ၸုမ်းသင်ၶၸဝ်ႈ တူင်ႇဝဵင်းလၢႆးၶႃႈ၊ ၵူၼ်းဝၢၼ်ႈ ႁႅင်းၵူၼ်း 100 ပၢႆ ၸတ်းႁဵတ်းပၢင်ၵုမ်ၵဵဝ်ႇလူၺ်ႈလွင်ႈ ၶွမ်ႊပၼီႊ တေ မႃးၶုတ်းထၢၼ်ႇႁိၼ် တီႈၼႂ်းဢိူင်ႇႁၢႆးသႅင် ၸႄႈဝဵင်းလၢႆးၶႃႈ ဝႃႈၼႆ။
ဝၼ်းတီႈ 22/11/2019 ယၢမ်းၵၢင်ၼႂ် 9 မူင်း ထိုင် 11 မူင်း ၵၢင်ဝၼ်း သင်ၶၸဝ်ႈလႄႈ ၵူၼ်းဝၢၼ်ႈ ႁူမ်ႈၵၼ်ၸတ်းႁဵတ်း ပၢင်ၵုမ် တီႈဢိူင်ႇႁၢႆးသႅင် ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။
ၸဝ်ႈသြႃႇ/ၶူး ၵေႃးသၼ်ႇလ ဝတ်ႉ/ ၵျွင်းပွင် ၸႄႈဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ “ ယွၼ်ႉပိူဝ်ႈဝႃႈ ပူၼ်ႉမႃးမိူဝ်ႈ ပီၵၢႆၼႆႉ မီးၶွမ်ႊပၼီႊၶဝ် မႃးၸၢမ်းတူၺ်းဝႃႈမီးထၢၼ်ႇႁိၼ်ၼႆလႄႈ ပီၼႆႉၵေႃႈ မိူဝ်ႈဝၼ်းတီႈ 2/11/2019 ၼၼ်ႉ မီးၵူၼ်းၼႂ်းၸုမ်းၶွမ်ႊပၼီႊ 3 ၵေႃႉ မႃးၸွမ်းႁွင်ႉၽူႈယႂ်ႇၵူၼ်းလူင်ၼႂ်းဢိူင်ႇႁၢႆးသႅင်သေ ႁႂ်ႈၵႂႃႇၼႄတီႈမီး ထၢၼ်ႇ ႁိၼ် ၵူၺ်းၵႃႈ ၵူၼ်းလူင် ဢိူင်ႇႁၢႆးသႅင် ဢမ်ႇပၼ်တၢင်းႁူမ်ႈမိုဝ်းလႄႈ ဢမ်ႇပဵၼ်ၵႂႃႇၸွမ်း” ဝႃႈၼႆ။
ပၢင်ဢုပ်ႇဢူဝ်းလႅၵ်ႈလၢႆႈဝၼ်းမိူဝ်ႈၼႆႉ မီးၸဝ်ႈသြႃႇလူင်ၸၼ်ႇတႃႇဝရ (ႁူဝ်ပဝ်ႈသင်ၶတူင်ႇဝဵင်းလၢႆးၶႃႈ)၊ ၸၢႆးၵျေႃႇၸေႇယ ၽူႈ တႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းလၢႆးၶႃႈလႄႈ ထႅင်ႈလၢႆလၢႆၵေႃႉ ၶဝ်ႈႁူမ်ႈဢုပ်ႇဢူဝ်းလႅၵ်ႈလၢႆႈ လွင်ႈၽွၼ်းၸႃႉလွင်ႈၶုတ်းထၢၼ်ႇႁိၼ် ဝႃႈၼႆ။
“ ယွၼ်ႉၼၼ်လႄႈ သင်ၶၸဝ်ႈလႄႈ ၵူၼ်းဝၢၼ်ႈၵူၼ်းမိူင်း ၼႂ်းဢိူင်ႇႁၢႆးသႅင် ႁဝ်းၶႃႈ တိုၼ်းဢမ်ႇလႆႈၸႂ် တိုၼ်းသၢၼ်ၶတ်း လွင်ႈဢၼ်ၶွမ်ႊပၼီႊ ၶဝ်တေမႃးၶုတ်းထၢၼ်ႇႁိၼ်ၼႆႉ ႁၢဝ်ႈႁၢဝ်ႈႁႅင်းႁႅင်း။ ပေႃးၶုတ်းထၢၼ်ႇႁိၼ်ၼႆႉ မၼ်းတေတုမ်ႉတိူဝ်ႉ တီႈသူၼ်ႁႆႈၼႃးလႄႈ တီႈပွႆႇဝူဝ်းၵႂၢႆး။ ယဝ်ႉၵေႃႈ ဢွင်ႈတီႈဢၼ်ၶဝ်တေမႃးၶုတ်းၼၼ်ႉ သမ်ႉၸမ်ဝၢၼ်ႈၼႃႇလႄႈ တေ တုမ်ႉတိူဝ်ႉပႃးပၢႆးယူႇလီ ၵူၼ်းဝၢၼ်ႈႁဝ်းၶႃႈ” ၵူၼ်းဝၢၼ်ႈၼႂ်းဢိူင်ႇႁၢႆးသႅင် လၢတ်ႈၼႄၼင်ႇၼႆ။
လိူဝ်သေၼၼ်ႉ ၵူၼ်းဝၢၼ်ႈၼႂ်းဢိူင်ႇၼႃးမၢင်းၵေႃႈ သင်ၶၵူၼ်းမိူင်း ၸႄႈဝဵင်းလၢႆးၶႃႈ သၢၼ်ၶတ်း ၶွမ်ႊပၼီႊလွႆၶႄႇၼၵႃး ဢၼ်ၶဝ်ႈမႃးၶုတ်းထၢၼ်ႇႁိၼ် ႁိမ်းဝၢၼ်ႈၼမ်ႉလိၼ်းၼၼ်ႉ ႁႂ်ႈၵိုတ်းယင်ႉသေ ႁႂ်ႈထွၼ်ဢွၵ်ႇပၼ်ၼႂ်းပိုၼ်ႉ တီႈၽႂ်းၽႂ်း။
ယွၼ်ႉဝႃႈ ၵၢၼ်ၶုတ်းထၢၼ်ႇႁိၼ်ၼႆႉ တုမ်ႉတိူဝ်ႉႁူဝ်ႁႆႈၶႅင်းၼႃး၊ သၽႃႇဝ သိင်ႇဝႅတ်ႉလွမ်ႉလႄႈ ပၢႆးယူႇလီ ၵူၼ်းဝၢၼ်ႈ ၸဵမ်ၸိူဝ်းၼႆႉ ဝႃႈၼႆ။
