ၼႃႈလိၼ်ၶိုၵ်ႉတွၼ်းမၢႆ 4 မိူင်းလႃး ၸိုင်ႈတႆးပွတ်းဢွၵ်ႇၶူင်း ၸတ်းႁဵတ်းပၢင်ပွႆးဝၼ်းဢဝ်ငမ်းယဵၼ် ၶွပ်ႈတဵမ် 30 ပီ မီးပေႃႈ မႄႈၵူၼ်းမိူင်း၊ ၵေႃႉသိုၵ်းႁၢၼ်၊ ၸုမ်းဢူၺ်းလီယိပ်းၵွင်ႈၵၢင်ႇလုၵ်ႉၽိုၼ်ႉ၊ တူဝ်တႅၼ်းလူင်ပွင်ၸိုင်ႈမၢၼ်ႈလႄႈ တပ်ႉမ တေႃႇ ဢိၵ်ႇပႃး ၸုမ်းတူင်ႉၼိုင်တူင်ႇဝူင်းၵူၼ်း ၶဝ်ႈႁူမ်ႈပၼ်ႁႅင်း ၵိုၼ်းၶွၼ်ႈၼမ်။
ဝၼ်းတီႈ 30/06/2019 ယၢမ်းၵၢင်ၼႂ် ၼႃႈလိၼ်ၶိုၵ်ႉတွၼ်းမၢႆ 4 မိူင်းလႃး ၸိုင်ႈတႆးပွတ်းဢွၵ်ႇၶူင်း ဢၼ်ၸဝ်ႈၸၢႆးလိုၼ်း ပဵၼ်ႁူဝ်ပဝ်ႈလူင်ဝႆႉၼၼ်ႉ ဢွၼ်ၸတ်းႁဵတ်းပၢင်ပွႆးဝၼ်းဢဝ်ငမ်းယဵၼ် ၶွပ်ႈတဵမ် 30 ပီတီႈဝဵင်းမိူင်းလႃး ၸႄႈတွၼ်ႈၵဵင်း တုင် ၸိုင်ႈတႆးပွတ်းဢွၵ်ႇၶူင်း။
ၸဝ်ႈၸၢႆးလိုၼ်း ႁူဝ်ပဝ်ႈလူင် ၼႃႈလိၼ်ၶိုၵ်ႉတွၼ်းမၢႆ 4 မိူင်းလႃး မွၵ်ႇလၢတ်ႈၶေႃႈၵႂၢမ်းတီႈပၢင်ပွႆးဝၼ်းဢဝ်ငမ်းယဵၼ် ၶွပ်ႈ တဵမ် 30 ပီၼၼ်ႉဝႃႈ “ၼႂ်းၶၵ်ႉၵၢၼ်ငမ်းယဵၼ်လႄႈ မႄးလီၶိုၼ်းၸိူဝ်ႉၸၢတ်ႈ ၶွင်လူင်ပွင်ၸိုင်ႈၼၼ်ႉ ၼင်ႇႁိုဝ် တေၸဵဝ်း လႆႈၶေႃႈလႆႈၸႂ် NCA ဢၼ်ဢိင်ၼိူဝ်ၼမ်ႉၸႂ်ပၢင်လူင်ၼၼ်ႉ တၵ်းလႆႈဢုပ်ႇၵၼ်ၵႄႈလိတ်ႈ ၵၼ်လၢႆးတၢင်းၵၢၼ်မိူင်းသေ တၵ်းလႆႈပႆၸွမ်းသဵၼ်ႈတၢင်းငမ်းယဵၼ်မၼ်ႈၵိုမ်းၼၼ်ႉယဝ်ႉ” ဝႃႈၼႆ။
ၼႃႈလိၼ်ၶိုၵ်ႉတွၼ်းမၢႆ 4 မိူင်းလႃးၼႆႉ လႆႈဢဝ်ငမ်းယဵၼ်ၵၼ်တင်း လူင်ပွင်ၸိုင်ႈမၢၼ်ႈ မိူဝ်ႈဝၼ်းတီႈ 30/6/1989 မႃး တေႃႇထိုင် ဝၼ်းတီႈ 30/6/2019 ၼႆႉ ၶွပ်ႈတဵမ် 30 ပီ ဝႃႈၼႆ။
ၸဝ်ႈၸၢႆးလိုၼ်း လၢတ်ႈဝႃႈ “ ဢၼ်ႁဝ်းၶႃႈ တေသိုပ်ႇႁဵတ်းသၢင်ႈၵႂႃႇထႅင်ႈတၢင်းၼႃႈတႄႉၵၢၼ် ပူၵ်းပွင်ၼႂ်းပိုၼ်ႉတီႈၼၼ်ႉ တေႁဵတ်းသၢင်ႈၵႂႃႇ ႁႂ်ႈပေႃးလီလိူဝ်သေ ဢွၼ်တွၼ်းသေၵဝ်ႇ။ မိူၼ်ၼင်ႇ ၸၢဝ်းၶိူဝ်း ႁဝ်းၶႃႈ ၼႂ်းမိူင်းႁဝ်းၶႃႈၵေႃႈ ၼင်ႇႁိုဝ် ပေႃးတေမီးလွင်ႈငမ်းယဵၼ် လႄႈ မုၼ်းလႅင်းၶိုၼ်ႈယႂ်ႇၼၼ်ႉ ႁၵ်ႉႁွမ်ပႅင်းၵိုမ်းၵၼ်သေၵမ်း ၶႂ်ႈတိုၵ်းသူၼ်းမွၵ်ႇလၢတ်ႈ ၼႄၵႂႃႇၼင်ႇၼႆ” ဝႃႈၼႆ။
တပ်ႉၸုမ်း ၸိူဝ်းယူႇတႂ်ႈၶွမ်ႊမိဝ်ႊၼိတ်ႉသေ ၽိုၼ်ႉဝၢႆႇၽၢတ်ႇဢွၵ်ႇၼၼ်ႉ တပ်ႉသိုၵ်း ၵူဝ်းၵၢင်ႉ ဢၼ် ၽိူင် ၵျႃးသိူင်း ဢွၼ်ႁူဝ်ၼၼ်ႉ ၾၢႆႇသိုၵ်းလူင်ပွင်ၸိုင်ႈမၢၼ်ႈမၵ်းမၼ်ႈပၼ် ၸႄႈဝဵင်းလၢဝ်ႇၵၢႆး ၵွင်းၸၢင်ႉ ပဵၼ်ၼႃႈလိၼ်ၶိုၵ်ႉတွၼ်း မၢႆ # 1 ၊ ႁူၵ်း ၸႄႈဝဵင်း ႁူဝ်ပၢင်ႇ ပၢင်ဝၢႆ ၼႃးၽၢၼ်း မိူင်းမႂ်ႇ ပၢင်သၢင်း မၢၵ်ႇမၢင် သမ်ႉ မၢႆပဵၼ် ၼႃႈလိၼ်ၶိုၵ်ႉတွၼ်း မၢႆ # 2 ပၼ်ပဵၼ် ၼႃႈလိၼ် ၸုမ်းဝႃႉ UWSA ၊ တပ်ႉသိုၵ်းၸိုင်ႈတႆး SSPP/SSA ဢၼ်ၸဝ်ႈသိူဝ်ထႅၼ်ႈ ဢွၼ်ႁူဝ်ၵိုတ်းတိုၵ်း ၼၼ်ႉသမ်ႉ ဢဝ်ထုင်ႉ မိူင်းၶိူဝ်း၊ သႅင်ၵႅဝ်ႉ၊ ဝၢၼ်ႈႁႆး၊ ႁၢႆးပႃ ၊ ၵႃလီႉ ၸိူဝ်းၼႆႉ မၢႆပဵၼ် ၼႃႈလိၼ်ၶိုၵ်ႉတွၼ်းမၢႆ # 3 ၊ ၸုမ်းမိူင်း လႃးသမ်ႉ ပဵၼ်ၼႃႈလိၼ်ၶိုၵ်ႉတွၼ်းမၢႆ 4 ၊ ၸုမ်းပဢူဝ်းလႅင်သမ်ႉ ပဵၼ်ၼႃႈလိၼ်ၶိုၵ်ႉတွၼ်း # 5 တင်း # 6 ။
ပိုၼ်ႉလိၼ်ၵႂၢင်ႈယႂ်ႇ ၼႃႈလိၼ်ၶိုၵ်ႉတွၼ်းမၢႆ 4 မိူင်းလႃးသမ်ႉ မီး 4,952 လွၵ်းလၵ်းၵီႊလူဝ်ႊ၊ ဢိင်ၼိူဝ် ၵၢၼ်ၵဵပ်းသၢႆမၢႆႁူဝ် ၵူၼ်းမိူဝ်ႈပီ 2014 သေ လႆႈႁူႉဝႃႈ ႁူဝ်ၵူၼ်း ၼႂ်းၼႃႈလိၼ်ၶိုၵ်ႉတွၼ်းမၢႆ # 4 မိူင်းလႃး မီး ႁိမ်း116,887 ၵေႃႉ ။ လင်ႁိူၼ်း မီး 20,597 လင် ။ ၵူၼ်းယူႇတႃႇသေႇ မီး 99,544 ၵေႃႉ။ ၸၢဝ်းၶိူဝ်းမီး 13 ၸၢဝ်းၶိူဝ်း – တႆး၊ ဢႃးၶႃႇ၊ ၶႄႇ၊ မၢၼ်ႈ၊ ဝႃႉ၊လွႆ ၊ ဢႅၼ်ႇ ၊ လႃးႁူႇ၊ လီႉသေႃး၊ ၶၢင် ၸဵမ်ၸိူဝ်းၼႆႉ။
