ၾႆးမႆႈႁိူၼ်းၵူၼ်းဝၢၼ်ႈဝေႃႇႁိူဝ်း ၵဵင်းတုင် လင်ၼိုင်ႈ ၶူဝ်းၶွင်ႁိူၼ်းယေး မႆႈၸႂ်ၸွမ်းၾႆးမူတ်း ဢမ်ႇတၼ်းလႆႈသင်။
ဝၼ်းတီႈ 24/3/2020 ယၢမ်းၵၢင်ၼႂ်ၸဝ်ႉ မွၵ်ႈ 2 မူင်းၼၼ်ႉ ၾႆးမႆႈႁိူၼ်းလုင်းၸၢႆးသႆႇ ဢႃယု 60 ပၢႆ ဝၢၼ်ႈဝေႃႇႁိူဝ်း ပွၵ်ႉ 3 ဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ယွၼ်ႉၾႆးၾိုၼ်း/ ထၢၼ်ႇ တီႈမုၵ်ႉၾႆးလၢမ်းဝႆႉ ဝႃႈၼႆ။
ၵူၼ်းဝၢၼ်ႈဝေႃႇႁိူဝ်း ပွၵ်ႉ 3 လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ မိူဝ်ႈၼႆႉ ယၢမ်းၵၢင်ၼႂ် ၾႆးလႆႈမႆႈၵႂႃႇ ႁိူၼ်းၵူၼ်း ဝၢၼ်ႈ လင်ၼိုင်ႈ ၶူဝ်းၶွင်ႁိူၼ်းယေးတႄႉ ဢမ်ႇတၼ်းလႆႈသင်ၶႃႈ။ လႆႈငိၼ်းဝႃႈတႄႉ လုၵ်ႉမႆႈတီႈ မုၵ်ႉၾႆးၼႂ်းသိုင်ႇၾႆး မႃးၼႆ။ တၢင်းႁဝ်းၼႆႉ ပေႃးယၢမ်း 10 မူင်းၵၢင်ၶိုၼ်းၵႂႃႇၼႆ ၾႆးၾႃႉလူင်ပွင်ၸိုင်ႈပၼ်ၼၼ်ႉ မွတ်ႇမူတ်းယဝ်ႉ။ တေႃႈလဵဝ် သမ်ႉ ပဵၼ်ၶၢဝ်းမႆႈၵေႃႈ ပိူင်ၼိုင်ႈ၊ ထုၵ်ႇလီဝႆႉသတိၵၼ်ၶႃႈယဝ်ႉ” ဝႃႈၼႆ။
ႁိူၼ်းယေး ဢၼ်လႆႈမႆႈၵႂႃႇၼၼ်ႉ မီးၵူၼ်းႁိူၼ်းယူႇၵေႃႉလဵဝ်။ ဢမ်ႇတၼ်းလႆႈ ၶူဝ်းၶွင်ႁိူၼ်း ယေးသင်။ တၼ်းလႆႈ ဢဝ်ရူတ်ႉၶိူင်ႈသေ ပၢႆႈလွတ်ႈမႃးၵူၺ်း။ လွင်ႈလူႉသုမ်း မီးၵႃႈၶၼ်ငိုၼ်းၵႃႈႁိုဝ် ဢၼ်ဝႃႈၼၼ်ႉ ပႆႇလႆႈႁူႉႁူဝ်ယွႆႈမၼ်း ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈၾၢႆႇၶႄၾႆး ၵဵင်းတုင် ဢဵၼ်ႁႅင်းၵူၼ်း မွၵ်ႈ 20 ၵေႃႉလႄႈ ရူတ်ႉၶႄၾႆး 4 လမ်း ႁူမ်ႈတင်း ၵူၼ်းဝၢၼ်ႈ ၸွႆႈၵၼ်ၶႄၾႆးၵႂႃႇ တေႃႇထိုင် 2 မူင်းၶိုင်ႈ ၸင်ႇတေမွတ်ႇ ဝႃႈၼႆ။
မိူဝ်ႈဝၼ်းတီႈ 19/3/2020 ယၢမ်းဝၢႆးဝၼ်း 2 မူင်းပၢႆၼၼ်ႉၵေႃႈ ၾႆးမႆႈပႃႇ လၢမ်ႈမႆႈႁိူၼ်းၵူၼ်းဝၢၼ်ႈၼွင်ၽုၵ်ႈ ဢိူင်ႇဝၢၼ်ႈ ၶုမ်ႉ ၸႄႈဝဵင်းမိူင်းၶၢၵ်ႇ ၸႄႈတွၼ်ႈၵဵင်းတုင် ၸိုင်ႈတႆးပွတ်းဢွၵ်ႇၶူင်း တင်းမူတ်း လၢမ်းမႆႈလင်ႁိူၼ်းၵူၼ်းဝၢၼ်ႈ 8 လင် ၶူဝ်းၶွင်ၼႂ်းႁိူၼ်းယေး ၽႃႈႁူမ်ႇၶူဝ်းၼွၼ်းလႄႈ ၶဝ်ႈပိူၵ်ႇ ဢိၵ်ႇပႃး ငိုၼ်းတွင်း ၸဵမ်ၸိူဝ်းၼႆႉ လႆႈမႆႈၵႂႃႇၸွမ်းၾႆး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ