ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် ၵူတ်ႇထတ်းတီႉလႆႈ ယႃႈမႃႉ တီႈၶူဝ်တႃႈသၢင်း တင်းမူတ်း 1,150,000 မဵတ်ႉ။
ဝၼ်းတီႈ 8/12/2019 ယၢမ်းဝၢႆးဝၼ်း 3 မူင်း ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် ၵူတ်ႇထတ်းတီႉလႆႈယႃႈမႃႉ ၼႂ်းၵႃးဢၼ် ၸၢႆးၸွမ် ႁိူင်း ဢႃယု 23 ပီ တင်း ၸၢႆးၼေႃႇၶမ်း ဢႃယု 20 ပီ တီႈၶူဝ်တႃႈသၢင်း၊ ၶူဝ်ၶၢမ်ႈၼမ်ႉၶူင်းဢၼ်ၵၢႆႇၸူး ၸိုင်ႈတႆး ပွတ်းၸၢၼ်း လႄႈ ပွတ်းဢွၵ်ႇၶူင်း ဝႃႈၼႆ။
ႁွင်ႈၵၢၼ်ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် ပိုၼ်ၽၢဝ်ႇဢွၵ်ႇဝႃႈ “ ယႃႈမႃႉၼႆႉ လုၵ်ႉတၢင်း မိူင်းပၼ်ႇမႃး တၢင်းၶူဝ်တႃႈ သၢင်း။ လႆႈၵူတ်ႇထတ်း တီႉလႆႈတင်းမူတ်း 1,150,000 မဵတ်ႉ (မႅၼ်ႈငိုၼ်းမၢၼ်ႈယူႇ 11,500 သႅၼ်ပျႃး)။ လိူဝ်ၼၼ်ႉ တီႉလႆႈ ပႃးထႅင်ႈ ၾူၼ်း 3 လုၵ်ႈ” ဝႃႈၼႆ။
တေႃႈလဵဝ် ယူႇတီႈပလိၵ်ႈၶဝ် လႆႈပိုတ်ႇလိူင်ႈၸွႆးတြႃးတီႈ ၶႃသွင်ၵေႃႉ တီႈႁူင်းပလိၵ်ႈဝဵင်းမိူင်းပၼ်ႇဝႆႉယဝ်ႉ။ ၸၢႆးၸွမ် ႁိူင်းတင်း ၸၢႆးၼေႃႇၶမ်းၼႆႉ ပဵၼ်ၵူၼ်းၸႃတိ ဝဵင်းၵႃလိ ၸႄႈဝဵင်းၵုၼ်ႁဵင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ဝႃႈၼႆ။
