ၵၢၼ်ၵႃႉၶၢႆ ၸွမ်းလႅၼ်လိၼ်တႆး – ၶႄႇ တီႈ 105 လၵ်း မူႇၸေႊ ပႆႇပဵၼ်ၵၢၼ်ၶိုၼ်း ၼိုင်ႈဝၼ်းလႂ် လူႉသုမ်းၼပ်ႉႁူဝ်သိပ်း သႅၼ်ပျႃး ၵႅမ်ႁူဝ်ပဝ်ႈ ပၢင်ၵၢတ်ႇမၢၵ်ႇမႆႉ တီႈ 105 လၢတ်ႈ။

တၢင်းပဵၼ်ၸိူဝ်ႉမႅင်းၶူဝ်ႊရူဝ်ႊၼႃႊ ၽႄႈဝႆးၼမ် တၢင်းမိူင်းၶႄႇၸဝ်ႈၼႃႈတီႈ 2 ၾင်ႇ ၸိုင်ႈမိူင်းၵူတ်ႇထတ်းၵူၼ်းၶဝ်ႈဢွၵ်ႇ လႄႈ တုမ်ႉယွၼ်ႈၵၢၼ်ၵႃႉၶၢႆ ၸွမ်းလႅၼ်လိၼ် တႆး – ၶႄႇ ဢိၵ်ႇပႃး တီႈပၢင်ၵၢတ်ႇမၢၵ်ႇမႆႉ 105 ၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ ၸိူဝ်းၼႆႉ လူႉသုမ်းၸွမ်းတင်းၼမ်။

ၸၢႆးၶိၼ်ႇမွင်ႇ ၵႅမ်ႁူဝ်ပဝ်ႈ ပၢင်ၵၢတ်ႇမၢၵ်ႇမႆႉ 105 လၢတ်ႈတီႈၽူႈတွႆႇႁွၵ်ႈဝႃႈ “ မုင်ႈမွင်းဝႃႈ လင်ဝၼ်းတီႈ 10 ၼႆႉ ယူဝ်ၶႄး ၵႃႈၶၼ်မၢၵ်ႇမႆႉ တေလီၶိုၼ်ႈမႃးၼႆသေတႃႉသမ်ႉ ၶႅၼ်းႁၢႆႉမႃးလိူဝ်ၵဝ်ႇထႅင်ႈ၊ ၶႅၼ်းၼႃႇမႃးလိူဝ်ၵဝ်ႇထႅင်ႈလူး” ဝႃႈၼႆ။

တေႃႈလဵဝ်ၼႆႉ ၵူၼ်းၵႃႉတၢင်းၾင်ႇမိူင်းၶႄႇ ၶဝ်ႈမႃးသိုဝ်ႉ တၢင်းၾင်ႇမိူင်းတႆး တီႈ 105 လၵ်းယူႇၼႆသေတႃႉ ဢမ်ႇလႆႈၵႃႈ ၶၼ်မၢၵ်ႇမႆႉသုင်။ တဵၵ်းသိုဝ်ႉလူၺ်ႈၵႃႈၶၼ်ထုၵ်ႇထုၵ်ႇၵူၺ်း ဝႃႈၼႆ။

ၸၢႆးၶိၼ်ႇမွင်ႇ လၢတ်ႈဝႃႈ “ ၼိုင်ႈဝၼ်းၼႆႉ ၵူၼ်းမိူင်းၶႄႇ ၶဝ်ႈမႃးသိုဝ်ႉ 80 ၵေႃႉ ထိုင် 100 ၵေႃႉ။ ၶဝ်မႃးသိုဝ်ႉ တႅင်ဢၼ် ၶႅမ်ႉမၼ်းသေ ပၼ်ၵႃႈၶၼ်ထုၵ်ႇထုၵ်ႇႁဵတ်းၼႆၵူၺ်း။ ၵူၼ်းၵႃႉ မၢင်ၵေႃႉ လႆႈၶိုၼ်းၵႃႈၵႃးၵူၺ်း၊ ယင်းဢမ်ႇလႆႈၼမ်ႉတွၼ်း မၼ်း။ ယွၼ်ႉဝႃႈ ပၢင်ၵၢတ်ႇတၢင်းမိူင်းၶႄႇၼၼ်ႉ ပႆႇပိုတ်ႇၼၼ်ႉယဝ်ႉ”ဝႃႈၼႆ။

“ပေႃးၼပ်ႉသွၼ်ႇတူၺ်း လွင်ႈလူႉသုမ်းတီႈပၢင်ၵၢတ်ႇမၢၵ်ႇမႆႉ 105 လၵ်းၼႆႉ ပိူင်တႅၵ်ႈမၼ်း ၵႃးလူင် 100 လမ်း တေမီး 2,000 တၼ်ႊ၊ 1 တၼ်ႊလႂ် တေသုမ်းယူႇငိုၼ်း မွၵ်ႈ 3 သႅၼ်ပျႃးၼႆႉ။ တေႃႈလဵဝ်ၼႆႉ တေႃႇဝၼ်း တေသုမ်းယူႇ မွၵ်ႈ 4 တၼ်ႊၼႆႉ။ ပေႃးၼပ်ႉသွၼ်ႇငိုၼ်းၵေႃႈ မွၵ်ႈ 12 သႅၼ်ၼႆႉ” ၸၢႆးၶိၼ်ႇမွၼ်ႇ သပ်းလႅင်းလၢတ်ႈၼႄၼင်ႇၼႆ။

တေႃႈလဵဝ် မၢၵ်ႇမႆႉ တႅင်ၸမ်ႇပူႇ(တႅင်တဝ်ႈ) ဢၼ်ဢွၵ်ႇတၢင်းမိူင်းမၢၼ်ႈၼၼ်ႉ တေႃႉမႃးၶၢႆတၢင်းမူႇၸေႊ တီႈ 105 လၵ်း ၵမ်ႈၼမ် တေပဵၼ်တၢင်း ၸႄႈၵႅင်း၊ ဝဵင်းလိူဝ်ႇ၊ တႃႈၵုင်ႈလႄႈ ဢေႊရႃႇဝႃႇတီႊ ၸိူဝ်းၼႆႉ ယၢမ်းလဵဝ် မီးလွင်ႈလူႉသုမ်းၼမ်။

ၸၢႆးၶိၼ်ႇမွင်ႇ လၢတ်ႈဝႃႈ“ ႁဝ်းၶႃႈ မုင်ႈမွင်းဝႆႉတႄႉ ပေႃးမွၵ်ႈလိူၼ်သၢမ်သုတ်းသဵင်ႈၵႂႃႇၸိုင် တႅင်ၸမ်ႇပူႇတႆးၵေႃႈ တေဢွၵ်ႇယဝ်ႉ။ မိူဝ်ႈယၢမ်းၼၼ်ႉ ၵႃႈၶၼ်မၼ်းၵေႃႈတေလီမႃးယူႇ။ ယၢမ်းလဵဝ်ၼႆႉ ၸိူဝ်းၽုၵ်ႇသွမ်ႈဝႆႉၼၼ်ႉ ႁႂ်ႈ ဢွၼ်ၵၼ်တူၺ်း လုမ်းလႃးပၼ် ႁႂ်ႈမၢၵ်ႇမၼ်းၶႅမ်ႉလီ” ဝႃႈၼႆ။

တေႃႈလဵဝ် ၵူၼ်းၸပ်းတၢင်းပဵၼ်ၸိူဝ်ႉမႅင်းၶူဝ်ႊရူဝ်ႊၼႃႊ တင်းလုမ်ႈၾႃႉၼႆႉ မီးၵႂႃႇ 45,171 ၵေႃႉ၊ တၢႆ 1115 ၵေႃႉ သိုဝ်ႇ ၶၢဝ်ႇ South China Morning Post ဢွၵ်ႇဝႆႉ။