ၶၢဝ်းၶူဝ်ႊဝိတ်ႉ – 19 ၽႄႈဝႆးၼႆႉ ၵၢၼ်ၵႃႉမၢၵ်ႇမႆႉသုမ်းၼပ်ႉႁူဝ်သိပ်းလၢၼ်ႉတေႃႊလႃႊ

ၶၢဝ်းတၢင်း တၢင်းပဵၼ် ဝူႊႁၢၼ်ႉ ဢမ်ႇၼၼ် ၶူဝ်ႊရူဝ်ႊၼႃႊ COVID-19 ၽႄႈလိူင်ႇၼႆႉ ၵူၼ်းမႃးသိုဝ်ႉၶၢႆမၢၵ်ႇမႆႉတီႈၵၢတ်ႇ 105 လၵ်း မူႇၸေႊ လူတ်းယွမ်းၵႂႃႇၶိုင်ႈပၢႆ၊ ၵၢၼ်သိုဝ်ႉၶၢႆလူႉသုမ်းၼမ်။

တႄႇဢဝ် လိူၼ်ၵျႅၼ်ႊၼိဝ်ႊရီႊ 2020 ၼႆႉမႃး ပၢင်ၵၢတ်ႇၵႃႉၶၢႆ တီႈ 105 လၵ်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ မီး လွင်ႈတုမ်ႉတိူဝ်ႉၵၢၼ်ၵႃႇၶၢႆ သူင်ႇမၢၵ်ႇမႆႉ ၸူးတၢင်းမိူင်းၶႄႇ တင်းၼမ်လၢႆသေ ဢမ်ႇၵႃး ၸဝ်ႈသူၼ်၊ ၵူၼ်းၵႃႉ ဢွၼ်ၵၼ် လူႉသုမ်း တင်းၼမ်လၢႆ။

ၸၢႆးၶိၼ်ႇမွင်ႇ (ၶႂႃႇၺူဝ်ႇ) ၵႅမ်ႁူဝ်ပဝ်ႈ ၶွမ်ႊပၼီႊၽၵ်းတူၸဵင်ႇႁွင်ႇဝၼ်းဢွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၶၢဝ်းပီမႂ်ႇၶႄႇ ပူၼ်ႉမႃးၼႆႉ ယွၼ်ႉတၢင်းပဵၼ်ဝူႊႁၢၼ်ႉ ၽႄႈၸပ်းဝႆး၊ ၵူၼ်းမိူင်းၶႄႇ ဢမ်ႇမႃးသိုဝ်ႉမၢၵ်ႇမႆႉလႄႈ ၵၢၼ်ၵႃႉၶၢႆမၢၵ်ႇမႆႉလူတ်း ယွမ်းၵႂႃႇႁႅင်းလိူဝ်ၵဝ်ႇ” ဝႃႈၼႆ။

ဢိင်ၼိူဝ်လွင်ႈၼႆႉသေ တႄႇဢဝ်လိူၼ်ၾႅပ်ႊပိဝ်ႊရီႊ ဝၼ်းတီႈ 18 ၼႆႉမႃးၶိုၼ်း ပဵၼ်ၵၢၼ်မႃးၶိုၼ်းဢိတ်းဢွတ်းသေတႃႉ လႆႈႁူႉဝႃႈ ၵၢၼ်ၵႃႉၶၢႆမၢၵ်ႇမႆႉလုသုမ်းယွၼ်ႉတၢင်းပဵၼ်ဝူႊႁၢၼ်ႉ ဢမ်ႇယွမ်း 50 လၢၼ်ႉတေႃႊလႃႊ ငိုၼ်းဢမေႊရိၵၢၼ်ႊ ဝႃႈၼႆ။

ၸၢႆးၶိၼ်ႇမွင်ႇ(ၶႂႃႇၺူဝ်ႇ) ၵႅမ်ႁူဝ်ပဝ်ႈ ၶွမ်ႊပၼီႊၽၵ်းတူၸဵင်ႇႁွင်ႇဝၼ်းဢွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ “ တေႃႇထိုင်ယၢမ်း လဵဝ် ၸဝ်ႈမၢၵ်ႇမႆႉ တိုၵ်ႉၼမ်လိူဝ်ၵူၼ်းမႃးသိုဝ်ႉယူႇ။ ၼိုင်ႈဝၼ်းၵူၼ်းမႃးသိုဝ်ႉမီးမွၵ်ႈ 500 ၵူၺ်း၊ ၵူၼ်းမႃးၶၢႆဢမ်ႇယွမ်း 600 လႆႈႁူႉၼင်ႇၼႆ”။

မိူဝ်ႈပူၼ်ႉမႃး ဝၼ်းတီႈ 19/3/2020 ၼၼ်ႉၵေႃႈ ယူႇတီႈပၢင်ၵၢတ်ႇ 105 လၵ်း ၸႄႈဝဵင်းမူႇၸေႊ ပိုၼ်ၽၢဝ်ႇ ပၼ်ၾၢင်ႉထိုင် ႁႂ်ႈလူတ်းယွမ်းၵူၼ်းၼမ် ၵူၼ်းၵိုၼ်းၽွင်ႈ ယွၼ်ႉၵူဝ်ၽႄႈၸပ်းတၢင်းပဵၼ်ၶူဝ်ႊဝိတ်ႉ 19 ၵၼ် ဝႃႈၼႆ။

ၸၢႆးၶိၼ်ႇမွင်ႇ ၵႅမ်ႁူဝ်ပဝ်ႈ ပၢင်ၵၢတ်ႇမၢၵ်ႇမႆႉ 105 လၵ်း လၢတ်ႈဝႃႈ “ လွင်ႈမၢၵ်ႇမႆႉတႄႉ သူင်ႇၶိုၼ်ႈမႃးလႆႈယူႇ၊ ၵူၼ်းဢမ်ႇ ၵဵဝ်ႇၶွင်ႈ ယႃႇပေဢွၼ်ၵၼ်ၶိုၼ်ႈမႃးၶွၼ်ႈၵၼ်ၼမ်” ဝႃႈၼႆ။

တေႃႈလဵဝ်ၼႆႉ ၵူၼ်းၸပ်းတၢင်းပဵၼ်လႄႈ လူႉတၢႆ မီးၸမ် 200 မိူင်းယဝ်ႉ ။

ၼွၵ်ႈလိူဝ်ၼၼ်ႉ တီႈၽၵ်းတူၶဝ်ႈဢွၵ်ႇတီႈမူႇၸေႊ လႅၼ်လိၼ်တႆး – ၶႄႇၼၼ်ႉၵေႃႈ တိုၵ်ႉပိုတ်ႇပၼ် ၵူၼ်းမိူင်းၶဝ်ႈဢွၵ်ႇ ၵႂႃႇမႃးတင်းၽၵ်းတူမိူင်း တၢင်း 3 တီႈယူႇ။ ႁႅင်းၵၢၼ်မိူင်းႁူမ်ႈတုမ်ဢွၼ်ၵၼ်လႆၶဝ်ႈမိူဝ်းႁဵတ်းၵၢၼ်ၵၼ် တင်း ၼမ်လၢႆ။

တီႈၽၵ်းတူဝ် ၶဝ်ႈဢွၵ်ႇ တီႈၵၢတ်ႇၸၢင်ႉၽိူၵ်ႇၼၼ်ႉ ၵူၼ်းၶဝ်ႈဢွၵ်ႇ ၵူႈဝၼ်းတေမီးမွၵ်ႈ 10,000 ၵေႃႉၼႆႉ ဝႃႈၼႆ။