ပလိၵ်ႈမၢၼ်ႈ ၵူတ်ႇထတ်းတီႉလႆႈ ၶိူင်ႈႁုင်တူမ်ႈယႃႈမဝ်းၵမ် ၶၼ်ငိုၼ်းႁဵင်သႅၼ်ပၢႆ တီႈမူႇၸေႊ ၸိုင်ႈတႆးပွတ်းႁွင်ႇ လႅၼ် လိၼ်တႆး – ၶႄႇ။
ဝၼ်းတီႈ 17/10/2019 ယၢမ်းၵၢင်ၼႂ် 10 မူင်းၼၼ်ႉ ပလိၵ်ႈမူႇၸေႊ ၶဝ်ႈၵူတ်ႇထတ်း ၼႂ်းႁွင်ႈၵဵပ်းၶွင် မွင်ႇ ၵျေႃႇဢူး ဢႃယု 25 ပီ တီႈႁိမ်းဝၢၼ်ႈၼွင်ယၢၼ်း ဢိူင်ႇပၢင်ၶမ်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ ၵူတ်ႇထတ်းတီႉၺွပ်းလႆႈ ၼမ်ႉ ထၢတ်ႈတႃႇႁုင်ႁဵတ်းယႃႈမဝ်းၵမ် (ဓာတုဆေးရည်) 28,468 ရိတ်ႊတိူဝ်ႊၼႆ ၾၢႆႇတပ်ႉပလိၵ်ႈၽဵဝ်ႈမူၺ်ႉယႃႈမဝ်းၵမ် ပိုၼ် ၽၢဝ်ႇဢွၵ်ႇ။
သိုပ်ႇသေၼၼ်ႉ မိူဝ်ႈဝၼ်းတီႈ 18/10/2019 ၼၼ်ႉ ၶဝ်ႈၵူတ်ႇထတ်းတီႉလႆႈထႅင်ႈ တီႈမွင်ႇသူဝ်းဢူး ပွၵ်ႉၸွၼ်ၸူဝ်ႇ တီႉ လႆႈၼမ်ႉထၢတ်ႈ ၶႅမ်ႊမီႊၵိူဝ်ႊတႃႇႁုင်ႁဵတ်းယႃႈမဝ်းၵမ် လႄႈ ၶိူင်ႈႁုင်တူမ်ႈယႃႈမဝ်းၵမ် တႃႇငိုၼ်း 1 ႁဵင်သႅၼ်ပၢႆ။
ၶိူင်ႈႁုင်တူမ်ႈယႃႈမဝ်းၵမ် ဢၼ်တီႉလႆႈၼၼ်ႉ မိူၼ်ၼင်ႇ DL-TARTARIC Acid ၼမ်ႉၼၵ်း 22,800 ၵီႊလူဝ်ႊ (မႅၼ်ႈငိုၼ်း 1,140 သႅၼ်)။ Diaminopropionic Acid ၼမ်ႉၼၵ်း 700 ရိတ်ႊတိူဝ်ႊ (မႅၼ်ႈငိုၼ်း 21 သႅၼ်ပျႃး)၊ ထၢတ်ႈဢမူဝ်ႊၼီႊယမ်ႊ ၵရူဝ်ႊႁၢႆႉ ၼမ်ႉၼၵ်း 100 ၵီႊလူဝ်ႊ(မႅၼ်ႈငိုၼ်း 20 သႅၼ်ပျႃး)၊ ဢိၵ်ႇထႅင်ႈထၢၼ်ႇ (အရိုးမီးသွေး) ၼမ်ႉၼၵ်း 700 ၵီႊ လူဝ်ႊ(မႅၼ်ႈငိုၼ်း 35 သႅၼ်) လႄႈ ၾူၼ်း 2 လုၵ်ႈ ၸဵမ်ၸိူဝ်းၼႆႉ။
တေႃႈလဵဝ် ယူႇတီႈပလိၵ်ႈမူႇၸေႊ ဢဝ်ၵူၼ်းသွင်ၵေႃႉၼႆႉ ပိုတ်ႇလိူင်ႈၸႅင်ႈၵႂၢမ်းတီႈလုမ်းတြႃးဝႆႉ သေ ဢမ်ႇၵႃး ၵၵ်းၶင် တူဝ်ဝႆႉ တီႈႁူင်းပလိၵ်ႈမူႇၸေႊ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ