မိူဝ်ႈၼႆႉ ဝၼ်းတီႈ 13/11/2019 ယၢမ်းၵၢင်ၼႂ်မွၵ်ႈ 7 မူင်း တပ်ႉသိုၵ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းတဢၢင်း TNLA ပဵၼ်ပၢင်တိုၵ်းၵၼ် ၾၢႆႇၸၢၼ်းၵူတ်ႉၶၢႆ ဢမ်ႇပေႃးၵႆလွႆသၢမ်သိပ်းၼၼ်ႉလႄႈ သဵၼ်ႈတၢင်းလူင်မူႇၸေႊ – လႃႈသဵဝ်ႈ လႆႈ ၵိုတ်းၶၢတ်ႇၵႂႃႇ ၸူဝ်ႈၶၢဝ်း။

လုင်းၸၢႆးလႃႉ ၵူၼ်းမိူင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပဵၼ်ပၢင်တိုၵ်းၵၼ် တႄႇၵၢင်ၼႂ် မွၵ်ႈ 7 မူင်းၼႆႉ တၢင်းၾၢႆႇသိုၵ်းမၢၼ်ႈ (တပ်ႉၵွင်ႈလူင်) ၶဝ် ဢဝ်မၢၵ်ႇလူင်ယိုဝ်းဢွၼ်တၢင်း လုၵ်ႉတီႈဝဵင်းၵူတ်ႉၶၢႆသေယိုဝ်းၶႃႈဢေႃႈၼၼ်ႉ ။ ယဝ်ႉၵေႃႈ ရူတ်ႉၵႃး ၵူၼ်းၵႂႃႇတႃႈပႆတၢင်း လႆႈၵိုတ်းယင်ႉဝႆႉၸူဝ်ႈၶၢဝ်း တေႃႈလဵဝ်တႄႉ ယၢမ်းၵၢင်ၼႂ် 10 မူင်းၼႆႉ ၵႂႃႇမႃး ၵမ်ႈၽွင်ႈယဝ်ႉ” ဝႃႈၼႆ။

သိုပ်ႇလၢတ်ႈဝႃႈ “ရူတ်ႉၵႃး ဢၼ်လုၵ်ႉတၢင်း ၵူတ်ႉၶၢႆ ၵႂႃႇ မူႇၸေႊၼၼ်ႉ သိုၵ်းမၢၼ်ႈၶဝ် ႁၢမ်ႈႁႄႉဝႆႉ၊ ဢၼ်လုၵ်ႉတၢင်းမူႇ ၸေႊ ၶဝ်ႈမႃးတၢင်းဝဵင်းၵူတ်ႉၶၢႆ တီႈၼမ်ႉၽၵ်းၵႃၼၼ်ႉသမ်ႉ သိုၵ်းတဢၢင်း(လွႆ) ၶဝ်ႁၢမ်ႈႁႄႉဝႆႉ ဢမ်ႇပၼ်ရူတ်ႉၶိုၼ်ႈ လူင်းၵႂႃႇမႃး” ဝႃႈၼႆ။

တေႃႈထိုင်ယၢမ်းလဵဝ် သဵင်ၵွင်ႈတၢင်းသွင်ၾၢႆႇယဵၼ်ဝႆႉယူႇသေတႃႉ တိုၵ်ႉမီးလွင်ႈၶဵင်ႈၶႅင်ၵၢၼ်သိုၵ်းၵၼ်ဝႆႉယူႇ ဝႃႈၼႆ။

လုင်းၸၢႆးလႃႉ သိုပ်ႇလၢတ်ႈဝႃႈ “ တေႃႈလဵဝ်တႄႉ ၵူၼ်းမိူင်းပၢႆႈၽေးသိုၵ်း၊ မၢတ်ႇၸဵပ်းတႄႉ ပႆႇငိၼ်းၶႃႈ။ သဵင်ၵွင်ႈၵၢင်ႇ ပိုတ်းယိုဝ်းၵၼ်တႄႉ ယဵၼ်ၵႂႃႇယဝ်ႉ။ ၼႂ်ၼႆႉတႄႉ ပၢင်တိုၵ်းၶႂ်ႈႁႅင်းဝႆႉၶႃႈဢေႃႈ”ဝႃႈၼႆ။

မိူဝ်ႈပူၼ်ႉမႃး ဝၼ်း – သွင်ဝၼ်းၼႆႉ တပ်ႉသိုၵ်းလူင်ပွင်ၸိုင်ႈမၢၼ်ႈ တင်း သိုၵ်းတဢၢင်း(လွႆ) TNLA ပဵၼ်ပၢင်တိုၵ်းၵၼ် ႁၢဝ်ႈႁႅင်း တၢင်းပွတ်းဝၢၼ်ႈတေႃႉၽေႇ ဢိူင်ႇၵုၼ်ၵွၵ်ႇ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ႁဵတ်းႁႂ်ႈၵူၼ်းမိူင်းဢမ်ႇႁတ်း ၵႂႃႇမႃး။ သိုၵ်းလူင်ပွင်ၸိုင်ႈမၢၼ်ႈ ၸႂ်ႉၶိူင်ႈၵွင်ႈလူင် ယိုဝ်းၸွႆႈ လုၵ်ႉတၢင်းမိူင်းငေႃႉ- ၵျွၵ်ႉမႄးသေယိုဝ်း ၵူၼ်းပိုၼ်ႉတီႈ ပွတ်း မိူင်းငေႃႉလၢတ်ႈၼႄၼင်ႇၼႆ။