သူင်ႇၶၢဝ်ႇ ၸၢႆးၵွၼ်းလႅင်း – ၽူႈၼမ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး ဢွၼ်ႁူဝ်ၼမ်းၼႃႈ တပ်ႉၸုမ်း ဢိၵ်ႇၵူၼ်းဝၢၼ်ႈ ၵူၼ်းမိူင်း ႁူမ်ႈၵၼ် တႄႇၵွင်းမူးတၢင်ႇထီး တီႈလွႆဝဵင်း ၼႂ်းၸႄႈဝဵင်းမိူင်းသူႈ။
ဝၼ်းတီႈ 8/3/2020 ယၢမ်းၵၢင်ၼႂ် 8 မူင်းပၢႆၼၼ်ႉ ယူႇတီႈသင်ၶၸဝ်ႈ လႄႈ ႁူဝ်ပဝ်ႈလူင် ပႃႇတီႇမႂ်ႇသုင်ၸိုင်ႈတႆး/ တပ်ႉ သိုၵ်းၸိုင်ႈတႆး SSPP/SSA ၸွမ်သိုၵ်းလူင် ပၢင်ႇၾႃႉ ဢွၼ်ႁူဝ် ၼမ်းၼႃႈ ၵူၼ်းဝၢၼ်ႈၵူၼ်းမိူင်း လုၵ်ႈၼွင်ႉပွင်ႈပၢႆ လူႇ တၢၼ်းတၢင်ႇထီးၵွင်းမူး တီႈထၢတ်ႈတေႃႇလွႆဝဵင်း ၼႂ်းဢိူင်ႇၼွင်ဢႅပ်း ၸႄႈဝဵင်းမိူင်းသူႈ ၸိုင်ႈတႆးပွတ်းၸၢၼ်း။ မီးသင်ၶ ၸဝ်ႈလႄႈ ၵူၼ်းမိူင်းၼႂ်းပိုၼ်ႉတီႈ ၶဝ်ႈႁူမ်ႈလူႇတၢၼ်း ၵိုၼ်းၶွၼ်ႈၼပ်ႉႁူဝ်ႁဵင် ဝႃႈၼႆ။
ၵူၼ်းၼုမ်ႇ ဝၢၼ်ႈႁႆး SSPP ၽူႈၶဝ်ႈႁူမ်ႈပၢင်ပွႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ယိၼ်းၸူမ်းထိုင် ႁူဝ်ပဝ်ႈလူင် ႁဝ်း ၶႃႈ ၸွမ်သိုၵ်းလူင် ၸဝ်ႈပၢင်ႇၾႃႉ ဢၼ်မႃးဢွၼ် ႁူဝ်ႁဝ်းၶႃႈသေ ၵေႃႇသၢင်ႈၵွင်းမူး ပဵၼ်တီႈၵိူဝ်းယမ်၊ တႃႇႁႂ်ႈသႃႇသၼႃႇ ႁဝ်း ၶႃႈ ပေႃးတေႁိူဝ်ႈႁိူင်းၵႂႃႇ။ ၽူႈယႂ်ႇၵူၼ်းလူင် ၼႂ်းတပ်ႉသိုၵ်း ၸိုင်ႈတႆးႁဝ်းၶႃႈ မႃးၶဝ်ႈႁူမ်ႈလူႇတၢၼ်းၸွမ်း၊ ၾၢင်ႁၢင်ႈၵွင်း မူးတႄႉ တႄႇၵေႃႇသၢင်ႈဝႆႉပဵၼ်ပိူင်ၾၢင်ႁၢင်ႈၵွင်းမူး ၸဝ်ႈ ပေႃႈသိလ်ထမ်းၶူးဝႃးဝုၼ်းၸုမ်ႉၶႃႈဢေႃႈ၊ မီးပီႈၼွင်ႉၵူၼ်းမိူင်း မႃးၶဝ်ႈႁူမ်ႈ လူႇတၢၼ်းၸွမ်းၵိုၼ်းတႄႉတႄႉၶႃႈ” ဝႃႈၼႆ။
ပၢင်လူႇတၢၼ်းယၢတ်ႇၼမ်ႉ တၢင်ႇထီးၵွင်းမူး တီႈထၢတ်ႈတေႃႇလွႆဝဵင်းၼၼ်ႉ ၸွမ်သိုၵ်းၶိူဝ်းတႆး ၵႅမ်ႁူဝ်ပဝ်ႈ၊ ၸွမ်ႁၢၼ်သၢႆ ၾႃႉ ဢိၵ်ႇထႅင်ႈၽူႈယႂ်ႇၵူၼ်းလူင် လၢႆလၢႆၸဝ်ႈ ၶဝ်ႈႁူမ်ႈၸွမ်း။
ၼႂ်းၵၢၼ်ပူၵ်းပွင်သႃႇသၼႃႇၼႆႉ ယူႇတီႈပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး တၢမ်းဝၢင်းပိူင်ၵၢၼ်ဢၼ်ၼိုင်ႈသေ တွၼ်ႈတႃႇ သႃႇသၼႃႇ ပေႃးတေႁိူဝ်ႈႁိူင်းၼၼ်ႉ တီႈလႂ်လူဝ်ႇပူၵ်းပွင်ၵေႃႇသၢင်ႈ မႄးၵုမ်းလုမ်းလႃႈၸိုင် ၸွမ်းၼင်ႇပွင် ပဵၼ်လႆႈ တိုၼ်းႁဵတ်းမႃးယူႇၵူႈပီပီယဝ်ႉ ၵူၼ်းၼုမ်ႇ ဝၢၼ်ႈႁၢႆး လၢတ်ႈၼႄၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ