SHRF ဝႃႈ သိုၵ်းလူင်ပွင်ၸိုင်ႈမၢၼ်ႈ ဢမ်ႇမီးတၢင်းဢၢႆ ၼႄၼမ်ႉၸႂ် ပုၼ်ႈသုၼ်ႇတူဝ်သေ ၸႂ်ႉတိုဝ်းငိုၼ်းၸိုင်ႈမိူင်း ပိုတ်ႇၼႃႈသိုၵ်း ၸူးၼႂ်းမိူင်းၶိုၼ်း ဝႃႈၼႆ။
မိူဝ်ႈၼႆႉ ဝၼ်းတီႈ 27/3/2020 ယူႇတီႈ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး SHRF ဢွၵ်ႇၽိုၼ်တၢမ်းငဝ်းလၢႆး ဢမ်ႇႁၼ်လီၼိူဝ် သိုၵ်းလူင်ပွင်ၸိုင်ႈမၢၼ်ႈ ပိုတ်ႇၼႃႈသိုၵ်းတေႃႇ RCSS/SSA တီႈၸႄႈဝဵင်းမိူင်းၵိုင် မိူဝ်ႈဝၼ်းတီႈ 272/2020 ၼၼ်ႉသေ ယိုဝ်းၵွင်ႈ တိူဝ်ႉၸပ်းႁိူၼ်းၵူၼ်းမိူင်း သွၵ်ႈတဝ်ယႃႉၶူဝ်းႁိူၼ်းယေးၵူၼ်းမိူင်း တဵၵ်းၸႂ်ႉႁႅင်း လၢႆၵူၼ်းမိူင်း ၸဵမ်ၸိူဝ်းၼႆႉ။
တႄႇဢဝ် မိူဝ်ႈဝၼ်းတီႈ 27/2/2020 မႃး သိုၵ်းလူင်ပွင်မၢၼ်ႈၵဝ်ႈတပ်ႉၵွင် ဢဵၼ်ႁႅင်းမွၵ်ႈ 1,500 ပိုတ်ႇၼႃႈသိုၵ်းၼႂ်းမိူင်းၵိုင် ၸိုင်ႈတႆးပွတ်း ၸၢၼ်း ပိူဝ်ႈတႃႇယိုတ်းတပ်ႉလွႆသုင် RCSS/SSA တီႈလွႆတွၼ်း။ သိုၵ်းလူင်ပွင်ၸိုင်မၢၼ်ႈယိုဝ်းၵွင်ႈလူင် ၵႂႃႇၵူႈႁူးၵူႈတၢင်း ။ ႁဵတ်းႁႂ်ႈၵူၼ်းဝၢၼ်ႈမွၵ်ႈ 800 လႆႈပၢႆႈႁိူၼ်းယေး။ ၽွင်းၵူၼ်းဝၢၼ်ႈပၢႆႈၼၼ်ႉ တပ်ႉသိုၵ်းလူင်ပွင်ၸိုင်ႈ ၶဝ်ႈတဝ်ႁိူၼ်းယေးၵူၼ်းဝၢၼ်ႈ။ ဝၢႆးလင်ပၢင်တိုၵ်းယဝ်ႉ တပ်ႉသိုၵ်းၸႂ်ႉႁႅင်းလၢႆၵူၼ်းဝၢၼ်ႈတႃႉ 17 ဝၢၼ်ႈ။ ႁႂ်ႈႁႃမႆႉသူင်ႇပၼ်တႃႇသၢင်ႈတပ်ႉ။ ယွၼ်းၶိူင်ႈၸၢၵ်ႈ ရူတ်ႉၵႃး ထေႃႈလႃႈၵျီႈ ဢဝ်မႃးၸႂ်ႉၼႂ်းတပ်ႉ ၼိုင်ႈဝၼ်းဢမ်ႇယွမ်း 7 လမ်း။
ၸၢႆးႁေႃသႅင် ၽူႈၶၢၼ်ပၢၵ်ႇ SHRF လၢတ်ႈတီႈၽူႈတွႆႇႁွၵ်ႈ “ ပေႃးတင်းဝႃႈ သိုၵ်းမၢၼ်ႈမီး ၵၢင်ၸႂ်ၶႂ်ႈႁႂ်ႈဝၢၼ်ႈမိူင်းမီး လွင်ႈ ငမ်းယဵၼ်တႄႉယူႇၸိုင် ၸၼ်ႉၽူႈၼမ်းသိုၵ်းမၢၼ်ႈၶဝ်ထုၵ်ႇလီ ၸီႉသင်ႇၵိုတ်းလွင်ႈတဝ်ႁႃ ၸုမ်းၼၼ်ႉၸုမ်းၼႆႉသေ ၵိုတ်းလွင်ႈတူင်ႉၼိုင်ၵၢၼ်သိုၵ်းယဝ်ႉ ။ ၽွင်းတၢင်းပဵၼ်ၵႃႇလ ၶူဝ်ႊဝိတ်ႊ -19 ၽႄႈလၢမ်းယူႇ မိူင်းလႂ်ၽႂ်ပႆႇႁႃႁၼ်ယႃႈယႃ ဢၼ်တေ ႁႄႉၵင်ႈ ဢၼ်တေၶႃႈမၼ်းလႆႈၼႆႉ သိုၵ်းမၢၼ်ႈထုၵ်ႇလီ ၸွႆႈၵႅတ်ႇၶႄႁႄႉၵင်ႈတၢင်းပဵၼ်ပၼ်ၵူၼ်းမိူင်း ဢမ်ႇၸႂ်ႈလူဝ်ႇဝၵ်ႉ ဢဝ်တိုဝ်ႉတၢင်းသေ ယိုဝ်းၸုမ်းၼၼ်ႉၸုမ်းၼႆႉ ႁဵတ်းႁႂ်ႈၵူၼ်း မိူင်းလႆႈၵူဝ်လႆႈႁႄလႆႈပၢႆႈယူႇတိၵ်းတိၵ်း။ ၵူၼ်းမိူင်းၸိူဝ်း လႆႈလုသုမ်းၶူဝ်းၶွင်ၼၼ်ႉယူႇတီႈလူင်ပွင်ၸိုင်ႈထုၵ်ႇလီႁပ်ႉဢဝ် ပုၼ်ႈၽွၼ်းၸွႆႈထႅမ်ပၼ်ၶိုၼ်းတဵမ်တဵမ် ၼၼ်ႉယဝ်ႉ” ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉထႅင်ႈဝႃႈ “ လွင်ႈၼႆႉသိုၵ်းမၢၼ်ႈတိုၼ်းဢမ်ႇမီးတၢင်းဢၢႆသင် သေပူၼ်ႉပႅၼ်ၶေႃႈ တူၵ်းလူင်း ၵိုတ်းယိုဝ်း ၼင်ႇႁိုဝ်တေလႆႈၶႂၢၵ်ႈသိုၵ်း သိုပ်ႇ ၵုမ်းၵမ်ၼႃႈတီႈၼႂ်းၸိုင်ႈတႆးသေ တိုၼ်းၼႄဝႃႈသိုၵ်းမၢၼ်ႈ တိုၼ်းဢမ်ႇ မီးၵၢင်ၸႂ်သိုဝ်ႈယူဝ်းတေႃႇၶၵ်ႉၵၢၼ်လွင်ႈငမ်း ယဵၼ် ၼၼ်ႉယဝ်ႉ။ သိုၵ်းမၢၼ်ႈယင်းၼႄၼမ်ႉၸႂ်ပုၼ်ႈသုၼ်ႇ တူဝ်ဢၼ် ဢမ်ႇမီးတၢင်းဢၢႆသေ ၸႂ်ႉတိုဝ်းငိုၼ်းၸိုင်ႈမိူင်းပိုတ်ႇၼႃႈသိုၵ်းၼႂ်းမိူင်းယူႇ ၽွင်းထုၵ်ႇလီဢဝ်ငိုၼ်း ၸိူဝ်းၼၼ်ႉ မႃးၸႂ်ႉ တိုဝ်း ႁႄႉၵင်ႈတၢင်းပဵၼ်ၵႃႇလ ၸိူဝ်ႉမႅင်း ၶူဝ်ႊဝိတ်ႊ 19 (Covid-19) ဢၼ်ပဵၼ်ၽေးလူင်တေႃႇ လုမ်ႈၾႃႉယၢမ်း လဵဝ် ပႃးၸဵမ်မိူင်းမၢၼ်ႈ” ဝႃႈၼႆ။
တပ်ႉသိုၵ်း ၵဝ်ႈတပ်ႉၵွင်ဢၼ်ပိုတ်ႇၼႃႈသိုၵ်းတေႃႇတပ်ႉသိုၵ်း RCSS/SSA တီႈသၼ်လွႆတွၼ်းၼၼ်ႉပဵၼ်တပ်ႉ ၶမယ 520၊ 574လႄႈ575 တႂ်ႈတိူင်းသိုၵ်းဝၼ်းဢွၵ်ႇ (တူၼ်ႈတီး)၊ ၶမယ 136၊ 325 လႄႈၶ လယ 22၊ 33 တႂ်ႈတိူင်းသိုၵ်းၸဵင်ႇႁွင်ႇ ဝၼ်းဢွၵ်ႇ(လႃႈသဵဝ်ႈ) လႄႈ ၶမယ 246၊ 525 တႂ်ႈ တိူင်းသိုၵ်း ဝၼ်းဢွၵ်ႇၵၢင် (ၶူဝ်လမ်) ဝႃႈၼႆ။
လိူဝ်ၼၼ်ႉ ယူႇတီႈ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး တုၵ်းယွၼ်းႁႂ်ႈတူင်ႇဝူင်းလုမ်ႈၾႃႉ ႁႂ်ႈၵိုတ်းယိုတ်း (ၵၢၼ်လူင်း တိုၼ်းလၢင်း) ၸွမ်းမိူင်းမၢၼ်ႈ။ သင်ဝႃႈဢမ်ႇၸႂ်ႉလၢႆးၽွင်းၶဵဝ်လႄႈႁႅတ်ႉပၢႆးမၢၵ်ႈမီးႁၢဝ်ႉႁႅင်းၸိုင် သိုၵ်းမၢၼ်ႈတိုၼ်းတေ ႁတ်းသိုပ်ႇပူၼ်ႉပႅၼ် ၶႂၢၵ်ႈၼႃႈသိုၵ်းသေသိုပ်ႇပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်းလႄႈ သဵၼ်ႈတၢင်းငမ်းယဵၼ်ၼၼ်ႉ တေႁၢင်ႇၵႆယိူင်းမၢႆမၼ်းၵႂႃႇ တိၵ်းတိၵ်းၵူၺ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ