ၵူၼ်းၼုမ်ႇတႆး ႁွတ်ႈၵဵင်းမႆႇ တေႁူမ်ႈၵၼ်လဵၼ်ႈမၢၵ်ႇၼင် မၢႆတွင်းဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 73 ပီ လႄႈ ႁႃ ငိုၼ်းၵွင်ၵၢင် တႃႇၵမ်ႉၸွႆႈလုၵ်ႈႁဵၼ်း တီႈဝတ်ႉၻွၼ်ႊၸၼ်ႊ ၵဵင်းမႆႇ။

ပေႃးထိုင်မႃး ဝၼ်းတီႈ 9/2/2020 ယၢမ်းၵၢင်ဝၼ်း 12 မူင်း ထိုင် 5 မူင်းႁူဝ်ၶမ်ႈ ၵူၼ်းၼုမ်ႇတႆး လၢႆလၢႆၸုမ်း ၼႂ်းၵဵင်းမႆႇ (Shan Football Club) တေႁူမ်ႈၵၼ်လဵၼ်ႈမၢၵ်ႇၼင် တီႈပၢင်ႇလဵၼ်ႈမၢၵ်ႇၼင် (ထဵမ်း) ၵဵင်းမႆႇ ယူႊၼၢႆႊတဵတ်ႊ ၼႂ်းဝဵင်းၵဵင်း မႆႇ ၸိုင်ႈထႆး။ ၸုမ်းၵူၼ်းၼုမ်ႇတႆး ဢၼ်တေၶဝ်ႈႁူမ်ႈလဵၼ်ႈသမ်ႉ ပၼ်သဵၼ်ႈမၢႆဝႆႉ တေမီးယူႇ မွၵ်ႈ 10 ၸုမ်းပၢႆ။

ၸၢႆးၶိူဝ်းလႅင်း ၽူႈဢွၼ်ႁူဝ်တႃႇပွင်ပဵၼ်မႃး ပၢင်ၶေႉမၢၵ်ႇၼင် လၢတ်ႈတီႈၽူႈတွႆႇႁွၵ်ႈဝႃႈ “ပၢင်လဵၼ်ႈမၢၵ်ႇၼင်ႁဝ်းၶႃႈ ပွၵ်ႈၼႆႉ တႃႇမၢႆတွင်းဝၼ်းၸိူဝ်ႉၸၢတ်ႈႁဝ်းၶႃႈသေဢမ်ႇၵႃး ငိုၼ်းၵွင်ၵၢင် ဢၼ်ႁဝ်းၶႃႈ လႆႈၵဵပ်းၵၼ်ဝႆႉၼၼ်ႉ ႁၵ်းၵႃႈ ၸႂ်ႉၸၢႆႇတင်းမူတ်းသေ ဢၼ်လိူဝ်မၼ်းတင်းမူတ်းၼၼ်ႉ တေသိုဝ်ႉၶွင်ၵိၼ်ယမ်ႉ မိူဝ်းၸွႆႈထႅမ်လုၵ်ႈဢွၼ်ႇႁဵၼ်း တီႈ ဝတ်ႉၻွၼ်ႊၸၼ်ႊၶႃႈဢေႃႈ” ဝႃႈၼႆ။

တီႈၻွၼ်ႊၸၼ်ႊ ဝဵင်းၵဵင်းမႆႇၼၼ်ႉ မီးလုၵ်ႈႁဵၼ်း၊ လုၵ်ႈဢွၼ်ႇၽၢၼ်ပေႃႈမႄႈ လုၵ်ႈဢွၼ်ႇၸိူဝ်းဢၼ်ယၢပ်ႇၽိုတ်ႇ တႃႇၵၢၼ်ႁဵၼ်း မႃးႁဵၼ်းလိၵ်ႈဝႆႉ မီးၼပ်ႉႁူဝ်ပၢၵ်ႇ ၵမ်ႈၼမ်ပဵၼ်လုၵ်ႈဢွၼ်ႇတႆး။

ပၢင်ပွႆးၶေႉၶဵင်ႇလဵၼ်ႈမၢၵ်ႇၼင် ပွၵ်ႈၵမ်းၼႆႉ တေမီးသူးရၢင်းဝလ်းတွၼ်ႈထိုင် ၽူႈၵတ်ႉၶႅၼ်ႇ/ ၸုမ်းၵတ်ႉၶႅၼ်ႇ ဢၼ်လႆႈ ထီႉၼိုင်ႈ၊ သွင်၊ သၢမ် ၵႂႃႇ။

ၸုမ်းလဵၼ်ႈမၢၵ်ႇၼင် ၵူၼ်းၼုမ်ႇတႆး ၵဵင်းမႆႇၼႆႉ ၵႆႇႁူမ်ႈၵၼ်ပိတ်ႉမၢၵ်ႇၼင် မၢႆတွင်း ပီမႂ်ႇတႆး၊ မၢႆတွင်း ဝၼ်းၸိူဝ်ႉၸၢတ်ႈ ၸိုင်ႈတႆးၸိူဝ်းၼႆႉသေ ႁႃငိုၼ်းၵွင်ၵၢင် ၵႂႃႇၸွႆႈၵမ်ႉထႅမ်ပၼ်ႁူင်းႁဵၼ်းၸွမ်းလႅၼ်လိၼ်တႆး – ထႆး မႃးတႃႇသေႇ ဝႃႈၼႆ။