ၵူၼ်းမိူင်းတူၼ်ႈတီး၊ ၸဝ်ႈၼႃႈတီႈလၢႆလၢႆၾၢႆႇ ႁူမ်ႈၵၼ်ပိုတ်ႇပၢင်ပွႆးႁူင်းၾႆးမိၼ် ဢမ်ႇၼၼ် ပွႆးလိူၼ်သိပ်းသွင်မူၼ်း ၵိုၼ်းၶွၼ်ႈလီ ပီၼႆႉ ႁူင်းၾႆးမိၼ်ဢၼ်ၶဝ်ႈၶဵင်ႇၵၼ် တင်းမူတ်းတေမီးမွၵ်ႈ 390 လုၵ်ႈပၢႆ ဝႃႈၼႆ။
ဝၼ်းတီႈ 4/11/2019 ပဵၼ်ဝၼ်းတႄႇပိုတ်ႇပၢင်ပွႆး တီႈပၢင်ႇပွႆႇႁူင်းၾႆးမိၼ် ဢဝေႇယႃႇ ဝဵင်းလူင်တူၼ်ႈတီး ၸိုင်ႈတႆး ပွတ်းၸၢၼ်း။
ၼႂ်းဝၼ်းပိုတ်ႇပၢင်ၼၼ်ႉ ႁူင်းၾႆးမိၼ်ဢၼ်ပွႆႇၵၢင်ဝၼ်း ဢၼ်ပဵၼ်ႁၢင်ႈၵႃတုၼ်း/ သတ်းၼၼ်ႉ တင်းမူတ်းမီး ပွႆႇ ၶိုၼ်ႈ 30 လုၵ်ႈ။ ဢၼ်ပွႆႇၵၢင်ၶမ်ႈ ႁူင်းၾႆး(ညမီးကြီး/ စိန်နားပန်) သမ်ႉ 10 လုၵ်ႈ ဝႃႈၼႆ။
ပၢင်ပိုတ်ႇပၢင်ပွႆးႁူင်းၾႆးမိၼ်ၼႆႉ မီးၸွမ်ၽွင်းလူင်ၸႄႈမိူင်းတႆး Dr. လိၼ်းထုတ်ႉ မႃးပိုတ်ႇပၢင်။ မူၼ်ႈၸႂ်ပၼ်တၢင်း ၵႃႈၸၢဝ်းၶိူဝ်း ပီႈၼွင်ႉ ၸၢဝ်းၶိူဝ်းတႆး၊ ပဢူဝ်း၊ တၼု ၊ ဢၢင်းသႃး၊ ၵူဝ်းၵၢင်ႉ၊ လိသေႃး ၸိူဝ်းယူႇၼႂ်းမိူင်းတႆး။
ၼႂ်းပီၼႆႉ မီးၸုမ်းၶဝ်ႈၶဵင်ႇပွႆႇႁူင်းၾႆးမိၼ်လၢႆၸုမ်း မႃးႁၢင်ႈႁႅၼ်းပွႆႇႁူင်းၾႆးမိၼ် တႃႇပဵၼ်တီႈမူၼ်ႈၸႂ်ပၼ် ပီႈၼွင်ႉ မႃးၶဝ်ႈပၢင်ပွႆးသေဢမ်ႇၵႃး တႃႇၼႄၼမ်ႉၵတ်ႉ ၾၢႆႇႁဵတ်းသၢင်ႈႁၢင်ႈႁႅၼ်း ႁူင်းၾႆးမိၼ်ႁၢင်ႈလီပႃး။ လိူဝ်ၼၼ်ႉ တႃႇ ၶဵင်ႇလႆႈငိုၼ်းသူးရၢင်းဝလ်း ၸဵမ်ၸိူဝ်းၼႆႉပႃး။
ပၢင်ပွႆးႁူင်းၾႆးမိၼ် ပီၼႆႉ တေၸတ်းႁဵတ်း ၼႂ်းဝၼ်းတီႈ 4 ထိုင် 12 လိူၼ်ၼူဝ်ႊဝႅမ်ႊၿိူဝ်ႊ 2019 ။ လိူဝ်ၼၼ်ႉ တၢင်း
ၾၢႆႇၵေႃပွင်ပဵၼ်ပၢင်ပွႆးၶဝ်လၢတ်ႈဝႃႈ သင်ၾိင်ႈၾႃႉရႃႇသီႇ ဢမ်ႇလီၸိုင် ႁၢင်ႈႁႅၼ်း တႃႇတေတိူဝ်းၶႂၢၵ်ႈပၼ်ထႅင်ႈ ဝၼ်းၼိုင်ႈယူႇ ဝႃႈၼႆ။
