ဢိင်ၼိူဝ်လွင်ႈၶွမ်ႊပၼီႊမႃးၶုတ်းၶမ်း တီႈႁိမ်းဝၢၼ်ႈၼႃးႁႆးလူင် ၸႄႈတွၼ်ႈတႃႈၶီႈလဵၵ်းၼၼ်ႉသေ ၵူၼ်းဝၢၼ်ႈၵမ်ႈ ၽွင်ႈ လႆႈၶၢႆႉပၢႆႈလႄႈ ႁူပ်ႉလွင်ႈယၢပ်ႇၽိုတ်ႇ။

လင်ႁိူၼ်းၵူၼ်းဝၢၼ်ႈၼႃးႁႆးလူင် မွၵ်ႈ 8 လင် ႁူဝ်ၵူၼ်းမွၵ်ႈ 20 ပၢႆ ၼႂ်းၵိင်ႇၸႄႈဝဵင်းတႃႈလိူဝ်ႇ ၸႄႈဝဵင်းတႃႈၶီႈလဵၵ်း လႆႈၶၢႆႉတီႈယူႇတၼ်းသဝ်း ပၢႆႈၵႂႃႇယူႇသဝ်းတၢင်းၼွၵ်ႈဝၢၼ်ႈ။ ယွၼ်ႉပိူဝ်ႈဝႃႈ ပေႃးၾူၼ်တူၵ်းၸိုင် ၼမ်ႉၵိုင်ႉၵၢင်ႉၼွင်း လုပ်ႇထူမ်ႈႁိူၼ်းယေးတႃႇသေႇ ထိုင်တီႈဢမ်ႇၸၢင်ႈယူႇသဝ်း။

ၵူၼ်းၼုမ်ႇဝၢၼ်ႈၼႃးႁႆးလူင် ၵေႃႉၼိုင်ႈ ဢႃယု မွၵ်ႈ 30 ၼႆႉ လၢတ်ႈတီႈၽူႈတွႆႇႁွၵ်ႈဝႃႈ “ ႁိူၼ်းၵူၼ်းဝၢၼ်ႈ 8 လင် ဢၼ် လႆႈၶၢႆႉၼၼ်ႉ ယွၼ်ႉဝႃႈ ပေႃးၶၢဝ်းႁိုဝ်ႉ/ ၾူၼ်ၸိုင် ၼမ်ႉထူမ်ႈလုပ်ႇႁိူၼ်းၶဝ် တႃႇသေႇၶႃႈယဝ်ႉ။ ႁိူၼ်းယေးၶဝ် ယူႇႁိမ်း ၾင်ႇၼမ်ႉ။ မိူဝ်ႈၵူႈပွၵ်ႈတႄႉ ဢမ်ႇပဵၼ်ၶႃႈ၊ တင်ႈတႄႇပိူၼ်ႈမႃးၶုတ်းၶမ်းၼႆႉၵေႃႈ လႆႈထူပ်းၽေးၸိူင်ႉၼႆမႃးတႃႇသေႇ” ဝႃႈၼႆ။

ၵူၼ်းဝၢၼ်ႈ လႆႈၶၢႆႉတီႈယူႇ ဢွၵ်ႇၵႂႃႇယူႇတၢင်းၼွၵ်ႈဝၢၼ်ႈၼႆႉ ႁူပ်ႉလွင်ႈယၢပ်ႇ ၽိုတ်ႇတင်းၼမ်၊ ၵဵဝ်ႇၵပ်းလွင်ႈၼႆႉ ဢမ်ႇမီး ၽူႈလႂ် ၵေႃႉလႂ် ၶဝ်ႈမႃးတူၺ်း ၸွႆႈထႅမ်လူလွမ်ပၼ်သင် ဝႃႈၼႆ။

ၽူႈၸၢႆးၵေႃႉၼိုင်ႈ ဢၼ်လႆႈၶၢႆႉပၢႆႈတီႈယူႇတၼ်းသဝ်းၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ႁိူၼ်းလႄႈၼႃးသမ်ႉ ယူႇတီႈၼႃး ႁႆးလူင်။ တီႈယူႇမႂ်ႇၼႆႉၵေႃႈ ႁဝ်းၶႃႈ ႁၢင်ႈႁႅၼ်းသေ ၶၢႆႉဢွၵ်ႇမႃးႁႃႁင်းၵူၺ်း။ ၶိုင်ႁင်းၵူၺ်းမူတ်းမူတ်း။ ယွၼ်ႉဝႃႈ တီႈၵဝ်ႇ ၼၼ်ႉ ႁဝ်းၶႃႈဢမ်ႇၸၢင်ႈယူႇယဝ်ႉ ပေႃးၶဝ်ႈၾူၼ်မႃးၼႆ ၼမ်ႉထူမ်ႈလုပ်ႇတႃႇသေႇၶႃႈ ယဝ်ႉ။ ပေႃးၶၢဝ်းၵၢင်ဝၼ်းသမ်ႉ ႁဝ်းၶႃႈ မႃးႁဵတ်းသူၼ်ႁႆႈၼႃး၊ ပေႃးၵၢင်ၶမ်ႈမႃး ပွၵ်ႈမိူဝ်းၼွၼ်းတီႈႁိူၼ်း ၼွၵ်ႈဝၢၼ်ႈပုၼ်ႉၶိုၼ်း။ ပၼ်ႁႃ ၵၢၼ်ၶုတ်းၶမ်း ၼႆႉ ဝၼ်းၼိုင်ႈလႄႈဝၼ်းၼိုင်ႈၼႆႉ ႁၢႆႉၸႃႉမႃးလိူဝ်ၵဝ်ႇၶႃႈယဝ်ႉ” ဝႃႈၼႆ။

ၵဵဝ်ႇလူၺ်ႈ လွင်ႈၶွမ်ႊပၼီႊ ဢၼ်မႃးၶုတ်းၶမ်း တီႈႁိမ်းဝၢၼ်ႈၼႃးႁႆးလူင်ၼႆႉ ၵူၼ်းဝၢၼ်ႈႁူမ်ႈၵၼ်သေ တၢင်ႇလိၵ်ႈ တုၵ်း ယွၼ်း ႁႂ်ႈၵိုတ်းယင်ႉ လၢႆလၢႆၵမ်းယဝ်ႉ။ ၵူၺ်းၵႃႈ ၶွမ်ႊပၼီႊၸိူဝ်းၼၼ်ႉ ဢမ်ႇၵိုတ်းယင်ႉသေဢမ်ႇၵႃး တေႃႈလဵဝ် ၶွမ်ႊပ ၼီႊမႂ်ႇယင်းၽိူမ်ႉၶဝ်ႈမႃးၶုတ်းထႅင်ႈ တင်းၼမ် ဝႃႈၼႆ။

“ႁဝ်းၶႃႈ တုၵ်းယွၼ်းႁႂ်ႈၶဝ်ၵိုတ်းယင်ႉၵၢၼ်ၶုတ်းၶမ်းၼၼ်ႉမႃး လၢႆၵမ်းယဝ်ႉ။ ၵဵဝ်ႇၵပ်းလွင်ႈၼႆႉ ပေႃႈႁဝ်းၶႃႈၵေႃႈ လႆႈလူႉ တၢႆ ယွၼ်ႉမၼ်းမႃးယဝ်ႉ။ ၵူၺ်းၵႃႈ လူင်ပွင်ၸိုင်ႈပၢၼ်လႂ်ၶိုၼ်ႈမႃးၵေႃႈ ဢမ်ႇမႃးတူၺ်းလူလွမ်ပၼ် ႁဝ်းၶႃႈသေဢိတ်း” ၵူၼ်းၼုမ်ႇ ဝၢၼ်ႈၼႃးႁႆးလူင် လၢတ်ႈၼႄၼင်ႇၼႆ။

ၶွမ်ႊပၼီႊ တႄႇမႃးၶုတ်းၶမ်း တီႈႁိမ်းဝၢၼ်ႈၼႃးႁႆးလူင်ၼႆႉ ၸဵမ်မိူဝ်ႈပီ 2007။ ယွၼ်ႉၵၢၼ်ၶုတ်းၶမ်းသေ ႁဵတ်းႁႂ်ႈႁူဝ်ႁႆႈ ၶႅင်းၼႃးၵူၼ်းမိူင်း ၼပ်ႉႁူဝ်ပၢၵ်ႇ လႆႈလူႉၵွႆသေဢမ်ႇၵႃး။ တုမ်ႉတိူဝ်ႉပႃး သိင်ႇဝႅတ်ႉလွမ်ႉလႄႈ မႄႈၼမ်ႉ ၸိူဝ်းၼႆႉ ထႅင်ႈ တင်းၼမ်။