ၾၢႆႇပၢႆးယူႇလီၸိုင်ႈထႆး ပိုၼ်ၽၢဝ်ႇဝႃႈ ၵူၼ်းတိတ်းၸပ်းတၢင်းပဵၼ် ဝူႊႁၢၼ်ႉ တီႈမိူင်းထႆးမီး 322 ၵေႃႉ၊ လိုၼ်းသုတ်းၼႆႉပဵၼ် လုၵ်ႈဢွၼ်ႇဢႃယု 6 လိူၼ် ပဵၼ်ၽူႈတိတ်းၸပ်းတၢင်းပဵၼ် ၶူဝ်ႊဝိတ်ႉ-19 ၵေႃႉလဵၵ်ႉသုတ်း ၼႂ်းမိူင်းထႆး။
ဝၼ်းတီႈ 20/3/2020 မိူဝ်ႈၼႆႉလူင်ပွင်ၸိုင်ႈထႆး ႁွင်ႈၵၢၼ်ၾၢႆႇ ပၢႆးယူႇလီ ပိုၼ်ၽၢဝ်ႇဝႃႈ ၵူၼ်းတိတ်းၸပ်းတၢင်းပဵၼ် ၶူဝ်ႊဝိတ်ႉ-19 ၼႂ်းမိူင်းထႆးပတ်းပိုၼ်ႉ မီးမႃးထႅင်ႈ 50 ၵေႃႉ။
ၼႂ်းၼၼ်ႉ မီး လုၵ်ႈဢွၼ်ႇဢႃယု 6 လိူၼ်ၵေႃႉၼိုင်ႈ၊ ၵူၼ်းမိူင်းမၢၼ်ႈ 2 ၵေႃႉ၊ ၽူႈၵဵဝ်ႇၶွင်ႉၸွမ်းပၢင်ထုပ်ႉတွႆႇမူၺ်း 18 ၵေႃႉ၊ ဢၼ်ၸပ်းမႃးတီႈပၢင်ႁွင်ႉၽဵင်းၵႂၢမ်း 5 ၵေႃႉ၊ ၵူၼ်းၵႂႃႇၶဝ်ႈႁူမ်ႈပၢင်လူႇတၢၼ်း ပၢင်သႃႇသၼႃႇ မိူင်းမလေးသျႃးမႃး 6 ၵေႃႉ၊ လုၵ်ႈႁဵၼ်းဢၼ်လုၵ်ႉမိူင်းဢိင်းၵလဵတ်ႈမႃး 2 ၵေႃႉ၊ ၵူၼ်းႁဵတ်းၵၢၼ်ၶၢဝ်ႇၵေႃႉၼိုင်ႈ လိူဝ်ၼၼ်ႉပဵၼ် ၵူၼ်းႁဵတ်းၵၢၼ်ၸွမ်းၵူၼ်းၼွၵ်ႈမိူင်းလႄႈ ၶႃႈႁၢပ်ႇၵၢၼ်ၶုၼ် လူင်ပွင်ၸိုင်ႈထႆး ။
ယၢမ်းလဵဝ် ၼႂ်းမိူင်းထႆး ၵူၼ်းတိတ်းၸပ်းတၢင်းပဵၼ်ၼႆႉမီးယူႇ 322 ၵေႃႉ။ ဢၼ်ယူတ်းယႃႁၢႆသေ ပွၵ်ႈမိူဝ်းၶိုၼ်းႁိူၼ်းယဝ်ႉ 43 ၵေႃႉ လႄႈတၢႆယဝ်ႉ 1 ၵေႃႉ။
တီႈဝဵင်းၵဵင်းမႂ်ႇ ဢၼ်မီးႁႅင်းၵၢၼ်တႆးၼမ်သုတ်းသမ်ႉ ၵူၼ်းတိတ်းၸိူဝ်ႉမႅင်းမီး 3 ၵေႃႉ လႄႈပႂ်ႉတူၺ်းၶေႃႈတွပ်ႇမီး 34 ၵေႃႉ။
ၵွပ်ႈၼႆလႄႈ ၾၢႆႇပၢႆးယူႇလီမိူင်းထႆးပိုၼ်ၽၢဝ်ႇဝႃႈ ဢမ်ႇဢွၵ်ႇၼွၵ်ႈႁိူၼ်း ၊ ၵႆႉၵႆႉသုၵ်ႈမိုဝ်းၼႆႉ ပဵၼ်ယႃႈယႃႁႄႉၵင်ႈလီလိူဝ်ပိူၼ်ႈသုတ်း ဝႃႈၼႆ။
ဝၼ်းမိူဝ်ႈၼႆႉ ၵူၼ်းတိတ်းၸပ်းတၢင်းပဵၼ် ၶူဝ်ႊဝိတ်ႉ-19 တင်းလုမ်ႈၾႃႉမီး 234726 ၵေႃႉ၊ တၢႆ 9862 ၵေႃႉ။ ၵူၼ်းမိူင်း ဢီႊတလီႊ တၢႆၼမ်သုတ်းၼႂ်းလုမ်ႈၾႃႉ။ မီး 3405 ၵေႃႉ။ ၼမ်လိူဝ်မိူင်းၶႄႇ 200 ၵေႃႉ။ ထိုင်တီႈ ယၢပ်ႇၽိုတ်ႇတႃႇၽင်ၵူၼ်းတၢႆ ဝႃႈၼႆ။
ၶၢဝ်ႇ- Thairat, tnksiamtopic
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ