ငဝ်းတူင်ႉ လွင်ႈလိၼ်ႁၢမ်းလႅၼ် (Soil Without Land) ဢၼ်ထၢႆႇဝႆႉလွင်ႈၵူၼ်းၼုမ်ႇသိုၵ်းတႆး ၼႃႈလိၼ်သိုၵ်းမၢႆ 1 ၵဵင်း တုင်ၼၼ်ႉ တေၼႄ တီႈဝတ်ႉၵူႇတဝ်ႈ ၸႄႈဝဵင်းၵဵင်းမႆႇ ၼႂ်းဝၼ်းတုမ်းသိလ် ဢွၵ်ႇဝႃႇသႃ။

ပေႃးထိုင်မႃး ဝၼ်းတီႈ 12/10/2019 ယၢမ်းၵၢင်ၶမ်ႈ 7 မူင်း ယူႇတီႈၵေႃလိၵ်ႈလၢႆးလႄႈ ၾိင်ႈငႄႈတႆး၊ ၶွမ်ႊမတီႊဝတ်ႉၵူႇ တဝ်ႈ လႄႈ ၼူၼ်းထဝတ်း ၼၢမ်းပဵၼ်ၵျၽူၼ်း ၽူႈၸတ်းၵၢၼ် Director ၾၢႆႇထၢႆႇငဝ်းတူင်ႉ တေႁူမ်ႈၵၼ် ၼႄငဝ်းတူင်ႉ လွင်ႈ “လိၼ်ႁၢမ်းလႅၼ်” လွင်ႈသိုၵ်းတႆး – လႅၼ်လိၼ်တႆး တီႈဝတ်ႉၵူႇတဝ်ႈ ဢိူင်ႇသီႇၽုမ်း ၸႄႈဝဵင်းၵဵင်းမႆႇ ၸိုင်ႈထႆး။

ၸၢႆးသႅင်ယ ႁူဝ်ပဝ်ႈ ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ လၢတ်ႈတီႈၽူႈတွႆႇႁွၵ်ႈဝႃႈ “ ငဝ်းတူင်ႉလိူင်ႈၼႆႉ လမ်ႇလွင်ႈ တွၼ်ႈတႃႇတႆးႁဝ်းတႄႉတႄႉ ၵွပ်ႈပိူဝ်ႈပဵၼ်လွင်ႈတႆးသေ ၶဝ်ႁဵတ်းမႃးၼႄၼႂ်းႁူင်းၼင်လူင်ၼႂ်းမိူင်းထႆးၵေႃႈ လႆႈၼႄ မႃးယူႇ။ ၵူၺ်းၵႃႈ ၵူၼ်းတႆးႁဝ်းသမ်ႉ ဢမ်ႇပေႃးမီးတိုဝ်ႉတၢင်းၶဝ်ႈၵႂႃႇတူၺ်းၼမ်လႄႈ ၵမ်းၼႆႉ ၶဝ်ၵေႃႈတင်ႈၸႂ်ၶႂ်ႈမႃးၼႄ ပၼ်ပီႈၼွင်ႉတႆးႁဝ်း ဢၼ်ႁဝ်းၶႃႈၸၢင်ႈၶွၼ်ႈတုမ်ၵၼ်လႆႈၼၼ်ႉသေ ၸင်ႇမႃးသၢႆၼႄတီႈဝတ်ႉၵူႇတဝ်ႈၼႆႉ” ဝႃႈၼႆ။

ငဝ်းတူင်ႉ လွင်ႈလိၼ်ႁၢမ်းလႅၼ်ၼႆႉ ယၢမ်ႈၼႄၼႂ်းႁူင်းၼင်လူင် ၼႂ်းမိူင်းထႆး မိူဝ်ႈဝၼ်းတီႈ 15/8/2019 မႃး။ ၵမ်းၼႆႉ တွၼ်ႈတႃႇပီႈၼွင်ႉတႆး/ ႁႅင်းၵၢၼ်တႆး ပေႃးတေမီးတိုဝ်ႉတၢင်း လႆႈတူၺ်းၼႆသေ ၸင်ႇလႆႈမႃးၼႄပၼ် တီႈဝတ်ႉၵူႇ တဝ်ႈထႅင်ႈ ဝႃႈၼႆ။

ၸၢႆးသႅင်ယ လၢတ်ႈဝႃႈ “ တေသၢႆၼႄ ၼႂ်းဝၼ်းတုမ်းသိလ် ဢွၵ်ႇဝႃႇသႃ တေပဵၼ်ယၢမ်းၵၢင်ၶမ်ႈ 7 မူင်း တေသၢႆၼႄလၢႆလၢႆ ဢမ်ႇလႆႈသဵင်ႈငိုၼ်းသေဝၢတ်ႇ၊ ၶဝ်ႈတူၺ်းလၢႆလၢႆၵူၺ်းၶႃႈ။ ယွၼ်ႉၼၼ် ဝွၵ်ႇၸိူၼ်းထိုင် ပီႈၼွင်ႉတႆးႁဝ်း တီႈၸမ်ၵႆ ႁူမ်ႈၵၼ်မႃးတူၺ်းလူၵၼ် ၼမ်ၼမ်ၶႃႈ” ဝႃႈၼႆ။

လွင်ႈသၢႆၼႄ ငဝ်းတူင်ႉလွင်ႈလိၼ်ႁၢမ်းလႅၼ် ဢၼ်တေၼႄတီႈဝတ်ႉၵူႈတဝ်ႈၼႆႉ ယူႇတီႈၶွမ်ႊပၼီႊၵူဝ်ၵႄႇ(บริษัทโก๋แก่) ႁပ်ႉပဵၼ်ၸဝ်ႈတႃႇၼၵမ်ႉၸွႆႈထႅမ်ပၼ် ဝႃႈၼႆ။

တႃႇတေပဵၼ်မႃး ငဝ်းတူင်ႉ “လိၼ်ႁၢမ်းလႅၼ်” Soil Without Land” ၼႆႉ လႆႈၸႂ်ႉၶၢဝ်းယၢမ်းထၢႆႇထတ်းၸတ်း ႁိုင် 3 ပီပၢႆ။ ဢွင်ႈ တီႈထၢႆႇတႄႉ ၵမ်ႈၼမ်ပဵၼ်တီႈ ၼႃႈလိၼ်သိုၵ်းမၢႆ 1 လွႆၵေႃႇဝၼ်း။ တၢင်းယၢဝ်းငဝ်းတူင်ႉၼႆႉ မီး 80 မိၼိတ်ႉ။ ၽူႈ ၸတ်းၵၢၼ်ပဵၼ်မႃးလွင်ႈငဝ်းတူင်ႉၼႆႉ ပဵၼ်ၼူၼ်းထဝတ်း ၼၢမ်းပဵၼ်ၵျၽူၼ်း ဝႃႈၼႆ။