ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် ပိုၼ်ၽၢဝ်ႇဝႃႈတီႉလႆႈ ယႃႈမႃႉ ၶၼ်ငိုၼ်း 3,400 သႅၼ်ပျႃး ၼႂ်းၸႄႈဝဵင်းလွႆလႅမ် တူဝ် ၸဝ်ႈၵႃးပၢႆႈလွတ်ႈဝႆႉ ဝႃႈ ၼႆ။
ဝၼ်းတီႈ 3/12/2019 ယၢမ်းၵၢင်ၶမ်ႈ 9 မူင်း ပလိၵ်ႈၾၢႆႇၽဵဝ်ႈမူၺ်ႉ ယႃႈမဝ်းၵမ် ၵူတ်ႇထတ်းတီႉလႆႈ ယႃႈမႃႉ 340,000 မဵတ်ႉ ၼႂ်းၵႃးလမ်းၼိုင်ႈ တီႈႁိမ်းဝၢၼ်ႈႁူဝ်တိုဝ်ႉ ၼိူဝ်သဵၼ်ႈတၢင်း လွႆလႅမ် – တူၼ်ႈတီး ၸိုင်ႈတႆးပွတ်းၸၢၼ်း ဝႃႈၼႆ။
ႁွင်ႈၵၢၼ်ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် ဢွၵ်ႇဝႆႉဝႃႈ “ ယွၼ်ႉဝႃႈၵႃးတၢင်ႇယႃႈၼၼ်ႉ ပိၼ်ႇႁူဝ်ၵႃးသေ ႁေႃႈပၢႆႈလႄႈ ႁဝ်းၶႃႈ ထၢင်ႇထိူမ်သေ လမ်းၸွမ်း ၵူၺ်းၵႃႈ ၵူၼ်းႁေႃႈၵႃးၼၼ်ႉတႄႉ ၵိုတ်းၵႃးပႅတ်ႈဝႆႉႁိမ်းၶၢင်ႈတၢင်းသေ တူဝ်ၸဝ်ႈၵႃး တႄႉ ပၢႆႈလွတ်ႈဝႆႉ” ဝႃႈၼႆ။
ၵႃးဢၼ်ၵိုတ်းဝႆႉ ႁိမ်းၶၢင်ႈတၢင်းၼၼ်ႉ ပလိၵ်ႈၶဝ် ၵူတ်ႇထတ်းထူပ်းႁၼ် ၼႂ်းၵႃး ထူပ်းႁၼ်ယႃႈမႃႉ 340,000 မဵတ်ႉ (မႅၼ်ႈငိုၼ်းယူႇ 3,400 သႅၼ်) ဝႃႈၼႆ။
ၵဵဝ်ႇလူၺ်ႈၵၢၼ်တီႉလႆႈ ယႃႈမဝ်းၵမ်ၼႆႉ တေႃႈလဵဝ် ပလိၵ်ႈၶဝ် လႆႈပိုတ်ႇလိူင်ႈဝႆႉတီႈႁူင်းပလိၵ်ႈၸႄႈဝဵင်းလွႆလႅမ်သေ ယဝ်ႉၵေႃႈ တိုၵ်ႉသွၵ်ႈႁႃ ၸဝ်ႈၶွင်ၵႃးၼၼ်ႉယူႇ ဝႃႈၼႆ။
