ၵူၼ်းဝၢၼ်ႈၼႃးႁႆးလူင် ႁူမ်ႈၵၼ်လူႇတၢၼ်းၶုၵ်းထူပ်း လုင်းၸၢႆးသၢမ် ဢၼ်လႆႈလူႉသဵင်ႈၵၢမ်ႇၵႂႃႇၶွပ်ႈတဵမ် 4 ပီ ဢၼ်သိုၵ်း မၢၼ်ႈယိုဝ်းတၢႆ မိူဝ်ႈပီ 2015 ၼၼ်ႉ။

ဝၼ်းတီႈ 24-25/11/2019 ပူၼ်ႉမႃးၼၼ်ႉ ၵူၼ်းဝၢၼ်ႈၼႃးႁႆးလူင် လႄႈ ၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃး ၸိုင်ႈတႆး ႁူမ်ႈ ၵၼ် ႁႅၼ်းလူႇတၢၼ်းလႄႈ ၶုၵ်းထူပ်း လုင်းၸၢႆးသၢမ် ၸဝ်ႈႁႆႈၸဝ်ႈၼႃးဢၼ်ၺႃးသိုၵ်းလူင်ပွင်ၸိုင်ႈမၢၼ်ႈ ယိုဝ်းတၢႆ ၶွပ်ႈတဵမ် 4 ပီ ။ ပၢင်လူႇ တၢၼ်းၼႆႉ ၸတ်းႁဵတ်းတီႈ ဝတ်ႉဝိႁၢရ်ဝၢၼ်ႈၼႃးႁႆးလူင် ၵိင်ႇၸႄႈဝဵင်းတႃႈလိူဝ်ႇ ၸႄႈဝဵင်းတႃႈၶီႈလဵၵ်း ၸိုင်ႈတႆး ပွတ်း ဢွၵ်ႇၶူင်း ဝႃႈၼႆ။

ၸၢႆးလဵဝ်း ၵေႃပဵၼ်လုၵ်ႈၸၢႆး လုင်းၸၢႆးသၢမ် လၢတ်ႈတီႈၽူႈတွႆႇႁွၵ်ႈဝႃႈ “ ပေႃႈၶႃႈၶဝ် ၺႃးသိုၵ်းမၢၼ်ႈယိုဝ်း တၢႆၼႆႉ ၶွပ်ႈ တဵမ် 4 ပီယဝ်ႉ။ ႁဝ်းၶႃႈ လုၵ်ႈလၢင်းလႄႈ ၵူၼ်းဝၢၼ်ႈ ႁူမ်ႈၵၼ်သေ လူႇတၢၼ်းပၼ်သႃလႃးလင်ၼိုင်ႈ။ ယဝ်ႉၵေႃႈ မွၵ်ႇ ထိုင် ပီႈၼွင်ႉႁဝ်းၶႃႈ ၸိူဝ်းယူႇမိူင်းႁၢႆး၊ မိူင်းၽျၢၵ်ႈ၊ ၵဵင်းတုင် ၸိူဝ်းတေၺႃးၽေးလွင်ႈၵၢၼ်ၶုတ်းၶမ်း၊ ထၢၼ်ႇႁိၼ်ၸိူဝ်း ၼၼ်ႉ မႃးၶဝ်ႈႁူမ်ႈၸွမ်းသေ ႁႂ်ႈၶဝ်မႃးလႆႈႁၼ် ငဝ်းလၢႆးဢၼ်ပဵၼ်ယူႇၸိူဝ်းၼႆႉ” ဝႃႈၼႆ။

မၼ်းၸၢႆးသိုပ်ႇလၢတ်ႈဝႃႈ ငဝ်းလၢႆးဢၼ်ပဵၼ်ယူႇၼႂ်းပိုၼ်ႉတီႈၼႃးႁႆးလူင်ၼႆႉ ပႆႇယဵၼ်။ ၵၢၼ်ၶုတ်းၶမ်းၵေႃႈ ၶွမ်ႊပၼီႊမႂ်ႇၽိူမ်ႉ ၶဝ်ႈမႃးၶုတ်းထႅင်ႈ တင်းၼမ်- ဝႃႈၼႆ။

ၶွမ်ႊပၼီႊ တႄႇမႃးၶုတ်းၶမ်း တီႈႁိမ်းဝၢၼ်ႈၼႃးႁႆးလူင်ၼႆႉ ၸဵမ်မိူဝ်ႈပီ 2007။ ယွၼ်ႉၵၢၼ်ၶုတ်းၶမ်းသေ ႁဵတ်းႁႂ်ႈႁူဝ်ႁႆႈ ၶႅင်းၼႃးၵူၼ်းမိူင်း ၼပ်ႉႁူဝ်ပၢၵ်ႇ လႆႈလူႉၵွႆသေဢမ်ႇၵႃး တုမ်ႉတိူဝ်ႉပႃး သိင်ႇဝႅတ်ႉလွမ်ႉလႄႈ မႄႈၼမ်ႉ ၸိူဝ်းၼႆႉ ထႅင်ႈ တင်းၼမ်။

ပူၼ်ႉမႃး မိူဝ်ႈဝၼ်းတီႈ 14/10/2015 ၵၢင်ၼႂ်ယၢမ်း 10 မူင်းၼၼ်ႉ ၵူၼ်းဝၢၼ်ႈၼႃးႁႆးလူင် မွၵ်ႈ 10 ပၢႆ လုၵ်ႉတီႈၼႃးႁႆး လူင်သေ တေၶိုၼ်ႈၵႂႃႇတၢင်းႁူဝ်ၼမ်ႉၶမ်း၊ တေၵႂႃႇတူၺ်းၼမ်ႉ ပိူဝ်ႈတႃႇၸႂ်ႉၼႂ်း ၵၢၼ်ၽုၵ်ႇသွမ်ႈ ယွၼ်ႉပိူဝ်ႈၼမ်ႉႁႅင်ႈ ။ ၽိူဝ်ႇၶိုၼ်ႈၵႂႃႇၵေႃႈ ၵႂႃႇၺႃးသိုၵ်းလူင်ပွင်ၸိုင်ႈမၢၼ်ႈ တပ်ႉၶမယ 330 မိူင်းၽျၢၵ်ႈ ဢၼ်ဢဝ်ႁူမ်ႇလူမ်ႈဝႆႉပၼ်မေႃႇ/ မိူင်ၶမ်း တီႈၶွမ်ႊပၼီႊၶဝ်ၶုတ်းၶမ်းၼၼ်ႉယိုဝ်းသႂ်ႇသေ တိူဝ်ႉၺႃးလုင်းၸၢႆးသၢမ် လႆႈလူႉတၢႆလႄႈ ၵူၼ်းၵႂႃႇၸွမ်းၵမ်ႈၽွင်ႈ လႆႈ မၢတ်ႇၸဵပ်း ။