ယႃႈမဝ်းၵမ်ႁူမ်ႈလူၺ်ႈ ၵူၼ်းၵႃႉၶၢႆသူႇသမ်းၵိၼ် 6 ၵေႃႉ ဢၼ် RCSS တီႉၺွပ်းလႆႈၼၼ်ႉ မွပ်ႈပၼ်လူင်ပွင်ၸိုင်ႈတီႈ ၵျွၵ်ႉမႄး။
ဝၼ်းတီႈ 19/2/2020 ယၢမ်းဝၢႆးဝၼ်း မွၵ်ႈ 3 မူင်းပၢႆၼၼ်ႉ ယူႇတီႈၸဝ်ႈႁၢၼ် ၼၢင်းမူဝ်း (ႁွင်ႉ) ၼၢင်းမူဝ်းမူဝ်းသေႃး ၽူႈ ၼင်ႈလုမ်းၵပ်းသၢၼ် RCSS/SSA တီႈဝဵင်းၵျွၵ်ႉမႄး လႆႈဢဝ်ယႃႈၾိၼ်ႇၽိူၵ်ႇ ၼမ်ႉၼၵ်း 330 ၵရမ်ႇလႄႈ ယႃႈမႃႉ 6 မဵတ်ႉ ႁူမ်ႈပႃး ၵူၼ်းၵႃႉၶၢႆသူႇသမ်းၵိၼ်ယႃႈမဝ်းၵမ်ထႅင်ႈ 6 ၵေႃႉ မွပ်ႈပၼ် လူင်ပွင်ၸိုင်ႈတင်း တပ်ႉမတေႃႇ တီႈဢိူင်ႇမၢၼ်ႈၶႃႇ ၸႄႈဝဵင်း ၵျွၵ်ႉမႄး ၸိုင်ႈတႆးပွတ်းႁွင်ႇ။
ၸဝ်ႈႁၢၼ်ၼၢင်းမူဝ်း ၽူႈၼင်ႈလုမ်းၵပ်းသၢၼ် RCSS တီႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈ RCSS ႁဝ်း ၶႃႈသေ မွပ်ႈယႃႈမဝ်းၵမ်ပၼ်လူင်ပွင်ၸိုင်ႈတင်း တပ်ႉမတေႃႇၵမ်းၼႆႉပဵၼ်ပွၵ်ႈၵမ်း 3 ယဝ်ႉ။ ပွၵ်ႈၼႆႉတႄႉ ၾၢႆႇလူင်ပွင် ၸိုင်ႈၶဝ် ပႃးမႃးၵူႈ ၾၢႆႇၾၢႆႇ၊ မိူၼ် ၼင်ႇ ၾၢႆႇၽဵဝ်ႈမူၺ်ႉယႃႈမဝ်းၵမ်၊ ၾၢႆႇၵူတ်ႇထတ်းၵူၼ်းၶဝ်ႈမိူင်း၊ ၾၢႆႇဢုပ်ႉပိူင်ႇၽွင်း ငမ်း ၸိူဝ်း ၼႆႉ။ ပွၵ်ႈၼႆႉ မွပ်ႈ ပၼ်တင်းၵူၼ်း တင်းယႃႈမဝ်းၵမ်ၶႃႈဢေႃႈ” ဝႃႈၼႆ။
မိူဝ်ႈဝၼ်းတီႈ 14/2/2020 ယၢမ်းၵၢင်ၼႂ် 7 မူင်းၶိုင်ႈၼၼ်ႉ RCSS/SSA ၵူတ်ႇထတ်းတီႉၺွပ်းလႆႈ ယႃႈမဝ်းၵမ်လႄႈ ၵူၼ်း ၵႃႉၶၢႆသူႇသမ်း 4 ၵေႃႉ။ တီႈသဵၼ်ႈတၢင်း မိူင်းလူင် – ၵျွၵ်ႉမႄး ၼႂ်းၸႄႈဝဵင်းၵျွၵ်ႉမႄး။ မိူဝ်ႈဝၼ်းတီႈ 18/2/2020 ယၢမ်းႁူဝ် ၶမ်ႈ 5 မူင်းၶိုင်ႈသမ်ႉ ၵူတ်ႇထတ်းတီႈလႆႈထႅင်ႈ ၵူၼ်းၵႃႉၶၢႆသူႇသမ်းၵိၼ် 2 ၵေႃႉလႄႈ ယႃႈၾိၼ်ႇၽိူၵ်ႇ 2 ဢႅပ်ႇ (ၵွၵ်းသပျႃႇ) လႄႈယႃႈမႃႉ 6 မဵတ်ႉ တီႈသဵၼ်ႈတၢင်း မိူင်းလူင် – ၵျွၵ်ႉမႄး ၵူၺ်းၼင်ႇၵဝ်ႇ ဝႃႈၼႆ။
ၸဝ်ႈႁၢၼ် ၼၢင်းမူဝ်း သိုပ်ႇလၢတ်ႈဝႃႈ “ ဢၼ်ၵမ်းၵမ်းတီႉၺွပ်းလႆႈၵေႃႈ ယူႇတီႈ RCSS သေ ၵူတ်ႇထတ်းတီႉလႆႈၶႃႈ။ ပေႃး ဝႃႈႁဝ်း လူင်းလၢႆးမိုဝ်း NCA ယဝ်ႉ တေႁူမ်ႈၵၼ်တင်းလူင်ပွင်ၸိုင်ႈသေၽဵဝ်ႈမူၺ်ႉယႃႈမဝ်းၵမ် ၼႆၼၼ်ႉၵေႃႈ တေႃႇထိုင် ယၢမ်းလဵဝ် ဢၼ်ႁဝ်းၶႃႈႁူမ်ႈၵၼ်သေ ၽဵဝ်ႈမူၺ်ႉယႃႈမဝ်းၵမ်မႃးၼႆႉ ပႆႇမီးသေပွၵ်ႈ၊ ႁဵတ်းၽႂ် ႁဵတ်းမၼ်းၸိူင်ႉၼၼ်ၵူၺ်း။ မိူဝ်းၼႃႈမႃး ၸွမ်း ၼင်ႇပေႃႇလသီႇႁဝ်းၶႃႈမီးၼၼ်ႉ တိုၼ်းတေသိုပ်ႇႁႄႉၵင်ႈၽဵဝ်ႈမူၺ်ႉၵႂႃႇယူႇတႃႇသေႇ” ဝႃႈၼႆ။
ယူႇတီႈ RCSS/SSA တီႉၺွပ်းလႆႈယႃႈမဝ်းၵမ်သေ မွပ်ႈပၼ်တီႈ လူင်ပွင်ၸိုင်ႈတင်း တပ်ႉမတေႃႇၼႆႉ တင်းမူတ်းမီး 3 ပွၵ်ႈ ပႃးၼႆႉယဝ်ႉ။ ပွၵ်ႈၵမ်းၼိုင်ႈ လႆႈမွပ်ႈပၼ် တီႈၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း မိူဝ်ႈ ဝၼ်းတီႈ 8 လိူၼ်မေႊ 2019 မွပ်ႈဢၢပ်ႈယႃႈဢႆႊ ၼမ်ႉၼၵ်း 30 ၵီႊလူဝ်ႊ။
မိူဝ်ႈပွၵ်ႈၵမ်းသွင်သမ်ႉ လႆႈမွပ်ႈပၼ် တီႈၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ မိူဝ်ႈဝၼ်းတီႈ 18 လိူၼ်ၵျႅၼ်ႊၼိဝ်ႊရီႊ 2020 လႆႈမွပ်ႈပၼ် ယႃႈၾိၼ်ႇၽိူၵ်ႇတင်းယႃႈမႃႉ ႁူမ်ႈမႅၼ်ႈငိုၼ်း တင်းမူတ်း 4,256 သႅၼ်ပျႃး။ ယဝ်ႉၵေႃႈ ပွၵ်ႈၵမ်းသၢမ် ၼႆႉ ယႃႈၾိၼ်ႇၽိူၵ်ႇ ၼမ်ႉၼၵ်း 330 ၵရမ်ႇလႄႈ ယႃႈမႃႉ 6 မဵတ်ႉ။
