လုၵ်ႈၸၢႆးဢႃယု 20 ပီ ၶႃႈႁႅမ်မႄႈတႄႉတႄႉၸဝ်ႈၵဝ်ႇ ဢႃယု 42 ပီ တၢႆယဝ်ႉ ၽၼ်းတႅပ်းတူဝ်တၢႆမႄႈပဵၼ် 5 ပွတ်းသေ ယဵတ်ႈသႂ်ႇဝႆႉၼႂ်းတူႈယဵၼ်။
ဝၼ်းတီႈ 25/11/2019 ယၢမ်းၵၢင်ၼႂ် ၸဝ်ႈၼႃႈတီႈပလိၵ်ႈထႆး ၶဝ်ႈၵူတ်ႇထတ်းတီႈႁိူၼ်းလင်ၼိုင်ႈ ဢၼ်မီးၼႂ်းသဵၼ်ႈတၢင်းတႃႈၶၢမ်ႈ 28 ၵုင်းထဵပ်ႈမိူင်းထႆး ႁၼ်မႅၼ်ႈတူဝ် ၵေႃႉပဵၼ်လုၵ်ႈၸၢႆး ၼွၼ်းၸူမ်ၵွင်လိူတ်ႈ၊ မိူၼ်တူဝ်ၵဝ်ႇ ဢဝ်ၵွင်ႈၸမ်ႈမႅပ်ႉ ၶႃႈတၢႆဝႆႉႁင်းၵူၺ်း။
လိူဝ်ၼၼ်ႉသမ်ႉလႆႈႁၼ်မႅၼ်ႈ ၶႅၼ်၊ ၶႃ၊ ႁူဝ် ၊ တူဝ်ၵူၼ်းပဵၼ်ပုတ်းပဵၼ်ပွတ်း ယဵတ်ႈဝႆႉၼႂ်းၶွင်ႉၼမ်ႉၶႅင် ၼႂ်းတူႈယဵၼ် ၼႂ်းသိုင်ႇၾႆးၶဝ် ။
တူဝ်လုၵ်ႈၸၢႆး ဢၼ်မၢတ်ႇၸဵပ်းမၢၵ်ႇၵွင်ႈဝႆႉၼၼ်ႉ ၸဝ်ႈၼႃႈတီႈသူင်ႇႁူင်းယႃၵမ်းလဵဝ်သေတႃႉ မၢတ်ႇၸဵပ်းႁၢဝ်ႈႁႅင်းလႄႈထႅင်ႈဝၼ်းၼိုင်ႈ ၼႂ်းဝၼ်းတီႈ 26 ၼၼ်ႉၵေႃႈလႆႈလုတၢႆၵႂႃႇ။
ပီႈၼွင်ႉလႄႈ ၵူၼ်းၸမ်ၸႂ်ၶႃမႄႈလုၵ်ႈတႄႉလၢတ်ႈဝႃႈ ၶႃမႄႈလုၵ်ႈ ယူႇၸွမ်းၵၼ်သွင်ၵေႃႉၵူၺ်း။ ဢမ်ႇယၢမ်ႈၽိတ်းမေႃးၵၼ်ယႂ်ႇလူင်ႁၢဝ်ႈႁႅင်း။ ၶမ်ႈဝၼ်းတီႈ 2 လုၵ်ႈၸၢႆးမၼ်းယင်းႁွင်ႉၵေႃႉႁၵ်ႉမၼ်းမႃးၵိၼ်ၶဝ်ႈၶမ်ႈၸွမ်းမႄႈမၼ်းယူႇ ယင်းဢမ်ႇမီးပၼ်ႁႃ ။ ဝၢႆးလင်ၸူႉလုၵ်ႈၸၢႆးမၼ်းမိူဝ်းၵႂႃႇ ၶႃမႄႈလုၵ်ႈၸင်ႇပဵၼ်ပၼ် ႁႃၵၼ်- ဝႃႈၼႆ။
ဢူၺ်းၵေႃႉလုၵ်ႈၸၢႆးမၼ်းတႄႉ လၢတ်ႈတီႈပလိၵ်ႈဝႃႈ – လႅပ်ႈတေပဵၼ်ပၼ်ႁႃၼႂ်းၵႄႈၶဝ်မႄႈလုၵ်ႈၵူၺ်း။ လႅပ်ႈဢမ်ႇမီးၵူၼ်းၼွၵ်ႈမႃးၶဝ်ႈၵဵဝ်ႇၸွမ်း။ လႅပ်ႈတေထဵင်ၵၼ်ယွၼ်ႉတႃႇသၢႆႈၼီႈ လဵၼ်ႈၵဵမ်းၼႂ်းၾူၼ်း (မိုဝ်းထိုဝ်) – ဝႃႈၼႆ။
ပလိၵ်ႈထႆးၾၢႆႇၵူတ်ႇထတ်းၵေႃႈပိုၼ်ၽၢဝ်ႇဝႃႈ – တူၺ်းတီႈတူဝ်မႄႈမၼ်း ဢၼ်ပဵၼ် ပိတ်းပဵၼ်ပွတ်း ၼၼ်ႉၵေႃႈ တႅၵ်ႇလႅင်းဝႃႈ မီးႁွႆးၼိဝ်ႉမိုဝ်းလုၵ်ႈၸၢႆးမၼ်းဝႆႉယူႇ ဝႃႈၼႆ။
လွင်ႈလုၵ်ႈၶႃႈႁႅမ်မႄႈၼႆႉ ပဵၼ်ယွၼ်ႉသင်တႄႉတႄႉၼႆတႄႉၽႂ်ၵေႃႈ ပႆႇႁူႉပဵၼ်တၢင်းၵၢၼ် တႅတ်ႈတႅတ်ႈ တေႃးတေႃး။
