ၽူႈၸၢႆး ဢႃယု 25 ပီ ၵေႃႉၼိုင်ႈ ၼႂ်းထုင်ႉမိူင်းငေႃႉ ယဵပ်ႇၺႃးမၢၵ်ႇမႅင်းၾင်လိၼ် ၼႂ်းၵိင်ႇၸႄႈဝဵင်းမိူင်းငေႃႉ တေႃႈလဵဝ် လႆႈသူင်ႇယူတ်းယႃ တူဝ်ဝႆႉတီႈႁူင်းယႃလူင် ၵျွၵ်ႉမႄး။
ဝၼ်းတီႈ 19/11/2019 ယၢမ်းၵၢင်ၼႂ် 6 မူင်း မၢႆးဢၢႆႈလူႇ ဢႃယု 25 ပီ ၵႂႃႇၼွၼ်းႁဵတ်းႁႆႈသေ တေပွၵ်ႈမႃးဢဝ် ၶွင်ၵိၼ်ယမ်ႉ တီႈႁိူၼ်း၊ မႃးယဵပ်ႇၺႃးမၢၵ်ႇမႅင်းၾင်လိၼ် ၼႂ်းၵႄႈမၢၼ်ႈၵၢင် တင်း ဝၢၼ်ႈၼႃးလုၺ်း ၵိင်ႇၸႄႈ ဝဵင်းမိူင်းငေႃႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။
ၵူဝ်ႇဢႃႈပၼ်း ၸုမ်းၸွႆႈထႅမ်တူင်ႇဝူင်း (ၸၢႆး) တိုမ်းတမၢဝ်း ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းဝၢၼ်ႈ ၵပ်း သိုပ်ႇ မႃးတီႈႁဝ်းၶႃႈသေ ႁဝ်းၶႃႈလႆႈၵႂႃႇႁပ်ႉဢဝ်မႃး ယဝ်ႉၵေႃႈ လႆႈသူင်ႇၵႂႃႇတီႈႁူင်းယႃလူင်ၵျွၵ်ႉမႄးယဝ်ႉၶႃႈ။ မၼ်းၸၢႆး တိူဝ်ႉ ၺႃး မၢတ်ႇၸဵပ်းၸွမ်းတိၼ် 2 ၾၢႆႇ၊ ၸွမ်းမိုဝ်း၊ ၸွမ်းၼႃႈလႄႈ ၸွမ်းတူဝ် ၵမ်ႈၽွင်ႈ” ဝႃႈၼႆ။
မၢႆးဢၢႆႈလူႇ ယဵပ်ႇၺႃးမၢၵ်ႇၼႆႉ တိူဝ်ႉၺႃးမၢတ်ႇၸဵပ်းႁၢဝ်ႈႁႅင်းဝႆႉ ဝႃႈၼႆ။
ဢွင်ႈတီႈ မၢႆးဢၢႆႈလူႇ ယဵပ်ႇၺႃးမၢၵ်ႇမႅင်းၼၼ်ႉ ပဵၼ်တီႈတပ်ႉသိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းတဢၢင်း(လွႆ) ပဵၼ် ပၢင်တိုၵ်းၵၼ် ႁၢဝ်ႈႁႅင်း တင်ႈတႄႇ ဝၼ်းတီႈ 11/11/2019 ၼၼ်ႉမႃး ဝႃႈၼႆ။
ၼႂ်းၸႄႈဝဵင်းၵျွၵ်ႉမႄးၼႆႉ တႄႇဢဝ် လိူၼ်သႅပ်ႊထႅမ်ႊၿိူဝ်ႊမႃးတေႃႇထိုင်ယၢမ်းလဵဝ် ၵူၼ်းမိူင်း ဢၼ်ယဵပ်ႇၺႃးမၢၵ်ႇမႅင်း ၾင်လိၼ် တင်းမူတ်း ဢမ်ႇယွမ်း 20 ၵေႃႉယဝ်ႉ ဝႃႈၼႆ။
