(ၸၢႆးၸိူင်းသႅၼ် သူင်ႇၶၢဝ်ႇ) ပႃႇတီႇႁူဝ်သိူဝ် SNLD ၸႄႈတွၼ်ႈတူၼ်ႈတီး ၸတ်းႁဵတ်းပၢင်သွၼ် ယုၵ်ႉမုၼ်းၼမ်ႉ ၵတ်ႉ ၵူၼ်းၼုမ်ႇလႄႈ လုၵ်ႈၸုမ်း ၶၢဝ်းတၢင်း (5) ဝၼ်း ပိူဝ်ႈတႃႇ ႁဵၼ်းႁူႉလွင်ႈၵၢၼ်မိူင်း၊ ၵၢၼ်ပႃႇတီႇလႄႈ ၵၢၼ်သ ၽႃး ၸဵမ်ၸိူဝ်းၼႆႉ။

ပၢင်သွၼ်ၼႆႉ ၸတ်းႁဵတ်း တႄႇဢဝ် ဝၼ်းတီႈ 19-23/10/2019 တီႈႁိူၼ်းၵႅမ်ႁူဝ်ပဝ်ႈ 2 လုင်းၶမ်းပိူင်ႇၾႃႉ ဝဵင်းတူၼ်ႈ တီး ၸိုင်ႈတႆးပွတ်းၸၢၼ်း မီးၵူၼ်းၼုမ်ႇလႄႈ လုၵ်ႈၸုမ်း ၶဝ်ႈႁူမ်ႈလဵပ်ႈႁဵၼ်းမွၵ်ႈ 40 ၵေႃႉ။

ၸၢႆးၸွမ်ဝၼ်း ႁူဝ်ပဝ်ႈပႃႇတီႇႁူဝ်သိူဝ် ၸႄႈဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ ပၢင်သွၼ်ၼႆႉ ပူင်သွၼ်ပၼ် လိူင်ႈ ပႃႇတီႇ။ ပွင်ႇဝႃႈၵၢၼ်ပႃႇတီႇလႄႈ တင်းၵၢၼ်သၽႃး။ ယဝ်ႉၵေႃႈ ႁွင်ႉမႃး ၽူႈႁူႉၽူႈမေႃၶဝ် မႃးသပ်းလႅင်းၼႄ ပၼ်။ ဢၼ်ႁဝ်းလိူၵ်ႈဝႆႉ ၵူၼ်းၼုမ်ႇ ၼိုင်ႈၸႄႈဝဵင်း ႁႃႈႁူၵ်းၵေႃႉ မႃးႁူမ်ႈၵၼ် မီးယူႇမွၵ်ႈ (40) ၵေႃႉၼႆႉ” ဝႃႈၼႆ။

သိုပ်ႇလၢတ်ႈဝႃႈ “ တီႈတူၼ်ႈတီးၼႆႉ မႃးသပ်းလႅင်းၼႄလွင်ႈ ပိုၼ်းပႃႇတီႇ၊ လၵ်းၼမ်းပႃႇတီႇ ႁႂ်ႈလုၵ်ႈၸုမ်းပႃႇတီႇႁဝ်း ပေႃးႁူႉပွင်ႇၸႅင်ႈလႅင်းလီသေ ႁႂ်ႈႁူႉပႃးလွင်ႈသၽႃး ဢၼ်ပဵၼ်ယူႇတေႃႈလဵဝ်ၼႆႉ ပဵၼ်ဝႆႉၸိူင်ႉႁိုဝ် ၼႆၸိူဝ်းၼႆႉ” ဝႃႈၼႆ။

ပၢင်သွၼ်ၼႆႉ မီးၽူႈၶဝ်ႈႁူမ်ႈ ၽိုၵ်းၽွၼ်ႉ တင်းမူတ်း 40 ၵေႃႉ ပဵၼ်ၵူၼ်းၼုမ်ႇ/ ၵူၼ်းမိူင်းတၢင်းပွတ်းယွင်ႁူၺ်ႈ၊ တူၼ်ႈတီး၊ လွၵ်းၸွၵ်ႇ၊ ႁူဝ်ပူင်းလႄႈ သီႇသႅင်ႇ ၸဵမ်ၸိူဝ်းၼႆႉ။ ဝၢႆးၼၼ်ႉ တေမီးပၢင်သွၼ် သိုပ်ႇၵႂႃႇပိုတ်ႇထႅင်ႈတၢင်း လွႆလႅမ် လႄႈ တၢင်း ၸိုင်ႈတႆးပွတ်းဢွၵ်ႇၶူင်းထႅင်ႈ ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 15/10/2019 ၼၼ်ႉၵေႃႈ ယူႇတီႈပႃႇတီႇႁူဝ်သိူဝ် SNLD ၸႄႈဝဵင်းမိူင်းယႆသေ ၸတ်းႁဵတ်းပၢင် သွၼ်ပၼ်ၸုမ်းပွင်ၵၢၼ်မႂ်ႇ ပွၵ်ႈႁႅၵ်းၵႂႃႇ ဝႃႈၼႆ။