ငဝ်းတူင်ႉလွင်ႈ “လိၼ်ႁၢမ်းလႅၼ်” လွင်ႈသိုၵ်းတႆး လႅၼ်လိၼ်တႆး တေၼႄၼႂ်းႁူင်းငဝ်းမိူင်းထႆး

ငဝ်းတူင်ႉ လွင်ႈလိၼ်ႁၢမ်းလႅၼ် (Soil Without Land) ဢၼ်ထၢႆႇဝႆႉလွင်ႈၵူၼ်းၼုမ်ႇသိုၵ်းတႆး ၼႃႈလိၼ်သိုၵ်းမၢႆ 1 ၵဵင်း တုင်ၼၼ်ႉ တေၼႄ ၼႂ်းႁူင်းၼႄငဝ်းမိူင်းထႆး တႄႇဢဝ်ၼႂ်းၵၢင်လိူၼ်ဢေႃႊၵတ်ႊသ်ၼႆႉၵႂႃႇ။

ငဝ်းတူင်ႉ လွင်ႈ“လိၼ်ႁၢမ်းလႅၼ်” Soil Without Land ၼၼ်ႉ တေၼႄၼႂ်းႁူင်းငဝ်းၼႂ်းဝဵင်းလူင် ၵုင်းထဵပ်ႈ(မိူင်းၵွၵ်ႇ)၊ ၵဵင်းမႆႇလႄႈ မႄႈသွတ်ႇ ၼႂ်းဝၼ်းတီႈ 15/8/2019 ၼႆႉ ဝႃႈၼႆ။

ၼူၼ်းထဝတ်း ၼမ်းပဵၼ်ၵျၽူၼ်း ၽူႈၸတ်းၵၢၼ် Director ၾၢႆႇထၢႆႇငဝ်းႁၢင်ႈတူင်ႉ “လိၼ်ႁၢမ်းလႅၼ်” ၼႆႉ လၢတ်ႈတီႈၽူႈ တွႆႇႁွၵ်ႈ ဝႃႈ “ ငဝ်းတူင်ႉလိူင်ႈၼႆႉ မၼ်းၵဵဝ်ႇၵပ်းလွင်ႈတႆး ဢၼ်ပၢႆႈမႃးယူႇၸွမ်းလႅၼ်လိၼ်ထႆးသေ ၶဝ်ႈႁၢပ်ႇၵၢၼ်သိုၵ်း။ လွင်ႈယူႇလွင်ႈၵိၼ်ၵူၼ်းသိုၵ်း၊ လွင်ႈပၼ်သူးပၼ်တူတ်ႈတၢမ်ႇၵူၼ်းသိုၵ်း လွင်ႈၶၵ်ႉၵၢၼ်ငမ်းယဵၼ် ၼႂ်းၵႄႈသိုၵ်းတႆး လႄႈ လူင်ပွင်ၸိုင်ႈ ၸဵမ်ၸိူဝ်းၼႆႉ” ဝႃႈၼႆ။

ၼႂ်းငဝ်းတူင်ႉၼႆႉ လၢတ်ႈဝႆႉ ၵႂၢမ်းတႆး၊ ၵႂၢမ်းထႆး၊ ၶိုၼ်းသႂ်ႇလိၵ်ႈဝႆႉပၼ်ပႃး တင်းလိၵ်ႈထႆး၊ လိၵ်ႈဢိင်းၵလဵတ်ႈ။ ၻၢႆႊရႅၵ်ႊ တိူဝ်ႊ ၼူၼ်းထဝတ်း သိုပ်ႇလၢတ်ႈၼႄၽူႈတွႆႇႁွၵ်ႈဝႃႈ “ ၶႂ်ႈႁႂ်ႈၵူၼ်းတင်းၼမ်လႆႈႁူႉဝႃႈ လွင်ႈယၢပ်ႇၽိုတ်ႇၵူၼ်း သိုၵ်း၊ ၵူၼ်းပၢႆႈၽေး သိုၵ်း ဢၼ်မီးၸွမ်းလႅၼ်လိၼ်တႆး – ထႆးၼၼ်ႉ။ ယဝ်ႉၵေႃႈ ၶႂ်ႈၼႄပႃးဝႃႈ လူင်ပွင်ၸိုင်ႈတေႃႈလဵဝ် ၼႆႉ ၵေႃႇသၢင်ႈၶၵ်ႉ ၵၢၼ်လွင်ႈငမ်းယဵၼ်ယူႇၼႆသေတႃႉ ၵူၼ်းပၢႆႈၽေးသိုၵ်း ဢၼ်မီးၸွမ်းလႅၼ်လိၼ် တႆး-ထႆး ၸိူဝ်းၼႆႉ ယင်းတိုၵ်ႉ လႆႈ တုၵ်ႉၶ ယၢပ်ႇၽိုတ်ႇယူႇ” ဝႃႈၼႆ။

လိူင်ႈလၢဝ်းၼႂ်း“လိၼ်ႁၢမ်းလႅၼ်”ၼႆႉ ၼႄဝႆႉဝႃႈ ၵူၼ်းသိုၵ်း၊ ၵူၼ်းမိူင်းတႆး ဢၼ်ပၢႆႈမႃးသွၼ်ႈဝႆႉၸွမ်းလႅၼ်လိၼ် တႆး – ထႆးၼႆႉ ႁၢမ်းသုၼ်ႇ ဢမ်ႇမီးမၢႆၾၢင်။ ယဝ်ႉၵေႃႈ ယၢပ်ႇၽိုတ်ႇလွင်ႈႁႃၵိၼ်လဵင်ႉတွင်ႉ။ လိူဝ်ၼၼ်ႉ လုၵ်ႈဢွၼ်ႇ ဢၼ်မႃး ၵိူတ်ႇၸွမ်းလႅၼ်လိၼ် လႆႈတိူဝ်ႉၸၢၵ်ႇၸွမ်း၊ ႁၢမ်းသုၼ်ႇလႆႈၵူၼ်း၊ လႆႈယၢပ်ႇၽိုတ်ႇၸွမ်းလွင်ႈၵၢၼ်ၵိၼ်လဵင်ႉတွင်ႉ။ တေႃႈလဵဝ် လူင်ပွင်ၸိုင်ႈၵူၼ်းမိူင်းၶိုၼ်ႈမႃးသေတႃႉၵေႃႈ ၵူၼ်းပၢႆႈၽေးသိုၵ်းၸွမ်းလႅၼ်လိၼ် ယင်းတိုၵ်ႉတုၵ်ႉၶယၢပ်ႇ ၽိုတ်ႇၵၼ်တင်းၼမ်ယူႇ ဝႃႈၼႆ။

ၼူၼ်းထဝတ်း ၼမ်းပဵၼ်ၵျၽူၼ်း သိုပ်ႇလၢတ်ႈဝႃႈ “ ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉၸွမ်းလႅၼ်လိၼ် တႆး – ထႆးၼႆႉ ဢမ်ႇမီးတၢင်းၽိတ်းသင်၊ ၵူၺ်းၵႃႈ လႆႈႁူပ်ႉလွင်ႈယၢပ်ႇယွၼ်ႉၵၢၼ်မိူင်း၊ ၵၢၼ်သိုၵ်း။ ၵူၼ်းပၢႆႈၽေးတီႈၼႆႈတႄႉ ပဵၼ်ၵူၼ်းမီး ၼမ်ႉၸႂ်ၽိူၵ်ႇၸိုၼ်ႈၶၢဝ်သႂ်လႄႈ ပဵၼ်ဢၼ်လီႁၵ်ႉတႄႉ”ဝႃႈၼႆ။

ၽူႈၶဝ်ႈႁူမ်ႈ ၾၢႆႇၸတ်းၵၢၼ် ထၢႆႇႁၢင်ႈတူင်ႉ တီႈတပ်ႉသိုၵ်းလွႆၵေႃႇဝၼ်း လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈတၢင်းမၼ်း တႄႉ ပဵၼ်လွင်ႈလုၵ်ႈဢွၼ်ႇၸၢႆးၵေႃႉၼိုင်ႈ ပၢႆႈၽေးသိုၵ်းမႃးသေ မႃးယူႇတီႈမူႇဝၢၼ်ႈၵူၼ်းပၢႆႈၽေးတီႈလွႆၵေႃႇ ဝၼ်းၼႆႉ ယဝ်ႉၵေႃႈမၼ်းၸၢႆး ၶဝ်ႈႁၢပ်ႇၵၢၼ်ၼႂ်းသိုၵ်း တႄႇဢဝ်လိူင်ႈၼႆႉသေ ထၢႆႇမႃး” ဝႃႈၼႆ။

တႃႇတေပဵၼ်မႃး ငဝ်းတူင်ႉ “လိၼ်ႁၢမ်းလႅၼ်” Soil Without Land” ၼႆႉ လႆႈၸႂ်ႉၶၢဝ်းယၢမ်းထၢႆႇထတ်းၸတ်း ႁိုင် 3 ပီပၢႆ။ ဢွင်ႈ တီႈထၢႆႇတႄႉ ၵမ်းၼမ်ပဵၼ်တီႈ ၼႃႈလိၼ်သိုၵ်းမၢႆ 1 လွႆၵေႃႇဝၼ်း။ တၢင်းယၢဝ်းငဝ်းတူင်ႉၼႆႉ မီး 80 မိၼိတ်ႉ ဝႃႈၼႆ။