ၵူၼ်းဝၢၼ်ႈမၢၵ်ႇလၢင်း ၸႄႈဝဵင်းလၢႆးၶႃႈ သွင်ၽူဝ်မေးၽိတ်းမေႃးၵၼ်သေ ထိုင်တီႈလူင်းမႆႉ လူင်းမိုဝ်း ဢဝ်မိတ်ႈတႅင်းၵၼ် ၵေႃႉပဵၼ်မေးၼၢင်းလႆႈလူႉတၢႆ ၵေႃႉပဵၼ်ၽူဝ်သမ်ႉ လႆႈမၢတ်ႇၸဵပ်း သူင်ႇယူတ်းယႃတူဝ်ဝႆႉ။
ဝၼ်းတီႈ 31/10/2019 ယၢမ်းဝၢႆးၼၼ်ႉ သွင်ၽူဝ်မေး ၸၢႆးထုၼ်းဢွင်ႇ တင်း ၼၢင်းပၼ်း ၽိတ်းမေႃးၵၼ် တီႈႁိူၼ်း ဝၢၼ်ႈ မၢၵ်ႇလၢင်း ဢိူင်ႇဝၢၼ်ႈၸေႈ ၸႄႈဝဵင်းလၢႆးၶႃႈ ၸိုင်ႈတႆးပွတ်းၸၢၼ်း။ ၶႃသွင်ၽူဝ်မေး ထိုင်တီႈလူင်းမိုဝ်းတေႃႇၵၼ် ဢဝ် မိတ်ႈတႅင်းၵၼ် ၵေႃႉပဵၼ်မေးၼၢင်း ၼၢင်းပၼ်း လႆႈမၢတ်ႇၸဵပ်းႁၢဝ်ႈႁႅင်းသေ ၵႂႃႇလူႉသဵင်ႈ တီႈႁူင်းယႃလွႆလႅမ်။ ၵေႃႉ ပဵၼ်ၽူဝ် ၸၢႆးထုၼ်းဢွင်ႇသမ်ႉ လႆႈမၢတ်ႇၸဵပ်းသေ ၶိုၼ်ႈႁူင်းယႃ ဝႆႉတီႈလွႆလႅမ်မိူၼ်ၵၼ်။
လုင်းၸၢႆးပၼ်ႇတ ၽူႈၵွၼ်းဢိူင်ႇဝၢၼ်ႈၸေႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ သွင်ၽူဝ်မေး ၽိတ်းမေႃးၵၼ်သေ ထိုင်တီႈပေႃးလႆႈလူင်းမႆႉ လူင်းမိုဝ်းဢဝ်မိတ်းတႅင်း။ လွင်ႈပိူင်ပဵၼ်မၼ်းတႄႉ ၶဝ်ႁဵတ်းၸိူင်ႉႁိုဝ်သေ ၶႃႈႁႅမ်တႅင်းၵၼ် ဢၼ်ဝႃႈၼၼ်ႉ ဢမ်ႇလႆႈႁူႉလွင်ႈမၼ်း။ ၽိူဝ်ႇၵႂႃႇတူၺ်းတီႈႁိူၼ်းၶဝ် လႆႈႁၼ်ၼွၼ်းမၢတ်ႇၸဵပ်းတင်းသွင်ၵေႃႉ တီႈၼႂ်း ႁိူၼ်းသေ လႆႈသူင်ႇၵႂႃႇႁူင်းယႃ လၢႆးၶႃႈ။ မေႃယႃၶဝ်ဝႃႈ ပဵၼ်ဢၼ်မႆႈၸႂ်ႁႅင်းဝႆႉၼႆသေ သူင်ႇၵႂႃႇတီႈႁူင်းယႃလွႆလႅမ်။ ၵေႃႉ ပဵၼ်မေးၸၢႆးထုၼ်းဢွင်ႇၼၼ်ႉ ယွၼ်ႉမၢတ်ႇၸဵပ်း လိူတ်ႈဢွၵ်ႇၼမ်သေ လႆႈလူႉတၢႆၵႂႃႇတီႈႁူင်းယႃလွႆလႅမ်၊ ၵေႃႉပဵၼ်ၽူဝ် တႄႉ လႆႈယူတ်းယႃတူဝ်ဝႆႉတီႈႁူင်းလွႆလႅမ်ဝႆႉယူႇ” ဝႃႈၼႆ။
“ ၶဝ်ၽိတ်းမေႃးၵၼ်ၼၼ်ႉ ပဵၼ်ယွၼ်ႉသင် လွင်ႈသင်ဢၼ်ဝႃႈၼၼ်ႉ ဢမ်ႇလႆႈႁူႉလွင်ႈမၼ်း၊ လႅပ်ႈတေပဵၼ်ပၼ်ႁႃ လွင်ႈၼႃႈႁိူၼ်းၵူၺ်” လုင်းၸၢႆးပၼ်ႇတလၢတ်ႈၼႄၼင်ႇၼႆ။
ၼၢင်းပၼ်းၼႆႉ ဢႃယု 28 ပီ ပဵၼ်လုၵ်ႈယိင်း လုင်းၸၢမ်ႇ ပႃႈၸိင်ႇ။ ၸၢႆးထုၼ်းဢွင်ႇသမ်ႉ ဢႃယု 30 ပီပၢႆ ပဵၼ်လုၵ်ႈၸၢႆး လုင်းၵေႃးလိင်ႇတ ပႃႈၽူၼ် ပဵၼ်ၵူၼ်းဝၢၼ်ႈမၢၵ်ႇလၢင်း တင်းသွင်ၵေႃႉ။ ၸၢႆးထုၼ်းဢွင်ႇ တင်း ၼၢင်းၽူၼ်ၼႆႉ မီးလုၵ်ႈ ႁူမ်ႈၵၼ် 4 ၵေႃႉ။ ၵေႃႉပဵၼ် လုၵ်ႈၵေႃႉယႂ်ႇ ဢႃယု တိုၵ်ႉလႆႈ 10 ပီပၢႆၵူၺ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ