ၵူၼ်းမိူင်း ၼႂ်းၸႄႈဝဵင်းသီႇပေႃႉ လႄႈ ၸိူဝ်းယူႇ သၢပ်ႇၼမ်ႉမႃႉ၊ ပႃးၸဵမ်ၽူႈႁၵ်ႉမႄႈၼမ်ႉ ႁူမ်ႈၵၼ် ၵဵပ်းလၢႆးမိုဝ်း/ ၸိုဝ်ႈ သဵင်သေ တေတၢင်ႇထိုင် ၽူႈမီးပုၼ်ႈၽွၼ်း လွင်ႈဝႃႈ တိုၼ်းဢမ်ႇယွမ်းႁပ်ႉၾၢႆ ဢၼ်တေတဵင်ႁႅတ်ႉၵႄးၼမ်ႉမႃႉ။

ၶွမ်ႊပၼီႊ Unienergy Co.Ltd ဢၼ်တေဢၢင်ႈၶိုင်သၢင်ႈႁဵတ်းၾၢႆၼိူဝ်မႄႈၼမ်ႉမႃႉၼၼ်ႉ ၶတ်းၸႂ်ၶဝ်ႈႁႃသူၼ်းတုမ် ၵူၼ်းဝၢၼ်ႈ ၼႂ်းပိုၼ်ႉတီႈ ထုင်ႉၼမ်ႉမႃႉ ၸႄႈဝဵင်းသီႇပေႃႉယူႇ။

ၸၢႆးတဵင်းမိၼ်ႉ ႁူဝ်ပဝ်ႈၶွၼ်ႈတုမ်ဢဵၼ်ႁႅင်းၵူၼ်းၼုမ်ႇတႆး လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ်ၼႆႉ ၶွမ်ႊပၼီႊၶဝ် ၶတ်းၸႂ် ၶဝ်ႈႁႃၵူၼ်းဝၢၼ်ႈ/ သူၼ်းတုမ်ၵူၼ်းဝၢၼ်ႈယူႇ။ ၵွပ်ႈၼႆ မိူဝ်ႈဝႃးၼႆႉ ႁဝ်းၶႃႈ လႆႈၵႂႃႇသူၼ်းတုမ်ၵူၼ်းဝၢၼ်ႈ ၵဵပ်း လၢႆးမိုဝ်း/ၸိုဝ်ႈသဵင်သေ ႁူမ်ႈႁႅင်းၵၼ်သၢၼ်ၶတ်းၶွမ်ႊပၼီႊဢၼ်တေမႃးတဵင်ၾၢႆဢေႃႈ” ဝႃႈၼႆ။

ဝၼ်းတီႈ 21/10/2019 ၸုမ်းၵူၼ်းၼုမ်ႇထုင်ႉၼမ်ႉမႃႉ လူင်းပိုၼ်ႉတီႈႁူပ်ႉထူပ်း ၵူၼ်းဝၢၼ်ႈၼမ်ႉမႃႉ၊ ၼႃးၼၢင်း၊ ပဵင်း သၢႆးလႄႈ ဝၢၼ်ႈၼႃးၵုၼ်သေ ဢုပ်ႇဢူဝ်း/ သူၼ်းတုမ်ၵၼ်ၵဵပ်းဢဝ်ၸိုဝ်ႈသဵင် လူင်းလၢႆးမိုဝ်း တႃႇႁူမ်ႈသၢၼ်ၶတ်းၶွမ်ႊ ပၼီႊ။ ယၢမ်းလဵဝ်ၸိုဝ်ႈသဵင်လၢႆးမိုဝ်းတင်းမူတ်းလႆႈ 500 ပၢႆယဝ်ႉ ဝႃႈၼႆ။

ၸၢႆးတဵင်းမိၼ်ႉ သိုပ်ႇလၢတ်ႈဝႃႈ “ ႁဝ်းၶႃႈ တေသူၼ်းတုမ် လူင်းၵဵပ်းလၢႆးမိုဝ်းၸိူဝ်းယူႇ ၸွမ်း သၢပ်ႇၼမ်ႉမႃႉ တေႃႇထိုင် ၼမ်ႉတူႈ တင်းမူတ်းၶႃႈ” ဝႃႈၼႆ။

လၢႆးမိုဝ်း/ လၢႆးၸိုဝ်ႈ တႃႇတေသၢၼ်ၶတ်းၶွမ်ႊပၼီႊ ဢၼ်တေမႃးသၢင်ႈၾၢႆ ၼိူဝ်မႄႈၼမ်ႉမႃႉၼႆႉ တေတၢင်ႇၸူး ၽူႈၵိူဝ်း ၵုမ်မိူင်းႁူမ်ႈတုမ် တေႃႇဢွင်ႇသၢၼ်းသူႉၵျီႇ၊ ၽွင်းလူင်ၾၢႆႇၾႆးၾႃႉ ၸႄႈမိူင်းတႆး၊ ၽူႈတႅၼ်းသၽႃး ပႃႇတီႇႁူဝ်သိူဝ် ၸႄႈ ဝဵင်းသီႇပေႃႉလႄႈ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ၸဵမ်ၸိူဝ်းၼႆႉ။

ၸၢႆးပီး ၽူႈၵွၼ်းဢိူင်ႇၼမ်ႉမႃႉ လၢတ်ႈဝႃႈ “ ၵူၼ်းဝၢၼ်ႈႁဝ်းၶႃႈတႄႉ ဢမ်ႇဝႃႈၸုမ်းလႂ် သင်မႃးသၢင်ႈၾၢႆၼိူဝ်မႄႉၼမ်ႉမႃႉ ၼႆၸိုင် ႁဝ်းၶႃႈ တိုၼ်းသၢၼ်ၶတ်းၵူႈၸုမ်းၶႃႈယဝ်ႉ။ ယဝ်ႉၵေႃႈ ႁဝ်းၶႃႈ ဢမ်ႇႁပ်ႉဢုပ်ႇဢူဝ်းႁူပ်ႉထူပ်းၸွမ်း ၸုမ်းလႂ်ၶႃႈ” ဝႃႈၼႆ။

မိူဝ်ႈၼႆႉ ဝၼ်းတီႈ 22/10/2019 ၵူၼ်းၼုမ်ႇထုင်ႉၼမ်ႉမႃႉ လူင်းသူၼ်းတုမ် ႁူပ်ႉထူပ်းၵူၼ်းဝၢၼ်ႈ ဝၢၼ်ႈမွၵ်ႇတွင်း၊ ၼႃး လွႆလႄႈ ၼႃးသၢႆး ၸဵမ်ၸိူဝ်းၼႆႉ။

ၾၢႆဢၼ်တေသၢင်ႈၼိူဝ်မႄႈၼမ်ႉမႃႉၼႆႉ တေႁဵတ်းဢွၵ်ႇႁႅင်းၾႆးၾႃႉတႃႇ 25 မႄႊၵႃႊဝတ်ႊ။ ၵဵဝ်ႇၵပ်းလွင်ႈၼႆႉ ၵူၼ်း ပိုၼ်ႉ တီႈထုင်ႉၼမ်ႉမႃႉ ဢွၼ်ၵၼ်သၢၼ်ၶတ်းမႃးႁၢဝ်ႈႁႅင်း။ မိူဝ်ႈဝၼ်းတီႈ 14/8/2019 လူင်ပွင်ၸိုင်ႈမၢၼ်ႈ တင်း ၶွမ်ႊ ပၼီႊၶဝ် လႆႈလူင်းလၢႆးမိုဝ်း MOU တႃႇလူင်းၵူတ်ႇထတ်းၼႂ်းပိုၼ်ႉတီႈသေ သၢင်ႈၾၢႆ။