ပၢင်ပွႆးပွႆႇႁူင်းၾႆးမိၼ် ၼႂ်းဝၼ်းထူၼ်ႈ 2 ၼႆႉ တင်းမူတ်း ၶဝ်ႈၶဵင်ႇၵၼ် 40 လုၵ်ႈပၢႆ။
ဝၼ်းတီႈ 5/11/2019 ပၢင်ပွႆးႁူင်းၾႆးမိၼ်/ လိူၼ်သိပ်းသွင်မူၼ်း ၸတ်းတီႈပၢင်ႇပွႆႇႁူင်းၾႆးမိၼ် ဢဝေႇယႃႇ ဝဵင်းတူၼ်ႈတီး ၸိုင်ႈတႆးပွတ်းၸၢၼ်း။ ႁူင်းၾႆးႁၢင်ႈၵႃတုၼ်း/ သတ်း ဢၼ်ပွႆးၵၢင်ဝၼ်း တင်းမူတ်း မီး 30 လုၵ်ႈပၢႆ။ ဢၼ်ပွႆႇၵၢင်ၶမ်ႈ (ညမီးကြီး/ စိန်နားပန်) သမ်ႉ တင်းမူတ်းမီး 11 လုၵ်ႈ ဝႃႈၼႆ။
မိူဝ်ႈဝၼ်းထူၼ်ႈ 1 ဝၼ်းပိုတ်ႇပၢင်ပွႆး ဝၼ်းတီႈ 4 ၼၼ်ႉ ႁူင်းၾႆးမိၼ်ၶဝ်ႈၶဵင်ႇၵၼ် ယၢမ်းၵၢင်ဝၼ်း ဢၼ်ပွႆႇႁၢင်ႈၵႃတုၼ်း/ တူဝ်သတ်း တင်းမူတ်းမီး 30 လုၵ်ႈ။ ဢၼ်ပွႆႇၵၢင်ၶမ်ႈသမ်ႉ 10 လုၵ်ႈ။
ၼၢင်းသႅင် ၵူၼ်းမႃးၶဝ်ႈပွႆး လၢတ်ႈဝႃႈ “ ႁဝ်းၶႃႈႁၼ်တႄႉ ဝႃႈမၼ်းၵိုၼ်းလီတႄႉတႄႉ။ ၵူၺ်းၵႃႈ ထၢမ်တူၺ်းၵူၼ်းပိုၼ်ႉ တီႈတႄႉဝႃႈ ယင်းဢမ်ႇပႆႇၵိုၼ်းပဵင်းပီၵၢႆ ၵွၼ်ႇၶႃႈဝႃႇၼႆ။ ယူဝ်မၼ်းတိုၵ်ႉတႄႇၵူၺ်းႁိုဝ် ဢမ်ႇႁူႉ”ဝႃႈၼႆ။
ပီၼႆႉဝၼ်းပွႆးထူၼ်ႈၼိုင်ႈ ဝၼ်းပိုတ်ႇပၢင်ၼၼ်ႉ မီးၾူၼ်တူၵ်းယႃႉပွႆးၵမ်းၼိုင်ႈယူႇ။ ဝၼ်းထူၼ်ႈ 2 တႄႉ ၾိင်ႈၾႃႉၶႅမ်ႉ လႅပ်ႈလီငၢမ်း။ ၽူႈပွင်ပဵၼ်ပၢင်ပွႆးယင်းပိုၼ်ၽၢဝ်ႇဝႃႈ ပေႃးၾိင်ႈၾႃႉဢမ်ႇၶႅမ်ႉယူဝ်ၶေးတေတိူဝ်းၶႂၢၵ်ႈပၼ် ဝၼ်းပွႆးထႅင်ႈ ဝၼ်းၼိုင်ႈယူႇ ဝႃႈၼႆ။
ပွႆးပွႆႇႁူင်းၾႆးမိၼ် လိူၼ်သိပ်းသွင်မူၼ်းပီၼႆႉ ႁူင်းၾႆးမိၼ် ဢၼ်ၶဝ်ႈၶဵင်ႇၵၼ် ဢၼ်ပွႆႇၵၢင်ဝၼ်း တင်းမူတ်းမီး 281 လုၵ်ႈ၊ ဢၼ်ပွႆႇၵၢင်ၶမ်ႈ တင်းမူတ်း 115 လုၵ်ႈ ႁူမ်ႈၵၼ်တင်းမူတ်းတေမီး 396 လုၵ်ႈ ဝႃႈၼႆ။
ပၢင်ပွႆးပီၼႆႉ လူင်ပွင်ၸိုင်ႈပိုၼ်ၽၢဝ်ႇဝႆႉဝႃႈ တေၸတ်းႁဵတ်း ၼႂ်းဝၼ်းတီႈ 4 – 12/11/2019 တႃႇၶၢဝ်းတၢင်း 9 ဝၼ်း ဝႃႈၼႆ။
