သွင်ၽူဝ်မေးၽိတ်းမေႃးၵၼ်ႁၢဝ်ႈႁႅင်းသေ ၵေႃႉပဵၼ်ၽူဝ် ဢဝ်ၵွင်ႈယိုဝ်းမေးၸဝ်ႈၵဝ်ႇလႄႈ ပေႃႈမႄႈၾၢႆႇမေး မီးလွင်ႈ မၢတ်ႇၸဵပ်း 3 ၵေႃႉ၊ တၢႆ 1 ၵေႃႉ။
ဝၼ်းတီႈ 23/9/2019 ယၢမ်းၵၢင်ၶမ်ႈ ၸၢႆးတဵင်းဢွင်ႇ တင်း ၼၢင်းၶမ်းဢွင်ႇ သွင်ၽူဝ်မေး ၽိတ်းမေႃးၵၼ် တီႈပွၵ်ႉၵွင်းႁုင်း ၸႄႈဝဵင်းႁူဝ်ပၢင်ႇ ၸိုင်ႈတႆးပွတ်းႁွင်ႇ။ ၵေႃႉပဵၼ်ၽူဝ်ၸၢႆးတဵင်းဢွင်ႇ ဢဝ်ၵွင်ႈယိုဝ်း ၵေႃႉပဵၼ်မေးၸဝ်ႈၵဝ်ႇလႄႈ ပေႃႈမႄႈ ၾၢႆႇမေး ထႅင်ႈ 2 ၵေႃႉ။
ၸၢႆးထုၼ်းလူင် ၵူၼ်းပိုၼ်ႉတီႈၸႄႈဝဵင်းႁူဝ်ပၢင်ႇ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝၼ်းတီႈ 24/9/2019 ယၢမ်းၵၢင်ၶမ်ႈ ထူပ်းႁၼ်တူဝ်တၢႆ ၸၢႆးတဵင်းဢွင်ႇ တီႈႁိမ်းဝၢၼ်ႈၼွင်ႁၢတ်ႇႁၢႆး မၼ်းၸၢႆးၶိုၼ်းယိုဝ်းတူဝ်ၸဝ်ႈၵဝ်ႇမၢတ်ႇၸဵပ်းသေ လူႉတၢႆ” ဝႃႈၼႆ။
ၵေႃႉဢၼ်ၺႃးယိုဝ်းသေ မၢတ်ႇၸဵပ်းဝႆႉၼၼ်ႉသမ်ႉ ၼၢင်းၶမ်းဢွင်ႇၺႃးယိုဝ်း တိူဝ်ႉတီႈၼႃႈဢူၵ်း၊ ဢႅင်ႈလႄႈ ၶႅၼ်မိုဝ်း။ ၵေႃႉပဵၼ်ပေႃႈ လုင်းသၢင်ႇယီႈသမ်ႉ ၺႃးယိုဝ်းတိူဝ်ႉတီႈငွၵ်းသွၵ်ႇ ႁွႆးၼိုင်ႈ၊ ၵေႃႉပဵၼ်မႄႈ ပႃႈဢေးသိင်းသမ်ႉ ၺႃးယိုဝ်းတီႈ ၼႃႈဢူၵ်းႁွႆးၼိုင်ႈ လႄႈ တီႈၶေႃႈမိုဝ်းၾၢႆႇၶႂႃ ႁွႆးၼိုင်ႈ။
ၸၢႆးထုၼ်းလူင် လၢတ်ႈဝႃႈ “ ၵေႃႉပဵၼ်ပေႃႈတင်းမႄႈတႄႉ ၶႅၼ်းၶိုၼ်ႈမႃးၶႃႈယဝ်ႉ။ ၵေႃႉပဵၼ်လုၵ်ႈယိင်းတႄႉ တိူဝ်ႉၺႃး မၢတ်ႇၸဵပ်းႁၢဝ်ႈႁႅင်းသေ လႅပ်ႈတေတိူဝ်ႉ သဵၼ်ႈဢဵၼ်ပႃး။ ပွတ်းလၢင်ႈမၼ်းၼၢင်းဢမ်ႇၶႂ်ႈတူင်ႉလႆႈ။ မေႃယႃၶဝ် ၸႂ်ႉၵႂႃႇ ယူတ်းယႃ တီႈႁူင်းယႃ ဝဵင်းလိူဝ်ႇယဝ်ႉ။ ၸၢႆးတဵင်းဢွင်ႇၵေႃႉဢၼ်ယိုဝ်းသႂ်ႇၼၼ်ႉတႄႉ မိူဝ်ႈဝၼ်းတီႈ 24 ယၢမ်းၵၢင်ၶမ်ႈ ၼၼ်ႉ မၼ်းၸၢႆးၶိုၼ်းယိုဝ်းတူဝ်မၼ်းတၢႆၶိုၼ်း” ဝႃႈၼႆ။
ၵူၼ်းၸိူဝ်းမၢတ်ႇၸဵပ်းလႆႈသူင်ႇယူတ်းယႃတူဝ်တီႈႁူင်းယႃလႃႈသဵဝ်ႈ ၵေႃႉပဵၼ်ပေႃႈလႄႈ မႄႈတႄႉ ဢမ်ႇထိုင်တီႈလႆႈမႆႈၸႂ်။ ၼၢင်းၶမ်းဢွင်ႇတႄႉ မၢတ်ႇၸဵပ်းႁၢဝ်ႈႁႅင်း ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈၶဝ် လႆႈပိုတ်ႇလိူင်ႈ လူၺ်ႈၶႃႈႁႅမ်တၢႆ မတ်ႉတႃ 307/309 ဝႆႉတီႈႁူင်းပလိၵ်ႈၸႄႈဝဵင်းႁူဝ် ပၢင်ႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ