ဝႆးရတ်ႊသ်ၶူဝ်ႊရူဝ်ႊၼႃႊၽႄႈ ၼႂ်းမိူင်းၶႄႇၼၼ်ႉ ၼင်ႇႁိုဝ် တေဢမ်ႇတုမ်ႉယွၼ်ႈၵႃႈၶၼ်ၶူဝ်းၵုၼ်ႇၼၼ်ႉ ယူႇတီႈၽူႈမီး ပုၼ်ႈၽွၼ်းၼႂ်းမိူင်းလႃးၶဝ် တေၵုမ်းၵမ် ၵႃႈၶၼ်ၵုၼ်ႇႁႂ်ႈၼိမ်တဵင်ႈၵႂႃႇ။
မိူဝ်ႈဝၼ်းတီႈ 29/1/2020 ၼၼ်ႉ ၼႃႈလိၼ်ၶိုၵ်ႉတွၼ်းမၢႆ 4 မိူင်းလႃး ၸိုင်ႈတႆးပွတ်းဢွၵ်ႇၶူင်း ဢွၵ်ႇလိၵ်ႈပိုၼ်ၽၢဝ်ႇ တေ ၵုမ်းၵမ် ၵႃႈၶၼ်ၶူဝ်းၵုၼ်ႇသိၼ်ၵႃႉ ယႃႇႁႂ်ႈပုင်ႈၶိုၼ်ႈသုင်။ ႁႂ်ႈလႆႈသိုဝ်ႉၶၢႆၸွမ်းၼင်ႇၶၼ်မၢၼ်ႇမႅၼ်ႈတေႃႇၵူၼ်းမိူင်း ၼႂ်း ၼႃႈလိၼ်ၶိုၵ်ႉတွၼ်းမၢႆ 4 မိူင်းလႃးၵႂႃႇ ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ “ ပိူင်လူင် ယွၼ်ႉတၢင်းပဵၼ်ၶူဝ်ႊရူဝ်ႊၼႃႊဝႆးရတ်ႊသ်ၼႆႉသေ ၼင်ႇႁိုဝ် ၵူၼ်းမိူင်း ပေႃးတေမီးလွင်ႈပၢႆးယူႇလီ ႁူမ်ႇလူမ်ႈလီၼၼ်ႉ တီႈၵဵတ်ႉလၢၼ်ႇ ၶဝ်ႈဢွၵ်ႇၸပ်းတၢင်းမိူင်းၶႄႇ လႆႈၵူတ်ႇထတ်းၵူၼ်းၵႃႉၶၢႆ ၽၵ်း တႅတ်ႈၼႅတ်ႈလီလႄႈ ႁဵတ်းႁႂ်ႈၶဝ်ႈၶၢႆၼႂ်းၵၢတ်ႇမိူင်းလႃး ဢမ်ႇၶိုတ်းတၼ်းၶိင်ႇၶၢဝ်း” ဝႃႈၼႆ။
ယွၼ်ႉၼၼ်လႄႈ ၵူၼ်းၶၢႆၶူဝ်းၵူႈပိူင်ပိူင် ႁႂ်ႈမီးၵႃႈၶၼ်ၼိမ်တဵင်ႈ ၼင်ႇႁိုဝ် ၵူၼ်းမိူင်းပေႃးတေဝၢင်းၸႂ်သိုဝ်ႉၶူဝ်းၶွင်ၼၼ်ႉ ယူႇတီႈၽူႈမီးပုၼ်ႈၽွၼ်းၾၢႆႇၵဵဝ်ႇၶွင်ႈ တေၵုမ်းၵမ်ပၼ်ၵႂႃႇ။ ယႃႇပေသိုဝ်ႉၶူဝ်းၶွင်ဝႆႉၼမ်။ ၸၢင်ႈႁဵတ်းႁႂ်ႈၶၼ်ၵုၼ်ႇပုင်ႈ ၶိုၼ်ႈသုင်။ ယွၼ်ႉၼၼ် ယူႇတီႈၽူႈမီးပုၼ်ႈၽွၼ်းၾၢႆႇၵဵဝ်ႇၶွင်ႈ တေၵူတ်ႇထတ်းႁၢမ်ႈႁႄႉၵႂႃႇ ပိုၼ်ၽၢဝ်ႇဢွၵ်ႇဝႆႉၼင်ႇၼႆ။
သင်ဝႃႈ ၵူၼ်းၵႃႉၶၢႆ ၼႂ်းပိုၼ်ႉတီႈတၢင်းမိူင်းလႃး၊ သိူဝ်လိုဝ်းလႄႈ ၼမ်ႉပၢၼ်း ၸိူဝ်းၼႆႉ ၵေႃႉလႂ် ဢမ်ႇႁဵတ်းၸွမ်း ၼႂ်းၶေႃႈ ပိုၼ်ၽၢဝ်ႇ ဢၼ်ဢွၵ်ႇဝႆႉၼႆႉၸိုင် ႁႂ်ႈၵပ်းသိုပ်ႇမၢႆၾူၼ်းဢၼ်ပိုၼ်ၽၢဝ်ႇဢွၵ်ႇဝႆႉၼၼ်ႉသေၵမ်း ဝႃႈၼႆ။