ၵူၼ်းမိူင်းၼႂ်းၸိုင်ႈတႆးပွတ်းႁွင်ႇ ၼႂ်းၸႄႈဝဵင်းသီႇပေႃႉ – ၵျွၵ်ႉမႄး ၸိူဝ်းၼႆႉ ဢမ်ႇႁူႉလွင်ႈတၢင်းသေ ၵႆႉမီးၵူၼ်းယိပ်းၵွင်ႈ ၶဝ်ႈယိုဝ်းတၢႆလႄႈ ဢမ်ႇမီးလွင်ႈႁူမ်ႇလူမ်ႈ ၵႂႃႇလႂ်မႃးလႂ်ၵေႃႈလႆႈမႆႈၸႂ်ယူႇၵူႈၶၢဝ်းယၢမ်း ဝႃႈၼႆ။

ဝၼ်းတီႈ 24/10/2019 ယၢမ်းၵၢင်ၶမ်ႈ 9 မူင်း မီးၸုမ်းဢမ်ႇႁူႉၾၢႆႇ ၶဝ်ႈယိုဝ်း တီႈတႃႈရူတ်ႉ တၢင်းၼႃႈလုမ်းပႃႇတီႇသၢင်ႇသီႈ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ လွင်ႈၵူၼ်းမိူင်းလူႉတၢႆမၢတ်ႇၸဵပ်း ဢမ်ႇမီး။

ၸၢႆးထုၼ်းဝိၼ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး 9 မူင်းၵၢင်ၶမ်ႈ ၶဝ်ႈမႃးယိုဝ်း။ ဢမ်ႇမီးလွင်ႈတုမ်ႉတိူဝ်ႉၵူၼ်းမိူင်းၶႃႈ။ ၵူၺ်းၵႃႈ ၵူၼ်းမိူင်းတႄႉ လႆႈဝႆႉသတိၵၼ်သေ ၵႂႃႇမႃး ၶႃႈ။ ၵူဝ်ၵၼ်ၶႃႈဢေႃႈ” ဝႃႈၼႆ။

ၼႂ်းၸႄႈဝဵင်းၵျွၵ်ႉမႄးၼႆႉ ၵႆႉမီးလွင်ႈပိုတ်းယိုဝ်းၵၼ်ယူႇတႃႇသေႇလႄႈ ၵူၼ်းမိူင်းလႆႈမႆႈၸႂ် ၵူဝ်ၵၼ်သေ ယွၼ်ႉဢမ်ႇ မီးလွင်ႈႁူမ်ႇလူမ်ႈ၊ ဢမ်ႇမီးပၵ်းပိူင်သုမ်ႇငမ်း ၸဵမ်ၸိူဝ်းၼႆႉ ၵူၼ်းမိူင်းပိုၼ်ႉတီႈလႆႈဢွၼ်ၵၼ်ၾၢင်ႉသတိ ၵႂႃႇမႃးၵၼ် ဝႃႈၼႆ။

ၸၢႆးမွင်ႇလႃႉ ၵူၼ်းပိုၼ်ႉၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ တီႈၵျွၵ်ႉမႄးႁဝ်းၶႃႈၼႆႉ ဢမ်ႇမီးလွင်ႈႁူမ်ႇလူမ်ႈသင်ၶႃႈ။ တၢင်းလင်/ ၵွင်ႇၵေႃႈႁဝ်းၶႃႈၼႆႉ ဢမ်ႇႁူႉဝႃႈ တေမီးၽႂ်မႃးယိုဝ်းသႅဝ်ငႅဝ်ယူႇတႃႇသေႇၶႃႈဢေႃႈ။ ၵူဝ်ၵူႈလွင်ႈလွင်ႈ၊ ၵူဝ်ယူႇ ၵူႈၾၢႆႇၾၢႆႇယဝ်ႉၶႃႈ။ ၽႂ်ပဵၼ်ၽႂ်ၵေႃႈဢမ်ႇႁူႉၸၵ်းယဝ်ႉ” ဝႃႈၼႆ။

သိုပ်ႇလၢတ်ႈဝႃႈ “ ၸုမ်းဢၼ်မႃးယိုဝ်းတီႈၼႃႈလုမ်းပႃႇတီႇသၢင်ႇသီႈၼၼ်ႉ ပဵၼ်ၸုမ်းလႂ် ၼမ်ႉမိုဝ်းၽႂ် ဢၼ်ဝႃႈၼၼ်ႉ ဢမ်ႇလႆႈႁူႉ” ဝႃႈၼႆ။

ၼႂ်းၸႄႈဝဵင်းၵျွၵ်ႉမႄးၼႆႉ မီးၸုမ်းယိပ်းၵွင်ႈၵၢင်ႇတူင်ႉၼိုင်ၼမ်၊ ၵႆႉမီးလွင်ႈပိုတ်းယိုဝ်းၵၼ်ယူႇတႃႇသေႇ။ ၵဵဝ်ႇၵပ်းလွင်ႈ ၼႆႉ ဢမ်ႇတွၼ်ႉမီး ၵၢၼ်တီႉၺွပ်းၵူၼ်းႁၢႆႉလႆႈမႃးသေပွၵ်ႈ ဝႃႈၼႆ။

ပူၼ်ႉမႃး လၢႆဝၼ်းၼႆႉ တီႈႁၢၼ်ႉၶၢႆၼမ်ႉမၼ်း တၢင်းၶဝ်ႈဝဵင်းၵျွၵ်ႉမႄးၼၼ်ႉၵေႃႈ ၺႃးၵူၼ်း ဢဝ်မၢၵ်ႇပွမ်းပွမ် ႁၢင်ႈၵၢင် ဝႆႉ ၼႂ်းႁွင်ႈၼမ်ႉသေ လွၵ်ႇငိုတ်ႈယွၼ်းငိုၼ်း 10 သႅၼ်ပျႃး လွင်ႈၼႆႉၵေႃႈယၢမ်ႈမီးမႃး ဝႃႈၼႆ။

ၼႂ်းၸႄႈဝဵင်းသီႇပေႃႉၵေႃႈ တေႃႈၼင်ႇၼၼ် ၵႆႉၵႆႉၺႃးၵူၼ်းယိပ်းၵွင်ႈၵၢင်ႇၶဝ်ႈယိုဝ်း၊ မိူၼ်ၼင်ႇ ၸဝ်ႈသြႃႇဝတ်ႉၶိူဝ်းၼိမ်း ၺႃးယိုဝ်း၊ မိူဝ်ႈပီၵၢႆသမ်ႉ ၸဝ်ႈသြႃႇၵျွင်းယွတ်ႈ (ရွှေကျင်) ၺႃးယိုဝ်း။ ႁၢၼ်ႉတေႃႇဝၼ်းမိူဝ်ႈၼႆႉ ၾၢႆႇလႂ်ပႃးၽႂ်၊ ပႃးၸဵမ်ၾၢႆႇ လူင်ပွင်ၸိုင်ႈယင်းဢမ်ႇတီႉၺွပ်းလႆႈတူဝ်ၵူၼ်းႁၢႆႉ။