ၵူၼ်းၼုမ်ႇတႆး လၢႆလၢႆၸႄႈဝဵင်း ၼႂ်းၸိုင်ႈတႆးပွတ်းႁွင်ႇ ႁူမ်ႈၵၼ် လဵၼ်ႈမၢၵ်ႇၼင် တႃႇပဵၼ်လွင်ႈမိုတ်းၵိုဝ်းၸမ်ၸႂ်ၵၼ် လႄႈ ၵၢင်းယၢၼ်ယႃႈမဝ်းၵမ်။
ယူႇတီႈၵူၼ်းၼုမ်ႇတႆး ငဝ်ႈငုၼ်းဝၢၼ်ႈႁၢႆး SSPP/SSA ဢွၼ်ႁူဝ်ၼမ်းၼႃႈသေ ၸတ်းႁဵတ်းပၢင်လဵၼ်ႈမၢၵ်ႇၼင် တီႈဝၢင်း မၢၵ်ႇၼင်ဝၢၼ်ႈႁႆး တႄႇဢဝ် ဝၼ်းတီႈ 8-11/12/2019 တႃႇၶၢဝ်းတၢင်း 4 ဝၼ်း မီးၸုမ်းၵူၼ်းၼုမ်ႇၶဝ်ႈႁူမ်ႈလဵၼ်ႈ တင်း မူတ်း 7-8 ၸုမ်း ဝႃႈၼႆ။
ၵူၼ်းၼုမ်ႇတႆး ဢႃယု မွၵ်ႈ 30 ငဝ်ႈငုၼ်း ဝၢၼ်ႈႁႆး ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ ပၢင်လဵၼ်ႈမၢၵ်ႇၼင်ၼႆႉ ၸတ်း ႁဵတ်းမႃးၵူႈ ပီၶႃႈယဝ်ႉ။ တွၼ်ႈတႃႇၵူၼ်းၼုမ်ႇႁဝ်း တီႈၼိုင်ႈလႄႈ တီႈၼိုင်ႈ၊ ဝဵင်းၼိုင်ႈလႄႈ ဝဵင်းၼိုင်ႈ ပေႃးတေမိုတ်ႈၵိုဝ်း ၸမ်ၸႂ်ၵၼ်၊ ၶဝ်ႈဢွၵ်ႇႁႃၵၼ်၊ ၽွမ်ႉႁူမ်ႈၵၼ်၊ ၵၢင်းယၢၼ်ယႃႈမဝ်းၵမ်လႄႈ လွင်ႈပၢႆးယူႇလီ ၸိူဝ်းၼႆႉ” ဝႃႈၼႆ။
မၼ်းၸၢႆးသိုပ်ႇလၢတ်ႈထႅင်ႈဝႃႈ “မိူဝ်ႈၼႆႉ ယၢမ်းၵၢင်ၼႂ် 9 မူင်း ထိုင် 12 မူင်း တီႈႁူင်းႁေႃးၼွင်ငိုၼ်း ယူႇတီႈၽူႈယႂ်ႇၵူၼ်း လူင် ဝၢၼ်ႈႁႆးႁဝ်းၶႃႈ ႁူပ်ႉထူပ်းၸုမ်းၵူၼ်းၼုမ်ႇတႆးႁဝ်းၶႃႈသေ ဢုပ်ႇၶႆႈၼႄ လွင်ႈပဵၼ်မႃး ပိုၼ်းဝၼ်းၽူႈႁတ်းႁၢၼ် လုၵ်ႉၽိုၼ်ႉ၊ ယဝ်ႉၵေႃႈ ယိၼ်းၸူမ်းၶွပ်ႈၸႂ်ထိုင်တီႈၵူၼ်းၼုမ်ႇၶဝ် ဢၼ်မႃးၶဝ်ႈႁူမ်ႈလဵၼ်ႈပိတ်ႉမၢၵ်ႇၼင် ၸိူဝ်းၼႆႉ” ဝႃႈၼႆ။
ၸုမ်းၵူၼ်းၼုမ်ႇတႆး ဢၼ်မႃးႁူမ်ႈၵၼ် လဵၼ်ႈမၢၵ်ႇၼင် တီႈငဝ်ႈငုၼ်းဝၢၼ်ႈႁႆးၼႆႉသမ်ႉ မိူၼ်ၼင်ႇ ၸုမ်းၵူၼ်းၼုမ်ႇတႆး ၸႄႈဝဵင်းၵျွၵ်ႉမႄး၊ မိူင်းငေႃႉ၊ မိူင်းမိတ်ႈ၊ သီႇပေႃႉ၊ တီးမႃႉ ၼမ်ႉၶမ်း၊ သႅၼ်ဝီ၊ လႃႈသဵဝ်ႈလႄႈ ဝၢၼ်ႈႁႆး ၸဵမ်ၸိူဝ်းၼႆႉ။
လႅင်ႇၶၢဝ်ႇ – ၸၢႆးလႅင်း ၵူၼ်းၼုမ်ႇငဝ်ႈငုၼ်းဝၢၼ်ႈႁႆး
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ