Thursday, March 28, 2024

“ပၢၼ်ယူႇတႂ်ႈဢိင်းၵလဵတ်ႈ ၶႅၼ်းၸႂ်လိူဝ်ပၢၼ်မိူဝ်ႈလဵဝ်”

Must read

ယူႇတီႈၶႃႈႁဝ်းႁၼ်ထိုင်တႄႉ လႆႈဝႃႈၾၢႆႇၽူႈၼမ်းမၢၼ်ႈၶဝ်မီးၽႅၼ်ၵၢၼ်၊ ဝၵ်ႉဢဝ်တိုဝ်ႉတၢင်းလီ ဢၼ်ဢိင်းၵလဵတ်ႈၶဝ်မိူဝ်းၵႂႃႇ။ ဢဝ်ၼႃႈတိူဝ်ႈဝႃႈ ပေႃးႁဝ်းဢမ်ႇမီးတပ်ႉသိုၵ်း ပေႃးႁဝ်းဢမ်ႇမီးဢဵၼ်ႁႅင်းၶိူင်ႈၵွင်ႈၵၢင်ႇ ၵႅတ်ႇၶႄ ၸၢင်ႈပဵၼ်ၼၼ်ပဵၼ်ၼႆၼႆသေ ဝၵ်ႉဢဝ်တိုဝ်ႉတၢင်းၼႆႉသေ ၶွတ်ႇၽွတ်ႈမႃးတပ်ႉသိုၵ်း။

ယူႇတီႈၸၢဝ်းၶိူဝ်းႁဝ်းၶႃႈတႄႉ တေလႆႈဝႃႈပႆႇလွတ်ႈလႅဝ်း၊ ယွၼ်ႉဝႃႈပေႃးတေတူၺ်းၶိုၼ်းပိုၼ်းမၼ်း ယူႇပႃႈတႂ်ႈဢိင်းၵလဵတ်ႈ ၶႅၼ်းၸႂ်လိူဝ်သေ ပၢၼ်မိူဝ်ႈလဵဝ်။ မၢၼ်ႈၶဝ်တႄႉဢဝ်ၵုင်ႇမုၼ် ဝၼ်းလွတ်ႈလႅဝ်း ဝၼ်းလွတ်ႈလႅဝ်းၼႆယူႇ၊ ၵွပ်ႈဝႃႈဝၢႆးဢင်းၵိတ်းမိူဝ်းၵႂႃႇၼႆႉ မၢၼ်ႈၶဝ်လႆႈပဵၼ်ယႂ်ႇ လႆႈၽွင်းငမ်းၼိူဝ်ပိူၼ်ႈ၊ ယူႇတီႈၶဝ်တေဝၢင်းၽႅၼ်ၵၢၼ်ၸိူဝ်ႉၸၢတ်ႈၶဝ်ၵႂႃႇတိၵ်းတိၵ်း။ ၶဝ်ၼႆႉႁႂ်ႈၸၢဝ်းၶိူဝ်းႁၼ်ထိုင်ဝႃႈ ယွၼ်ႉၶဝ်လႄႈႁဝ်းၵေႃႈလႆႈလွတ်ႈလႅဝ်းၵႂႃႇ။

- Subscription -

ဝၼ်းမိူဝ်ႈၼႆႉ ပၼ်ႁႃၵၢၼ်မိူင်းႁဝ်းၶႃႈၵေႃႈသုၵ်ႉမႃးၵူႈမိုဝ်ႉၵူႈဝၼ်း၊ ဢၼ်ပဵၼ်ယူႇမိူဝ်ႈလဵဝ်ၼႆႉ ႁဝ်းၶႃႈမႃးဝႃႈမၼ်းပဵၼ်ၽႅၼ်ၵၢၼ်မၢၼ်ႈ မၢၼ်ႈႁဵတ်းၼႆသေ ႁဝ်းၵုမ်ႇပွင်ႉယူႇၵေႃႈမၼ်းဢမ်ႇယဝ်ႉ၊ ၼင်ႇႁိုဝ်တေပူၼ်ႉလႆႈလၢႆးၽႅၼ်ပိူၼ်ႈၼႆႉ ႁဝ်းသမ်ႉတေၽႅၼ်ၸိူင်ႉႁိုဝ် ဢၼ်ၼႆႉဢၼ်ၼိုင်ႈ။

သင်ဝႃႈၶႂ်ႈလႆႈလွင်ႈငမ်းယဵၼ်တႄႉတႄႉ လူင်ပွင်ၸိုင်ႈၶဝ် လီလႆႈပိုတ်ႇၸႂ်ၵႂၢင်ႈ၊ ယွမ်းႁပ်ႉဝႃႈ ဢၼ်ၶဝ်ႁဵတ်းၼႆႉ မၼ်းဢမ်ႇၸွမ်းထမ်းတြႃး။ ယူႇတီႈၸၢဝ်းၶိူဝ်းၵေႃႈ ႁၼ်ဝႃႈဢၼ်ၶဝ်ႁဵတ်းၼႆႉ မၼ်းဢမ်ႇၸွမ်းတြႃး ဢမ်ႇၸွမ်းပိူင် ဢမ်ႇၸွမ်းၶေႃႈတူၵ်းလူင်း။ ၶဝ်သမ်ႉႁပ်ႉဝႃႈ ပဵၼ်ပုၼ်ႈၽွၼ်းတႃႇၵႅတ်ႇၶႄ၊ ၶေႃႈၸီႉသင်ႇတၢင်းၼိူဝ်လူင်းမႃး ႁဵတ်းၼႆႉမႃးတိၵ်းတိၵ်းတႄႉ မၼ်းဢမ်ႇသိုဝ်ႈယူဝ်း၊ ပေႃးဢမ်ႇမီးလွင်ႈသိုဝ်ႈယူဝ်း တႃႇတေမီးလွင်ႈငမ်းယဵၼ်မႃးၼႆႉ မၼ်းဢမ်ႇပဵၼ်မႃးလႆႈ။ ဢွၼ်တၢင်းသုတ်း ႁႂ်ႈၶဝ်မီးလွင်ႈသိုဝ်ႈယူဝ်း၊ ယွမ်းႁပ်ႉ၊ မေႃဝူၼ်ႉသွၼ်ႇသုၼ်ႇပိူၼ်ႈသုၼ်ႇႁဝ်း။ ပေႃးၵုမ်ႇဝႆႉဢတ်ႉတယႂ်ႇသေ ဢၼ်ႁဝ်းႁဵတ်းၼႆႉထုၵ်ႇဢိူဝ်ႈမႅၼ်ႈဢိူဝ်ႈ မၼ်းပႆႇမီးလွင်ႈငမ်းယဵၼ်။

ဢၼ်ႁဝ်းၶႃႈဢုပ်ႇဢူဝ်းၵၢၼ်မိူင်းမိူဝ်ႈလဵဝ်ၼႆႉ ဢမ်ႇၸႂ်ႈႁဝ်းၶႃႈယွၼ်းသုၼ်ႇလိူဝ်၊ ယွၼ်ႉပိူဝ်ႈဢၼ်ႁဝ်းၶႃႈထုၵ်ႇလႆႈထုၵ်ႇပဵၼ် ထုၵ်ႇမီးၼၼ်ႉ ထုၵ်ႇပိူၼ်ႈဢမ်ႇတြႃးသေႁုပ်ႈယိုတ်းဢဝ်ၵႂႃႇလႄႈ ယွၼ်းၶိုၼ်းၵူၺ်း။ မၼ်းဢမ်ႇၸႂ်ႈႁဝ်းၵႂႃႇယွၼ်းၶူဝ်းၶွင်ၶဝ်၊ မၼ်းပဵၼ်ၶူဝ်းၶွင်ပူႇမွၼ်ႇႁဝ်းၶႃႈလၢင်းလၢင်း၊ ပဵၼ်ၶူဝ်းပူၺ်ႈလႄႈႁဝ်းယွၼ်းၶိုၼ်းၵူၺ်း။ ဢၼ်ၼႆႉၶဝ်သမ်ႉဝႃႈ ၶဝ်မီးသုၼ်ႇပႂ်ႉပႃး (ထိင်းသိမ်း) ဢဝ်လွင်ႈႁူမ်ႇလူမ်ႈဢိူဝ်ႈ ဝႃႈၼႆတိၵ်းတိၵ်းတႄႉ ႁဝ်းဝႃႈလွင်ႈငမ်းယဵၼ်ၼႆႉ မၼ်းတိုၼ်းဢမ်ႇပဵၼ်မႃးလႆႈ။

ၸၢႆးပိုၼ်းႁၢၼ်
ႁူဝ်ပဝ်ႈၸုမ်းၵူၼ်းၼုမ်ႇတႆး TYO
ၸႄႈဝဵင်းသီႇသႅင်ႇ မိူင်းတႆးပွတ်းၸၢၼ်း

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း