Friday, March 29, 2024

RCSS တီႉလႆႈယႃႈမဝ်းၵမ် မွပ်ႈပၼ်တပ်ႉသိုၵ်းလူင်ပွင်ၸိုင်ႈ

Must read

RCSS ဢဝ်ယႃႈမဝ်းၵမ် ဢၼ်တီႉလႆႈၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ မွပ်ႈပၼ်တပ်ႉသိုၵ်း လူင်ပွင်ၸိုင်ႈ မၢၼ်ႈ ယိူင်းဢၢၼ်းႁႂ်ႈလွင်ႈႁူမ်ႈမိုဝ်း ႁဵတ်းသၢင်ႈၼႂ်းၵႄႈလူင်ပွင်ၸိုင်ႈ၊ တပ်ႉသိုၵ်းလႄႈ RCSS တေမီးလွင်ႈမၼ်ႈၵိုမ်းလိူဝ် ၵဝ်ႇ ဝႃႈၼႆ။

Photo by – သဵင်သၼ်လွႆ/ RCSS ဢဝ်ယႃႈမဝ်းၵမ် မွပ်ႈပၼ် တပ်ႉသိုၵ်းလူင်ပွင်ၸိုင်ႈမၢၼ်ႈ

ဝၼ်းတီႈ 18/1/2020 ယၢမ်းဝၢႆးဝၼ်း 2 မူင်းပၢႆၼၼ်ႉ ၸဝ်ႈသိုၵ်း ၸၢႆးႁၢၼ် ၽူႈၸတ်းၵၢၼ် ႁွင်ႈၵၢၼ်ၾၢႆႇၽဵဝ်ႈမူၺ်ႉ ယႃႈ မဝ်းၵမ် RCSS/SSA လႆႈဢဝ်ယႃႈၾိၼ်ႇၽိူၵ်ႇ ၼမ်ႉၼၵ်း 10.28 ၵီႊလူဝ်ႊ (Kg) (မႅၼ်ႈငိုၼ်း 3,084 သႅၼ်ပျႃး) လႄႈ တင်းယႃႈမႃႉ 78,141 မဵတ်ႉ(ၼိုင်ႈမဵတ်ႉ 1,500 ပျႃး တူၵ်းမႅၼ်ႈယူႇ 1,172 သႅၼ်ပျႃး) ႁူမ်ႈၵၼ်တင်းမူတ်း 4,256 သႅၼ်ပျႃး မွပ်ႈဢၢပ်ႈပၼ် တီႈၶုၼ်သိုၵ်းလူင် ၸႃႇၼီႇဢွင်ႇ ၾၢႆႇႁူမ်ႇလူမ်ႈ ၸယၽ သိုၵ်းၵျွၵ်ႉမႄး။ ပၢင်မွပ်ႈယႃႈမဝ်းၵမ်ၼႆႉ ၸတ်းႁဵတ်း တီႈမိူင်းတၢင်ႈ ၸႄႈ ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။

- Subscription -

ၸဝ်ႈသိုၵ်း ၸၢႆးဢူး ၽူႈၶၢၼ်ပၢၵ်ႇလႄႈ ၽူႈၼင်ႈလုမ်းၵပ်းသၢၼ် RCSS/SSA တီႈဝဵင်းလူင်တူၼ်ႈတီး လၢတ်ႈတီႈၽူႈတွႆႇ ႁွၵ်ႈဝႃႈ “ ၸႂ်ႈၶႃႈဢေႃႈ ယူႇတီႈ RCSS ႁဝ်းၶႃႈ တီႉၺွပ်းလႆႈ ၼႂ်းပိုၼ်ႉတီႈ တၢင်းၵျွၵ်ႉမႄးၼၼ်ႉ ပဵၼ်ယႃႈၾိၼ်ႇၽိူၵ်ႇတင်း ယႃႈမႃႉ။ ယူႇတီႈ ၸဝ်ႈသိုၵ်း ၸၢႆးႁၢၼ် လႆႈဢဝ်ၵႂႃႇဢၢပ်ႈပၼ်” ဝႃႈၼႆ။

RCSS ဢွၵ်ႇၶေႃႈပိုၼ်ၽၢဝ်ႇဝႆႉဝႃႈ “ ယႃႈမဝ်းၵမ်ၸိူဝ်းၼႆႉ တီႉလႆႈ မိူဝ်ႈဝၼ်းတီႈ 13/1/2020 ၼႂ်းရူတ်ႉၵႃး လမ်းၼိုင်ႈ တီႈ ၼိူဝ်သဵၼ်ႈတၢင်းလူင် မိူင်းလူင် – ၵျွၵ်ႉမႄး။ ယႃႈမဝ်းၵမ်ၼႆႉ လုၵ်ႉတၢင်းပိုၼ်ႉတီႈ ၵွင်းၶႃး ၸႄႈဝဵင်းၵူတ်ႉၶၢႆမႃး” ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉပႃးဝႆႉဝႃႈ ၶႂ်ႈၼႄဝႃႈ RCSS မီးလွင်ႈႁပ်ႉဢဝ်ပုၼ်ႈၽွၼ်း ၼႂ်းၵၢၼ်ၽဵဝ်ႈမူၺ်ႉ ယႃႈမဝ်းၵမ် တႅၵ်ႇလႅင်းသေ ၼင်ႇႁိုဝ် လွင်ႈႁူမ်ႈမိုဝ်းႁဵတ်းသၢင်ႈ ၼႂ်းၵႄႈ လူင်ပွင်ၸိုင်ႈ၊ တပ်ႉမတေႃႇလႄႈ RCSS ပေႃးတေမီး လွင်ႈ မၼ်ႈၵိုမ်းလိူဝ်ၵဝ်ႇ ဝႃႈၼႆ။

မိူဝ်ႈပီ 2019 လိူၼ်မေႊ ဝၼ်းတီႈ 8 ၼၼ်ႉၵေႃႈ ယူႇတီႈ RCSS/SSA မွပ်ႈဢၢပ်ႈယႃႈဢႆႊ 30 ၵီႊလူဝ်ႊ ပၼ်ၾၢႆႇပလိၵ်ႈ မၢၼ်ႈ တီႈႁူင်းႁေႃးပလိၵ်ႈ ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်းမႃးယဝ်ႉ ၵမ်းၼိုင်ႈ။ လွင်ႈမွပ်ႈပၼ်ၵမ်းၼႆႉ ၵေႃႈလႆႈဝႃႈ ပဵၼ်ၵမ်းႁႅၵ်ႈတွၼ်ႈတႃႇ ပီ 2020 ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း