ၼႂ်းဝၼ်းလဵဝ် တီႉလႆႈယႃႈမဝ်းၵမ် သွင်တီႈ တေတူၵ်းမႅၼ်းယူႇ 14,000 သႅၼ်ပၢႆ ၼႂ်းၸိုင်ႈတႆး ပွတ်းႁွင်ႇ- ပွတ်းၸၢၼ်း။
ဝၼ်းတီႈ 31/10/2019 ယၢမ်းၵၢင်ၼႂ် 10 မူင်းၶိုင်ႈ ပလိၵ်ႈပႂ်ႉလၢၼ်ႇၵဵတ်ႉ ၶူဝ်တႃႈၵေႃႈ ၵိင်ႇၸႄႈဝဵင်းၵႃလိ ၸႄႈ ဝဵင်းၵုၼ် ႁဵင် ၸိုင်ႈတႆးပွတ်းၸၢၼ်းၼၼ်ႉ တီႉလႆႈ ယႃႈမဝ်းၵမ် တူၵ်းမႅၼ်ႈငိုၼ်းမၢၼ်ႈ 1 မိုၼ်ႇသႅၼ်ပျႃး။
လိူဝ်ၼၼ်ႉ ၼႂ်းဝၼ်းလဵဝ်ၵူၺ်းၼင်ႇၵဝ်ႇ ယၢမ်းၵၢင်ဝၼ်း 12 မူင်းၶိုင်ႈၼၼ်ႉ ပလိၵ်ႈတီႉလႆႈယႃႈမႃႉ တီႈႁိမ်းၵဵတ်ႉဢူဝ်ႊ ရီႊယမ်ႊတေႊ တၢင်းၶဝ်ႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ တေတူၵ်းမႅၼ်ႈၶၼ်းငိုၼ်းမၢၼ်ႈ မွၵ်ႈ 4,800 သႅၼ်ပျႃး ဝႃႈၼႆ။
ဢၼ်တီႉလႆႈတီႈၶူဝ်တႃႈၵေႃႈ ယႃႈမဝ်းၵမ်ၵၢတ်ႊတမိၼ်ႊ(ကတ်တမင်း) ၼၼ်ႉ တင်းမူတ်း 100 ၵီႊလူဝ်ႊ။ သႂ်ႇဝႆႉထူင် ၼဵင်ႈ။ လိူဝ်ၼၼ်ႉ တီႉလႆႈထႅင်ႈငိုၼ်းမၢၼ်ႈ 38,4000 ပျႃး၊ ငိုၼ်းထႆး 5,520 ဝၢတ်ႇလႄႈ ၾူၼ်း 1 လုၵ်ႈ ပလိၵ်ႈတႅမ်ႈဢွၵ်ႇ ဝႆႉၼႆ။
ၼွၵ်ႈလိူဝ်ၼၼ်ႉ ဢၼ်တီႉလႆႈတီႈႁိမ်းၵဵတ်ႉ/ လၢၼ်ႇ ဢူဝ်ႊရီႊယမ်ႊတေႊ လႃႈသဵဝ်ႈၼၼ်ႉ ယႃႈမႃႉၶၼ်ငိုၼ်း 4,800 သႅၼ်ပျႃး။ ယႃႈမႃႉၼႆႉ သႂ်ႇဝႆႉၼႂ်းၵွၵ်းသပျုႇ ဝႃႈၼႆ။
တေႃႈလဵဝ် မွင်ႇပႃႇလူး(ႁွင်ႉ) သူသူၼ်း ဢႃယု 44 ပီ ၺႃးၵုမ်းၶင်တူဝ်ဝႆႉတီႈလႃႈသဵဝ်ႈသေ ၸၢႆးထုၼ်းဢေး ဢႃယု 50 ပီ ၼၼ်ႉသမ်ႉ ပလိၵ်ႈဝဵင်းၵႃလိၵုမ်းၶင်တူဝ်ဝႆႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ