တႃႇႁႂ်ႈလုၵ်ႈဢွၼ်ႇလႆႈႁဵၼ်းလိၵ်ႈၵူႈၵေႃႉၼႆသေ ပီႈၼွင်ႉဝၢၼ်ႈၼွင်တဝ်း ၸႄႈဝဵင်းလွႆလႅမ် ႁူမ်ႈၵၼ်ပိုတ်ႇႁူင်းႁဵၼ်းၸိူဝ်ႉ ၸၢတ်ႈလင်ၼိုင်ႈ။

ႁူင်းႁဵၼ်းၸိူဝ်ႉၸၢတ်ႈဝၢၼ်ႈၼွင်တဝ်းၼႆႉ ယူႇၼႂ်းၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း ဢမ်ႇပေႃးၵႆၼိူဝ်သဵၼ်ႈ တၢင်း လူင် တူၼ်ႈတီး – ပၢင်လူင်၊ မီးလုၵ်ႈႁဵၼ်း 40 ပၢႆ၊ ပဵၼ်လုၵ်ႈႁဵၼ်းလၢႆတီႈလၢႆဝဵင်း မႃးၶဝ်ႈႁဵၼ်း၊ ၵမ်ႈၼမ်ပဵၼ်လုၵ်ႈႁဵၼ်း ဢၼ်ယူၼႂ်း ဝၢၼ်ႈၼွင်တဝ်း လႄႈ လၢႆးၶႃႈ ၸိူဝ်းဢမ်ႇလႆႈၶိုၼ်ႈႁူင်းႁဵၼ်းလူင်ပွင်ၸိုင်ႈ ၸိူဝ်းၼႆႉ။

ၼၢင်းၵွၼ်ငိုၼ်း မေႃသွၼ် ႁူင်းႁဵၼ်းၸိူဝ်ႉၸၢတ်ႈ ဝၢၼ်ႈၼွင်တဝ်း လၢတ်ႈတီႈၽူႈတွႆႇႁွၵ်ႈဝႃႈ “ တီႈႁူင်းႁဵၼ်းႁဝ်းၶႃႈၼႆႉ လႆႈပိုတ်ႇသွၼ်မႃး ၶၢဝ်းယၢဝ်း ၸမ် 4 ပီယဝ်ႉ ၼိုင်ႈပီၼႆႉ ႁဝ်းၶႃႈ ပူင်သွၼ်ပၼ်တႃႇၶၢဝ်းတၢင်း မွၵ်ႈ 10 လိူၼ်ၼႆႉၶႃႈ။ တီႈႁူင်း ႁဵၼ်းႁဝ်းၶႃႈၼႆႉ ႁဝ်းၶႃႈပူင်သွၼ်ပၼ်လုၵ်ႈႁဵၼ်း မိူၼ်ၼင်ႇ လိၵ်ႈတႆး၊ ၾိင်ႈပဵၼ်၊ ပၢႆးၼပ်ႉ၊ ပထဝီႇ၊ ဢိင်းၵလဵတ်ႈ လႄႈ တူင်ႇဝူင်းၵူၼ်း ၸိူဝ်းၼႆႉ” ဝႃႈၼႆ။

တႃႇၵမ်ႉၸွႆႈႁႂ်ႈလုၵ်ႈဢွၼ်ႇ မေႃလိၵ်ႈတႆး၊ ၵႂၢမ်းတႆး ႁူမ်ႈတင်းတႃႇလုၵ်ႈဢွၼ်ႇၸိူဝ်းဢမ်ႇမီးတိုဝ်ႉတၢင်းလႆႈႁဵၼ်း ၼႂ်းႁူင်း ႁဵၼ်းလူင်ပွင်ၸိုင်ႈၼႆသေ ပီႈၼွင်ႉဝၢၼ်ႈၼွင်တဝ်း ႁႃလွင်ႈၵမ်ႉၸွႆႈလၢႆၾၢႆႇသေ ပိုတ်ႇသွၼ်ႁူင်းႁဵၼ်းၸိူဝ်ႉၸၢတ်ႈမႃး ဝႃႈၼႆ။

ၸၢႆးၵႃႇလိင်ႇ ၽူႈၶဝ်ႈၸုမ်းၶွမ်ႊမတီႊ ႁူင်းႁဵၼ်း လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဢွၼ်တၢင်းၼႆႉ ႁဝ်းၶႃႈ သွၼ်လိၵ်ႈတႆး ၶၢဝ်းမႆႈ ပၼ်လုၵ်ႈဢွၼ်ႇႁဝ်းမႃးၵူႈပီ။ ထိုင်မႃး ပီ 2013 ၼၼ်ႉ မေႃသွၼ်လူင် လုင်းၸၢႆးၾႃႈသမ်ႉ မႃးႁၼ်ႁဝ်းၶႃႈ သွၼ် ပၼ်လုၵ်ႈႁဵၼ်း ပဵၼ်သုမ်ႉဢွၼ်ႇလႄႈ ၵမ်းၼႆႉၶဝ်ၸဝ်ႈၵေႃႈဝႃႈ တေၵမ်ႉထႅမ်ပၼ် ႁဵတ်းပၼ်ႁူင်းႁဵၼ်း၊ ပေႃးမီးဢွင်ႈ တီႈႁဵတ်းမၼ်းၼႆၸိုင် ၵမ်းၼႆႉ ႁဝ်းၶႃႈၵေႃႈဝႃႈ မီးဢေႃႈၼႆသေ ႁဝ်းၶႃႈ ၵူၼ်းဝၢၼ်ႈ လႆႈဢွၼ်ၵၼ်မႃးလိူၵ်ႈ ႁဵတ်းတီႈၼႆႈ၊ မိူဝ်ႈၵူႈပွၵ်ႈတီႈၼႆႈပဵၼ်တီႈလဵၼ်ႈမၢၵ်ႇၼင်ၵူၼ်းဝၢၼ်ႈ” ဝႃႈၼႆ။

“ ႁူင်းႁဵၼ်းႁဝ်းၶႃႈၵေႃႈ ပႆႇယဝ်ႉတူဝ်ႈလီ ႁဝ်းၶႃႈၵူၼ်းဝၢၼ်ႈၵူၼ်းသူၼ်ၵေႃႈ ႁဵတ်းယဝ်ႉလင်ၼိုင်ႈ မႃးတင်ႈ ထႅင်ႈလင် ၼိုင်ႈၼႆႉ မၼ်းၵေႃႈသမ်ႉဢမ်ႇငၢႆႈသေ တေႃႈလဵဝ်တႄႉ လႆႈႁၢင်ႉဝႆႉၸိူင်ႉၼႆၶႃႈ။ ႁဝ်းၶႃႈ ၵူၼ်းဝၢၼ်ႈ ႁူမ်ႈၵၼ်သေ ႁဵတ်း သၢင်ႈမႃး ၵမ်းဢိတ်းဢိတ်းႁဵတ်းၼၼ်ၵူၺ်းၶႃႈ” ၸၢႆး ၵႃႇလိင်ႇသပ်းလႅင်းလၢတ်ႈၼႄၼင်ႇၼႆ။

ဝၢၼ်ႈၼွင်တဝ်းၼႆႉ မီးၼႂ်းၸႄႈဝဵင်းလွႆလႅမ် မီးၼႂ်းၵႄႈလွႆလႅမ်-ပၢင်လူင် မီးႁိမ်းၸမ်ဝၢၼ်ႈၼွင်ႁူး။ ၵူၼ်းဝၢၼ်ႈၼွင်တဝ်း ၼႆႉ ၽုၵ်ႇၽၵ်းယိူဝ်ႈၼၢင်းၶဵဝ် ႁဵတ်းၵၢၼ်သူၼ်ၵၢၼ်ၼႃး။ ၶတ်းၸႂ်တႃႇၵမ်ႉၸွႆႈလုၵ်ႈလၢင်း/တႃႇလႆႈႁဵၼ်းလိၵ်ႈၼႂ်း ႁူင်း ႁဵၼ်းလူင်ပွင်ၸိုင်ႈ။