸွမ်းၵႃးဝႆႉ တီႈႁိမ်းဝၢၼ်ႈမေႃႈတွင်း- တႃႈလူင် ႁိမ်းၶူဝ်ၼမ်ႉပေႃႈ ၼိူဝ်သဵၼ်ႈတၢင်းလူင် မူႇၸေႊ – ဝဵင်းလိူဝ်ႇ ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။

ၸၢႆးမၢဝ်း ၵူၼ်းႁေႃႈၵႃး လႅၼ်ႈတၢင်းမူႇၸေႊ – လႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပွၵ်ႈၼႆႉၵေႃႈ ၸဝ်ႈၵႃးလူင်ၶဝ် ထုၵ်ႇ တီႉၺွပ်းတူဝ်ဝႆႉသေ ၺႃးၵဵပ်းၶွၼ်ႇ ။ တင်းမူတ်းတေမီးၵႃးလူင် 6 လမ်း ဢၼ်ၵိုတ်းဝႆႉ ႁိမ်းၶၢင်ႈတၢင်းၼၼ်ႉ မိူၼ် ၼင်ႇ ၵႃး 12 လေႃႉ လမ်းၼိုင်ႈ၊ ၵႃးလူင် 22 လေႃႉ 5 လမ်းၵိုတ်းဝႆႉ ၼႂ်းၵႄႈဝၢၼ်ႈတႃႈလူင် – ၶူဝ် ၼမ်ႉပေႃႈ” ဝႃႈၼႆ။

ၼႂ်းၵႄႈသဵၼ်ႈတၢင်းၸိူဝ်းၼၼ်ႉ ပဵၼ်ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း လၢႆလၢႆၸုမ်းတူင်ႉၼိုင်ၵႂႃႇမႃး ယူႇတႃႇသေႇ ဝႃႈၼႆ။

ၸၢႆးမၢဝ်း လၢတ်ႈဝႃႈ “ တီႈၼၼ်ႈ ၵမ်ႈၼမ် ပဵၼ်သိုၵ်းၶၢင် တူင်ႉၼိုင်ဝႆႉၶႃႈဢေႃႈ။ ယဝ်ႉၵေႃႈ ဢၼ်ၵႆႉလတ်းၽၢၼ်ႇၵေႃႈ ပဵၼ်သိုၵ်းလွႆ ၸိူဝ်းၼႆႉၵေႃႈပႃးၶႃႈယဝ်ႉ။ လႅပ်ႈတေပဵၼ်သိုၵ်းၸိူဝ်းၼႆႉၵူၺ်းၶႃႈ ဢၼ်တေၵဵပ်းၶွၼ်ႇၵေႃႈ။ မိူဝ်ႈဝႃး ဝၼ်း တီႈ 31 ယၢမ်းၸဝ်ႉၼၼ်ႉတႄႉ လႆႈႁၼ်သိုၵ်းမၢၼ်ႈ မႃးပႂ်ႉဢဝ်ႁူမ်ႇလူမ်ႈၸွမ်းၵႃး ၸိူဝ်းၼၼ်ႉဝႆႉယူႇ” ဝႃႈၼႆ။

ယွၼ်ႉပိူင်ပဵၼ်ၵဵပ်းၶွၼ်ႇယွၼ်းငိုၼ်းၵႆႉၵႆႉပဵၼ်မႃးလႄႈ ၵူၼ်းၵႃႉ ၸဝ်ႈၵႃး လႅၼ်ႈသဵၼ်ႈတၢင်းၼႆႉ ဢွၼ်ၵၼ်မႆႈၸႂ်လွင်ႈ ႁူမ်ႇလူမ်ႈ။ ယၢပ်ႇၽိုတ်ႇလွင်ႈလႆႈပၼ်ၶွၼ်ႇၵႃႈယႂ်ႇၵႃႈသုင်။

လုင်းသႅင်ၶမ်းႁိူင်း ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ တီႈၼၼ်ႈ ၵႆႉပဵၼ်ၼႃႇ ၵမ်ႈၼမ်ပဵၼ်သိုၵ်းၶၢင် တူင်ႉၼိုင် ၵႂႃႇမႃး ။ ဢမ်ႇႁူႉၼႃ တၢင်ႇၸုမ်းၵေႃႈ တေမႃးယူႇ မႃးတူင်ႉၼိုင်ၸွမ်းယူႇယူဝ်ႉ။ ယဝ်ႉၵေႃႈ တီႈၼၼ်ႈ မၼ်းသမ်ႉ တေၵႆ ၵူၼ်းဝၢၼ်ႈဢိတ်းၼိုင်ႈၵေႃႈပႃး။ ပေႃးၶဝ်ၵဵပ်းၶွၼ်ႇၼိုင်ႈပွၵ်ႈၼႆ ၵႃးလူင်ၼိုင်ႈလမ်းဢမ်ႇယွမ်း 60 သႅၼ်ပျႃးၵႃႈၼႆႉ” ဝႃႈၼႆ။

ပိူင်ပဵၼ်ၵဵပ်းၶွၼ်ႇၸွမ်းသဵၼ်ႈတႃႈသၢႆတၢင်းၼႆႉၵႆႉမီးယူႇသေတႃႉ ၾၢႆႇသိုၵ်းလႄႈ ပလိၵ်ႈလူင်ပွင်ၸိုင်ႈ ဢမ်ႇတွၼ်ႉၶတ်းၸႂ်သႂ်ႇႁႅင်းလႄႈ ဢမ်ႇႁၼ်တီႉလႆႈၽူႈပူၼ်ႉပႅၼ်ၵဵပ်းၶွၼ်ႇသေပွၵ်ႈ ၸဝ်ႈၵႃးထုင်ႉၼၼ်ႉလၢတ်ႈၼေၼင်ႇၼႆ။

“ၵဵဝ်ႇလူၺ်ႈလွင်ႈၸိူဝ်းၼႆႉ သိုၵ်းလူင်ပွင်ၸိုင်ႈမၢၼ်ႈၵေႃႈႁူႉယူႇ ၶဝ်ၵေႃႈ ပွႆႇပၼ်ႁဵတ်းၸိူင်ႉၼၼ် ပေႃးလၢတ်ႈ သိုဝ်ႈသိုဝ်ႈၵေႃႈ ဢမ်ႇဢဝ်ႁူမ်ႇလူမ်ႈပၼ်ၵူၼ်းမိူင်း ။ ဢၼ်ယၢပ်ႇၽိုတ်ႇတႄႉၵေႃႈ ပဵၼ်ၵူၼ်းမိူင်း ၸဝ်ႈၵႃး ၵူၼ်းၵႃႉၵုၼ်ၶဝ်ၸိူဝ်းၼႆႉ” ၸဝ်ႈၵႃးၵေႃႉၼိုင်ႈလၢတ်ႈၼေၼင်ႇၼႆ။

ၵူၼ်းႁေႃႈၵႃး ၵူၼ်းၸွမ်းၵႃး ဢၼ်ထုၵ်ႇႁွင်ႉတူဝ်ၵႂႃႇ မိူဝ်ႈဝၼ်းတီႈ 30 ၼၼ်ႉ ထိုင်မႃး ဝၼ်းတီႈ 31 ယၢမ်း ဝၢႆးဝၼ်း ၸင်ႇပွႆႇတူဝ်ၶိုၼ်း ။ ၵူၺ်းၵႃႈ ၵႃးလူင် ဢၼ်ၺႃး ၵဵပ်းၶွၼ်ႇၸိူဝ်းၼၼ်ႉ ပဵၼ်ၵႃးၽႂ် ဢၼ်ဝႃႈၼၼ်ႉ ဢမ်ႇလႆႈႁူႉဝႃႈၼႆ။

မိူဝ်ႈဝၼ်းတီႈ 2/3/2020 တီႈႁိမ်းၼႆႉၵူၺ်း မီးၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ( သိုၵ်းၶၢင်) ပႂ်ႉၵဵပ်းၶွၼ်ႇ ရူတ်ႉၵႃးလူင် ၵႃး 12 လေႃႉလႄႈ ၵႃး 22 လေႃႉ ၼိုင်ႈလမ်းလႂ် ဢမ်ႇယွမ်း 60 သႅၼ်ပျႃး။